1 Ne migkahiyan te Magbebaye ne Manama si Muwisis, 2 “Kahii nu ka me kabuhalan ni Israil te seini ka me sahakeen ne in-alam te Magbebaye ne keilangan ne eglibulung kew eyew te pegsimba te Magbebaye.”

3  ✡ Iks 20:8-10; 23:12; 31:15; 34:21; 35:2; Diy 5:12-14.“Due hen‑em ne aldew ne egpakatrabahu kew piru ka igkapitu ne aldew, sika ka Aldew te Peggimeley. Kene kew trabahu te sika ne aldew, ke kene, libulung kew eyew te pegsimba minsan hendei kew mig-ugpe, su aldew sika te pegsaye te Manama.

4 “Seini ka me aldew ne in-alam te Magbebaye ne eglibulung kew eyew te pegsimba. Keilangan ne eggimuwen seini te intahahe ne timpu: 5  ✡ Iks 12:1-13; Diy 16:1-2.Ka Sahakeen te Peglihad te Panalihan eggimuwen te marusilem te an-anayan ne bulan* Te Hibruwanen: Nisan. te ikasapulu wey hep‑at (14) ne aldew. 6  ✡ Iks 12:14-20; 23:15; 34:18; Diy 16:3-8.Ka Sahakeen te Paan ne ware Patulin eggimuwen te igkasapulu wey lalimma (15) ne aldew te sikan ded ne bulan. Sahakeen kew te pitu ne aldew ne iyan egkeenen se paan ne ware patulin. 7 Te an-anayan ne aldew te pegsahakeen niyu, libulung kew eyew te pegsimba te Magbebaye ne Manama wey kene kew trabahu. 8 Pitu ne aldew ka pegpanubad niyu te egtutungen diye te Magbebaye. Te igkapitu ne aldew, kene kew trabahu wey libulung kew eyew te pegsimba te Magbebaye.”

9 Ne migkahiyan e man‑e te Magbebaye si Muwisis, 10 “Kahii nu ka me kabuhalan ni Israil: Emun ke diye kew e te tane ne igbehey ku kaniyu, wey egpakahaani kew e te an-anayan ne eg-uma, uyan kew diye talagpanubad te senge-bagkes. 11 Ne igkayew rin seini diye te tangkaan te Magbebaye eyew egdawaten kew nikandin. Eggimuwen seini te talagpanubad te aldew ne egkeimpusan e ka Aldew te Peggimeley. 12 Te sikan ded man‑e ne aldew, panubad kew e man‑e diye te Magbebaye te nati te karniru ne sabeka pad ne leg‑un wey ware nabalbalangi eyew egtutungen ne igpanubad. 13 Parumeyi niyu seini te daruwa ne kilu te harina ne amana ne meupiya ne insewuhan te mentika. Ighalad seini ne egkakeen diye te Magbebaye wey ka keemut kayi egpakahale kandin. Lagkesi niyu man‑e te eghalad te eg-inumen ne binu ne senge-litru. 14 Ke ware kew pad nakahalad te mig-uma ne pinamula niyu, kene niyu pa seini keeni, meyilew ma seini wey ke insandag naa wey ke inggilutu naa ne paan. Sika ka tulumanen ne keilangan ne egtumanen niyu lagkes ka langun ne egpakasinundul pad ne kabuhalan niyu minsan hendei kew eg-ugpe.”

15  ✡ Iks 23:16; 34:22; Diy 16:9-12.“Seel kew naa te pitu ne simana pegkeimpus te Aldew te Peggimeley, te aldew ne mig-uyan kew te senge-bagkes ne ingkayew niyu. 16 Peglihad te pitu ne simana, bunsud kew e man‑e seel taman te igkalalimma ne pulu ne aldew (50) wey halad kew e man‑e diye te Magbebaye ne Manama te iyam ne halad ne egkakeen ne egpuun te egketuen ne me pinamula. 17 Ne minsan hendei kew eg-ugpe, halad kew te daruwa ne paan ne derakel ne inggimu puun te daruwa ne kilu te harina ne amana ne meupiya, wey due patulin. Kayawa niyu seini eyew ighalad ne egkayawen. 18 Ne parumeyi niyu sika te pitu ne lukesan ne karniru ne tigsabeka pad ne leg‑un se kabuyahi, sabeka ne turu ne baka, wey daruwa ne lukesan ne karniru ne ware nabalbalangi. Ipanubad niyu sika isip igpanubad ne egtutungen duma te halad ne egkakeen ne egpuun te egketuen ne me pinamula lagkes ka halad ne inumen su ka keemut due egpakahale te Magbebaye. 19 Ne panubad kew man‑e te sabeka ne lukesan ne kambing eyew igpalangesa ne ig-awe te sale, wey daruwa ne karniru ne sabeka pad ne leg‑un ne para te keupianan. 20 Ne igkayew te talagpanubad diye te tangkaan te Magbebaye ka daruwa ne karniru wey ka ighalad ne an-anayan ne eg-uma te me pinamula eyew igdasag te Manama. Ighalad iya seeye langun diye te Magbebaye wey baad iya seeye te me talagpanubad. 21 Te sikan ded man‑e ne aldew kene kew trabahu wey libulung kew eyew te pegsimba te Magbebaye. Keilangan ne egtumanen niyu sika ne me tulumanen lagkes ka langun ne egpakasinundul pad ne kabuhalan niyu, minsan hendei kew eg-ugpe.

