1 Ne migkahiyan te Magbebaye ne Manama si Muwisis, 2 “Kahii nu ka me kabuhalan ni Israil te egpeuyanen te mating‑ew ne lana te ulibu eyew igtubil te sulu eyew kene seini egkeebukan. 3 Keilangan ne egpareketan ni Aarun ka sulu diye te tangkaan te Magbebaye ne Manama diye te tangkaan te hinabel ne indingding te Tahuanan te Kasabutan, ne diye te Balungbalung ne Temuwanan, wey kene eg-ebukan seini taman te maselem. Tulumanen seini ne keilangan ne egtumanen niyu lagkes ka langun ne egpakasinundul pad ne kabuhalan niyu. 4 Ne keilangan ne ig-untud ni Aarun ka me sulu diye te tahuanan te sulu ne bulawan eyew eglayag layun seini diye te tangkaan te Magbebaye ne Manama.”

5  ✡ Iks 25:30.“Ne kuwa kew te daruwa ne kilu te harina ne amana ne meupiya wey hilutu kew te sapulu wey daruwa (12) ne paan. 6 Keilangan ne egbaaren niyu seini te daruwa ne baad. Tighen‑em ka tagse baad wey meg-un-untura niyu diye te lamisa ne impulitan te bulawan. 7 Sewuhi niyu te meemut ne insinsu ka tagse dangdang te daruwa ne baad ne paan. Ka insinsu ne egtutungen iyan pegpapitew ne ka langun nakapanubad e te Magbebaye ne Manama. 8 Keilangan ne layun egtahu si Aarun te paan diye te tangkaan te Magbebaye ne Manama, tagse Aldew te Peggimeley. Sika ka layun niyu igbehey te Manama te ware egtamanan. 9  ✡ Mat 12:4; Mar 2:26; Luk 6:4.Si Aarun wey ka me anak din iyan egpakakamuney te paan ne ighalad, wey diye dan de seini egkeena te Matulus ne Sinabeng, tenged su amana ma ne matulus seini para te Magbebaye ne Manama. Kene egkataman ka pegdawat dan te seini ne paan.”

10 Ne due etew ne matig-Ihiptu se amey wey kabuhalan ni Israil ka iney. Ka ngaran te iney rin, si Silumit ne anak ni Dibri ne kabuhalan ni Dan. Ka seini ne etew migpakig-ehet te sabeka ne kabuhalan ni Israil diye te kampu, 11 wey imbaley-baley rin wey indilus ka ngaran te Magbebaye ne Manama. Purisu in-uyan dan e sikandin diye ki Muwisis. 12 Ne imprisu ran pad sikandin taheed te ware pad nanengnengi ka igkeupii te Magbebaye ne Manama ne eggimuwen diye te kandin.

13 Ne migkahiyan te Magbebaye ne Manama si Muwisis, 14 “Ipalihawang niyu ka etew ne migbaley-baley keddi. Ne ka langun ne nakarineg te pegbaley-baley rin, egtel-eb te belad dan diye te ulu rin, wey egbatuwen sikandin te langun ne kabuhalan ni Israil. 15 Ne kahii nu ka me kabuhalan ni Israil ne ka egbaley-baley te Manama rin, keilangan ne eglegparan iya. 16 Ka egbaley-baley te ngaran te Magbebaye ne Manama, keilangan ne eggimatayan iya. Igpabatu sikandin te langun ne kabuhalan ni Israil. Ne egpeg-ilingen de iya ka lapu wey ka mahinged ne egbaley-baley te Manama, keilangan ne eggimatayan iya.”

17  ✡ Iks 21:12.“Ka egpakapatey te etew keilangan ne eggimatayan degma, 18 wey ka egpakapatey te ayam te senge-etew, keilangan ne egliwanan din ka neyimatayan din. Tantanuri niyu ne ka umul, egbayaran ded degma te umul.

19 “Ke due etew ne nekeyimu te mareet diye te duma rin, sikan ded degma ka eggimuwen diye te kandin. 20  ✡ Iks 21:23-25; Diy 19:21; Mat 5:38.Ka nakalepu te senge-etew, eglepuan ded degma; ka nakabutud te senge-etew, egbuturen degma; ka nakabingew te senge-etew, egbingawan degma. Ne, ka nekeyimu te mareet diye te duma rin, sikan ded degma ka eggimuwen diye te kandin. 21 Ka nakapatey te ayam te senge-etew, keilangan ne egliwanan din ka neyimatayan din, piru ka nakapatey te etew, keilangan ne eggimatayan degma. 22  ✡ Num 15:16.Para te langun ka sika ne balaud, mahinged ma wey se lapu. Sikeddiey ka Magbebaye ne Manama niyu.”

23 Ne miglalahan e ni Muwisis ka me kabuhalan ni Israil. Pegkapenga rin te eglalag, in-uyan dan e diye te mariyu te kampu ka etew ne migbaley-baley te Manama. Ne imbebatu ran e sikandin su seeye ma iya ka insuhu te Magbebaye ne Manama ki Muwisis.