1 Te igkasapulu ne aldew, te igkalalimma ne bulan, te igkapitu ne leg‑un te pegkarakepi kanami, due pila ne igbuyag te me Israilita ne migparani keddi eyew egpanginginse meyitenged te pegbuut te Magbebaye ne Manama. 2 Ne impanengneng a te Magbebaye, 3 “Etew, kahii nu ka me igbuyag te me Israilita te migkahi a se Magbebaye: Miggendini kew ubag ka egpanginginse keddi? Sikeddi se Magbebaye ne ware kapatayan, egpahunlibet a ne kene ku iya egtabaken sikaniyu.

4 “Etew, hukumi nu sikandan wey ipanengneng nu kandan ka mallindit ne hinimuwan te me kaap-apuan dan. 5  ✡ Iks 6:2-8.Kahii nu sikandan te migkahi a se Magbebaye: Te timpu ne in-alam ku ka me Israilita, migpanaad a kandan. Ne migpeila a kandan diye te Ihiptu ne sikeddi ka Magbebaye ne Manama ran. 6 Te seeye ne timpu, migsaad a ne igpalihawang ku sikandan te Ihiptu, wey eg-uyanen ku diye te tane ne insaad ku kandan, ka tane ne malambeg te langun ne tane wey dakel se eg-uma.* Te Hibruwanen: tane ne egtulayasan te gatas wey teneb. 7 Ne ingkahiyan ku sikandan te keilangan ne eg-engkeran dan ka langun ne makalelanget ne larawan ne egpipitawen dan, wey ka me diyus-diyus diye te Ihiptu ne egpakamalindit te pegkeetew ran, su sikeddi de ka Magbebaye ne Manama ran. 8 Piru ware sikandan migpammineg keddi, su nasi migsupak. Ware dan engkeri ka makalelanget ne me diyus-diyus te Ihiptu. Purisu migkahi a te igpaneem-neem ku kandan ka mangune-kune ne langet ku te diye pad sikandan te Ihiptu. 9 Piru ware ku seeye ipabulus su egkarali-dian ka ngaran ku te me nasud ne nakalingut te Israil, ka me inged ne nakataha te ingkahiyan ku ka me Israilita te igpalihawang ku sikandan puun te Ihiptu.

10 “Purisu impalihawang kud sikandan puun te Ihiptu, wey in-uyan kud diye te disirtu. 11  ✡ Lib 18:5.Ne diye, imbehey kud wey impasabut kud kandan ka me balaud wey me suhu ku. Ne seeye se egtuman kayi egmalayat se umul. 12  ✡ Iks 31:13-17.Ne impatuman ku man‑e kandan ka Aldew te Peggimeley isip palinneu te kasabutan ney. Sika ka egpasuman-suman kandan ne sikeddi se Magbebaye ka mig-alam kandan. 13 Piru migsupak keddi ka me Israilita diye te disirtu. Ware dan tumana ka me balaud wey me suhu ku ne egpakabehey te malayat ne umul te seeye se egtuman. Ne inggimu ran de due ka minsan nekey ne igkeupii ran te timpu te Aldew te Peggimeley ne igpatuman ku perem kandan. Purisu migkahi a te igpaneem-neem ku kandan diye te disirtu ka langet ku eyew egkahule sikandan. 14 Piru ware ku seeye ipabulus su kema ke egderali-dian ka ngaran ku te me nasud ne nakalingut te Israil, ka me inged ne nakataha te impalihawang ku ka me Israilita puun te Ihiptu. 15  ✡ Num 14:26-35.Ne migpahunlibet a degma kandan diye te disirtu ne kene ku sikandan eg-uyanen diye te tane ne igbehey ku kandan, ka tane ne malambeg te langun ne tane wey dakel se eg-uma,† Te Hibruwanen: tane ne egtulayasan te gatas wey teneb. 16 su ware dan ma tumana ka me suhu wey me balaud ku, wey inggimu ran de due ka minsan nekey ne igkeupii ran te timpu te Aldew te Peggimeley ne igpatuman ku perem kandan. In-umalag dan nasi ne egsimba te me diyus-diyus dan. 17 Piru minsan pad te langun ne neyimu ran, neyimenawan e red iya man‑e kandan, wey ware ku sikandan gulaa diye te disirtu.

