28
Ka pegkaambuhen te Hari te Tiru
1 Ne impanengneng a te Magbebaye ne Manama, 2 “Etew, kahii nu ka pangulu te Tiru te migkahi a se Magbebaye:
Hambuhen ka wey migkahi ka te manama ka
ne migpinnuu te trunu te me manama
due te pused te dahat.
Piru ka malehet, etew ke re,
minsan migsuman-suman ka ne matagseb ka iling te manama.
3 Migsuman-suman ka ne matagseb ke pad ki Danyil
wey ware iggeles ne kene nu egkanengnengan.
4 Ne naratu ka pinaahi te katagseb nu wey salabutan nu,
wey nakalilimud ka te me bulawan, wey me pelata diye te tinesanan te me karatuan nu.
5 Ne pinaahi degma te katuenan nu te egnigusyu,
migdakel ka karatuan nu,
wey tenged due, neyimu ka ne hambuhen.
6 “Purisu egkahi a se Magbebaye:
Tenged te migsuman-suman ke ma ne matagseb ka iling te sabeka ne manama,
7 egpalusuran ku sikeykew te me lapu ne mabbulut pad te langun ne nasud.
Egpandereetan dan ka langun ne mateles ne karatuan ne naangken nu pinaahi te katagseb nu,
wey egkaawe e ka katelesan nu.
8 Eggimatayan ka nikandan.
Egpatey ka iling te inggimatayan diye te pused te dahat.
9 Pitawen te naa ke egpakakahi ke pad diye te tangkaan te eggimatey keykew
te sabeka ka ne manama.
Etew ke re te pegpitew ran, kene ka ne manama.
10 Eggimatayan ka te me lapu
wey egpatey ka ne egkabalahad de due taman te egkamewu kad. Sikeddi se Magbebaye ka miglalag kayi.”
Ka karereetan te Hari te Tiru
11 Ne migpabulus ka Magbebaye ne migpanengneng keddi, 12 “Etew, ulahinga nu seini ne ulahingen te peglebeng puun keddi te Magbebaye para te Hari te Tiru, kahii nu sikandin te migkahi a se Magbebaye:
Dengan, panunggilingan ka te karesen,
matagseb ka wey mateles ka amana.
13 Diye ka mig-ugpe te Idin,
ka pinamulaan te Manama.
Neempet ka te nakalkalasi ne me mahal ne batu
ne egngaranan te, kurnalina, tupasyu, haspi, krisulitu, birilu, uniks, sapiru, karbungku, wey ismiralda.
Me bulawan ka me alahas nu ne inteil e daan para keykew te timpu te peglesut nu.
14 Impabantayan ku sikeykew te in-alam ku ne sabeka ne maresen ne kirubin
taheed te diye ka te matulus ne bubungan ku.
Miggiphipanew ka ne nataliware te egmangilak-ilak ne me batu.
15 Ware igkarew‑ey te langun ne himu nu
puun te peglesut nu, taman te nakasale ka.
16 Ka karakel te nigusyu nu ka egpuunan ne migmabulut ka wey nakasale ka.
Purisu impaawe ku sikeykew puun te matulus ne bubungan ku,
wey indeldel kad e te maresen ne kirubin puun te taliware te egpangilak-ilak ne me batu.
17 Neyimu ka ne hambuhen tenged te katelesan nu.
Inggamit nu te keungelan ka katagseb nu eyew egmabantug ka.
Purisu igdegpak ku sikeykew diye te tane,
wey egkeyimu kad e ne paney-paney para te langun ne Hari.
18 Nalinditan ka me inged ne simbaanan nu,
tenged te karakel te sale nu, ne iyan ka pegpanlimbung nu te egnigusyu.
Purisu insilaban ku sikeykew ne namelmelehan te langun, taman te naabu kad e.
19 Nenatanengan ka langun ne etew te me nasud ne nekeila keykew
tenged te impangkusan nu.
Makaliyas-liyas ka katamanan nu,
wey egkaawe kad en iya te ware egtamanan.”
Ka peglegpad te Sidun
20 ✡ Huwil 3:4-8; 1Har 11:4-5; 1Har 16:30-33.Ne impanengneng ad man‑e te Magbebaye,
21 “Etew, tangke ka diye te siyudad te Sidun, wey panagne ka te mareet meyitenged te sika ne siyudad.
22 Kahii nu ka keet-etawan diye te migkahi a se Magbebaye:
Egkuntereen ku sikaniyu se me matig-Sidun.
Egdayanen ad e te me etew ke eglegparan kud e sikaniyu,
wey egpakanengneng e sikandan ne sikeddi ka Magbebaye,
wey igpakapapitew ku kaniyu ka pegkamatulus ku.
23 Egpeuyanan ku sikaniyu te karereetan,
wey egdalanag ka langesa diye te me dalan niyu.
Egpanlusuran kew te keet-etawan ne egpuun te nalein-lein ne me inged wey masulug ka egpatey kaniyu.
Ne egpakanengneng kew e ne sikeddi ka Magbebaye.”
Ka pegpanalangin te Israil
24 Ne migkahi ka Magbebaye, “Warad e kangkuwa me nasud ne egpanlemet te me Israilita wey egpasakit kandan iling te me duhi. Ne egpekeile e sikandan ne sikeddi ka Magbebaye.”
25 Ne migpabulus-bulus ka Magbebaye ne migkahi, “Eglibulungen kud e ka me Israilita ne nenekegsuwey-suwey diye te nalein-lein ne me nasud, wey igpakapapitew kud e diye te me nasud ka pegkamatulus ku. Ne eg-ugpe e ka me Israilita te tane dan en iya, ka tane ne imbehey ku te suluhuanen ku ne si Hakub. 26 Egmangugpe e sikandan ne mariyu te karereetan, egmamebaley, wey egmamula te paras. Warad e egpanlusud kandan ke egpanlegparan kud e ka me inged ne nakalingut wey egmandeeg-deeg kandan. Ne egpakanengneng e sikandan ne sikeddi ka Magbebaye ne Manama ran.”