22  ✡ Lib 19:9-10; Diy 24:19-22.“ ‘Ke eggaani kew, kene niyu amina te eggaani ka diye te ilis te pinamulaan niyu, wey kene niyu pakilalawi seini. Igtahahe e seini te egkengaayu-ayu wey te me lapu. Sikeddiey ka Magbebaye niyu.’ ”

23 Ne migkahiyan e man‑e te Magbebaye si Muwisis, 24 “Kahii nu ka me kabuhalan ni Israil: Himeley kew te an-anayan ne aldew te igkapitu ne bulan. Ne emun ke egkarineg niyud ka dahing te me trumpita, libulung kew e eyew te pegsimba. 25 Keilangan ne kene kew trabahu te sika ne aldew wey panubad kew diye te Magbebaye te igpanubad ne egtutungen.”

26  ✡ Lib 16:29-34.Ne migkahiyan e man‑e te Magbebaye si Muwisis, 27 “Ka igkasapulu ne aldew te seini se igkapitu ne bulan, ka Aldew te Pegpasaylu te me sale niyu. Sika ne timpu ka peglibulung niyu eyew te pegsimba, ne puasa kew naa wey panubad kew te egtutungen para te Magbebaye. 28 Kene kew trabahu te sika ne aldew su sika ka Aldew te Pegpasaylu te me Sale, te pegpalangesa eyew iglinis te sale niyu diye te Magbebaye niyu. 29 Ka kene egpuasa te sika ne aldew, egdeldelen e puun te me karumaan din. 30 Ne ka minsan hentew ne egtrabahu te sika ne aldew, eggimatayan te Magbebaye. 31 Ne keilangan ne kene kew iya trabahu. Tulumanen seini ne ware egtamanan para kaniyu lagkes ka langun ne egpakasinundul pad ne kabuhalan niyu, minsan hendei kew eg-ugpe. 32 Himeley kew te seini ne aldew wey keilangan ne egpuasa kew. Egbunsud seini te maapun te igkasiyam ne aldew te igkapitu ne bulan wey egkeimpusan seini te maapun te igkasapulu ne aldew.”

33  ✡ Diy 16:13-15.Ne migkahiyan e man‑e te Magbebaye ne Manama si Muwisis, 34 “Kahii nu ka me kabuhalan ni Israil: Ka Sahakeen diye te me Leeb para te Magbebaye, eggimuwen te igkasapulu wey lalimma ne aldew te igkapitu ne bulan. Sahakeen kew te pitu ne aldew. 35 Te an-anayan ne aldew, kene kew trabahu wey libulung kew te pegsimba te Magbebaye. 36 Panubad kew te egtutungen diye te Manama te pitu ne aldew wey libulung kew eyew te pegsimba te Magbebaye te igkawalu ne aldew, wey panubad kew te egtutungen. Katammanan seini te pegsahakeen niyu, purisu kene kew trabahu.

37 “Seini ka in-alam ne me sahakeen te Magbebaye ne eglibulung kew eyew egsimba kandin, wey panubad kew te egtutungen ne igpanubad, halad kew te egkakeen ne egpuun te egketuen ne pinamula, igmanubad wey me halad ne igkeinum te timpu te intahahe ne pegsahakeen niyu. 38 Ne ihalad niyu sika timul te me dasag niyu, te me halad niyu te pegtuman te impahunlibet niyu, wey te me dasag niyu diye te Magbebaye. Ka sika ne sahakeen timul te Aldew te Peggimeley ne eggimuwen niyu tagse simana.

39 “Ke egkatines niyud ka me uma niyu, sahakeen kew para te Magbebaye te igkasapulu wey lalimma (15) ne aldew te igkapitu ne bulan. Sahakeen kew te pitu ne aldew; kene kew trabahu te an-anayan ne aldew wey te igkawalu ne aldew. 40 Te an-anayan ne aldew, kuwa kew te amana ne meupiya ne behas te me kayu, me pakew te palmira, me sugpang te mallapung ne me kayu, wey ka me kayu-kayu diye te ilis te bangalug. Ne gale-gale kew te pitu ne aldew diye te tangkaan te Magbebaye. 41 Sahakeen kew para te Magbebaye te pitu ne aldew te igkapitu ne bulan te tagse leg‑un, wey tantanuri niyu seini lagkes ka langun ne egpakasinundul pad ne kabuhalan niyu. 42 Sikaniyu langun se mahinged te Israil, diye kew re ugpe te me leeb niyu taman te pitu ne aldew, 43 eyew egpakanengneng ka kabuhalan niyu keureme ne impalihawang ku ka me kabuhalan ni Israil puun te Ihiptu wey impeugpe ku sikandan te me leeb. Sikeddiey ka Magbebaye ne Manama niyu.”

44 Sika ka in-alam ne me sahakeen te Magbebaye ne ingguhud ni Muwisis diye te kabuhalan ni Israil.