18 “Ne ingkahiyan ku ka me anak dan diye te disirtu, ‘Kene kew ikul te me balaud ne inggimu te me amey niyu, wey ke me tuluuwen dan naa. Kene kew simba te me diyus-diyus dan eyew kene egkalinditan ka pegkeetew niyu. 19 Sikeddi ka Magbebaye ne Manama niyu. Iyan niyu re tumana ka me balaud wey me suhu ku. 20 Ilaa niyu ne matulus ka Aldew te Peggimeley, su sika ka palinneu ne egpasuman-suman kaniyu ne sikeddi ka Magbebaye ne Manama niyu.’

21 “Piru minsan ka me anak dan, migsupak degma keddi. Ware dan degma tumana ka me balaud wey me suhu ku ne egpakabehey te malayat ne umul te seeye se egtuman kayi. Inggimu ran de due ka minsan nekey ne igkeupii ran ne eggimuwen te timpu te Aldew te Peggimeley ne igpatuman ku perem kandan. Purisu migkahi a te igpaneem-neem ku kandan ka langet ku diye te disirtu. 22 Piru ware ku seeye ipabulus su kema ke egderali-dian ka ngaran ku te me nasud ne nakalingut te Israil, me inged ne nakataha te impalihawang ku ka me Israilita puun te Ihiptu. 23  ✡ Lib 26:33.Piru migpahunlibet a kandan diye te disirtu ne egmegsusuwayen ku sikandan diye te nalein-lein ne me nasud, 24 su ware dan ma tumana ka me balaud wey me suhu ku, wey inggimu ran de due ka minsan nekey ne igkeupii ran te timpu te Aldew te Peggimeley ne igpatuman ku perem kandan. In-umalag dan nasi ne egsimba te me diyus-diyus te kaap-apuan dan.

25 “Purisu imbalahad kud sikandan ne eg-ikul te me balaud wey me tulumanen ne kene ne meupiya, wey kene egpakabehey kandan te umul. 26 Imbalahad kud e man‑e sikandan ne eglinditan dan ka pegkeetew ran pinaahi te peghalad dan te me diyus-diyus dan, lagkes e ka pegpanubad dan te me kinakakayan ne anak dan ne me lukes. Intuhutan kud e seini eyew egkalegparan en iya sikandan, wey egkanengnengan dan ne sikeddi ka Magbebaye.

27 “Sikan naa etew, kahii nu ka me Israilita te migkahi a se Magbebaye: Migpabulus-bulus ka me kaap-apuan niyu ne miglelemet wey migmasinupaken keddi. 28 Te timpu ne in-uyan ku sikandan diye te tane ne insaad ku kandan, nasi mule sikandan migtutung te igmanubad dan, wey mighalad te inumen diye te me diyus-diyus dan diye te tagse matikang ne tuhal, wey te mallapung ne kayu ne egmangiteen dan. Nakapabelu amana seini keddi. 29 Ne mig-insaan ku sikandan, ‘Nekey bes sika se me panubaran diye te me bubungan ne egmangenendiyaan niyu?’ (Ingngaranan e te ‘Matikang ne inged ne Simbaanan’ ka seeye ne inged taman kuntee.)

30 “Purisu kahii nu ka me Israilita te migkahi a se Magbebaye: Eglinditan niyu bes degma ka pegkeetew niyu iling te inggimu te me kaap-apuan niyu, wey egsimbeen niyu naa degma ka mallindit ne diyus-diyus dan? 31 Minsan kuntee inlinditan niyu ka pegkeetew niyu pinaahi te peghalad niyu te me kinakakayan ne me anak niyu ne me lukes isip igpanubad diye te me diyus-diyus niyu. Ne kuntee miggendini kew ka egpanginginse keddi? Isip Magbebaye ne egkeuyag te ware egtamanan, kene ku iya sikaniyu egtabaken. 32 Kene iya egkeyitabu ka insuman-suman niyu ne eg-iling kew te duma ne keet-etawan te me nasud ne migsimba te me diyus-diyus ne inggimu puun te kayu wey me batu.”

33 Ne migpabulus-bulus ka Magbebaye ne migkahi, “Sikeddi se Magbebaye ne egkeuyag te ware egtamanan, egsaad a ne sikeddi ka eghari kaniyu duma te karesen, te kanekal, wey mangune-kune ne langet. 34 Ne pinaahi te karesen, te kanekal, wey mangune-kune ne langet ku, egkuen ku sikaniyu wey eglibulungen puun te me nasud ne nekegsusuwayan niyu, 35 wey eg-uyanen ku sikaniyu diye te disirtu, wey eggukuman ku sikaniyu diye, 36 iling te peggukum ku te me kaap-apuan niyu diye te disirtu ne diye te Ihiptu.

37 “Egseelen ku sikaniyu pinaahi te tuked ku, taheed te egbaye kew, wey eglig‑enen ku ka kasabutan ku duma kaniyu. 38 Ne igpariyu ku puun kaniyu ka me masinupaken, wey seeye se nenakasale keddi. Igpalihawang ku sikandan puun te me nasud ne migpandakep kandan, piru kene ku sikandan egpeugpeen te Israil. Ne egpakanengneng kew e ne sikeddi ka Magbebaye.”

39 Ne migpabulus-bulus ka Magbebaye ne migkahi diye te me Israilita, “Ne uya, pabulus-bulus kew en iya langun ka egpamakey te me diyus-diyus niyu. Piru egginguma iya ka timpu ne egpammineg kew e keddi wey kene niyud egkapeyilawan ka matulus ne ngaran ku pinaahi te peghalad niyu te me diyus-diyus niyu, 40 su diye te dibabew te matulus ne bubungan ku ka matikang ne bubungan te Israil, diye kew e egpamakey keddi se langun ne Israilita. Egdawaten ku sikaniyu diye. Ne keilangan ne eg-uyanen niyu diye ka langun ne mateles ne me dasag niyu. 41 Ke egkakuwa kud e sikaniyu wey egkalibulung puun te me nasud ne nekegsusuwayan niyu, egdawaten ku sikaniyu isip meemut ne halad. Ne pinaahi kaniyu, igpapitew ku ka pegkamatulus ku diye te me nasud. 42 Ne emun ke egkeuyan kud e sikaniyu diye te tane ne insaad ku te me kaap-apuan niyu, egpakanengneng kew e ne sikeddi ka Magbebaye. 43 Ne diye, egkasuman-suman niyu ka me batasan wey me hinimuwan niyu ne nakalindit kaniyu, wey egkaalimedmeran kew e te pegkeetew niyu tenged te me sale niyu. 44 He keet-etawan te Israil, egkanengnengan niyu ne sikeddi ka Magbebaye ke eg-ay-ayaran ku sikaniyu para te kabantug ku, minsan pad te maddeet ne hinimuwan niyu. Sikeddi se Magbebaye ka miglalag kayi.”

45 Ne impanengneng a te Magbebaye, 46 “Etew, tangke ka diye te igkakawanan ne balabahan, panlalag ka wey panagne ka te mareet te seeye ne inged.‡ Iyan igpasabut kayi ka Huda wey Hirusalim. 47 Lalahi nu ka seeye ne inged ne egpammineg te migkahi a se Magbebaye ne Manama, ‘Egsilaban ku sikeykew, wey egkatutung ka langun ne kayu due te keykew, nahangu ma wey se neuyag pad. Kene egkeebukan ka seini ne hapuy, wey egkatutung ka langun ne etew puun te igkakawanan ne balabahan taman te igkahibang ne balabahan. 48 Ne egpakanengneng ka langun ne etew ne sikeddi se Magbebaye ka migsisilab te seini se kene egkeebukan ne hapuy.’ ”

49 Ne migkahi a, “He Magbebaye, migmanagsahukul e ka me etew te layun kun naan de me panunggilingan ka eglalahen ku.”