1 Ne in-uyan a te etew diye te taliware te Matulus wey maluag ne seled te timplu. Ne inseked din ka alad diye te tagse kakiliran te bayaanan peendiye te seled, wey tatelu ne mitrus ka kaluag dutu, 2 wey lalimma ne mitrus ka kakepal. Ne daruwa wey liware ne mitrus ka kaluag te bayaanan. Ne inseked din degma ka Matulus wey maluag ne seled te timplu wey daruwa ne pulu (20) ne mitrus ka kalayat dutu, wey sapulu (10) ne mitrus ka kaluag. 3 Ne migseled ka etew diye te Amana ne Matulus ne Sinabeng, wey inseked din ka alad diye te tagse kakiliran te bayaanan paseled diye te Amana ne Matulus ne Sinabeng, wey tigsabeka ne mitrus ka kakepal te me alabat, wey tatelu ne mitrus ka kaluag te gumawan, wey tigtatelu wey liware ne mitrus ka kakepal te me alabat te tagse kakiliran te gumawan. 4 Ne inseked din ka Amana ne Matulus ne Sinabeng, wey kuwadradu seeye ne neelin ne tigtatelu ne pulu wey hep‑at (34) ne dangew se kaluag wey kalayat. Ne ingkahiyan a nikandin, “Seini ka Amana ne Matulus ne Sinabeng.”

5 Ne inseked te etew ka alabat te timplu wey tatelu ne mitrus ka kakepal. Ne diye te lihawangan ne kakiliran te alabat te timplu, due impalingut ne me sinabeng ne tigdaruwa ne mitrus se tagse kaluag. 6 Ne tigtatelu ne untud ka tagse sinabeng. Ne ka tagse untud, impaninabengan pad iya man‑e te tigtatelu ne pulu (30). Ne impeiling te haheran ka diye te lihawangan ne kakiliran te alabat te timplu eyew egpandangkayan te me dullug te seeye ne me sinabeng, wey kenad keilangan ne igpanuksuk pad te alabat te timplu. 7 Ne ka seeye ne me sinabeng ne impalingut diye te lihawangan ne kakiliran te alabat te timplu, immeg-untud-untud seeye ne malmalig-et ka an-anayan, malmaluag e ka impeuntud, wey kinamaluahan ka igkatatelu e ne untud. Ne due me haheran puun te an-anayan ne untud, peendiye te ikarangeb ne untud taman te igkatelu ne untud. 8 Ne diye te lihawangan te timplu, nakita ku ne due impalingut ne matikang ne lantawan ne tigsapulu (10) ne mitrus se katikang, wey iyan immeunturan te me sinabeng. 9 Ne tigdaruwa wey liware ne mitrus ka kakepal te me alabat dapit te lihawangan te me sinabeng. Ne diye te tagse kakiliran te timplu, due migmaawang diye te elat-elat te seeye ne me sinabeng wey te me sinabeng te me talagpanubad 10 ne tigsapulu (10) ne mitrus se kaluag. 11 Ne due daruwa ne gumawan paseled diye te me sinabeng ne diye te tagse kakiliran te timplu. Ka sabeka ne gumawan, migpeendiye te sinabeng ne dapit te igkakawanan ne balabahan, wey ka sabeka ne gumawan, migpeendiye te sinabeng ne dapit te igkahibang ne balabahan. Ne diye te dangdang te migmaawang, due bayaanan ne nakalingut ne daruwa wey liware ne mitrus se kaluag.

12 Ne due nakita ku ne dakel ne baley diye te madmariyu wey nakatangke diye te lama te timplu ne dapit te iglineb. Ne tatelu ne pulu wey lalimma (35) ne mitrus ka kaluag dutu, wey hep‑at ne pulu wey lalimma (45) ne mitrus ka kalayat. Ne daruwa wey liware ne mitrus ka kakepal te alabat.

13 Ne inseked te etew ka kalayat te timplu, wey lalimma ne pulu (50) seeye ne mitrus. Ne lalimma ne pulu (50) ne mitrus degma ka kariyuan puun te liyu te timplu, taman diye te alabat te dakel ne baley ne dapit te iglineb. 14 Ne lalimma ne pulu (50) ne mitrus degma ka kaluag te lama ne diye te katangkaan te timplu peendiye te lama ne dapit te igsile.

15 Ne inseked degma te etew ka kaluag te dakel ne baley ne diye te liyu te timplu dapit te iglineb, lagkes ka me alabat dutu, wey lalimma ne pulu (50) ne mitrus degma seini langun.

Ne ka Matulus ne Sinabeng, ka Amana ne Matulus ne Sinabeng, wey ka likansu, 16 immakepkepan te me tabla, lagkes ka mallig-et ne bintana. Ne ka tatelu ne sinabeng diye te tagse kakiliran te bayaanan, immakepkepan degma te me tabla puun te seeg peendiye te bintana. Ne egkaayun ne egpanlekeban ka seeye ne me bintana. 17 Ne ka me alabat ne diye te dibabew te gumawan ne egpaseled diye te Matulus wey maluag ne seled te timplu, impangakeban degma te me tabla. Ne ka intiru ne alabat diye te seled te timplu, 18 impandayan-dayanan panguliti te me kirubin ne tigdaruwa se ulaula. Ne due degma me palmira ne impangulit diye te eletanan te me kirubin. 19 Ulaula te etew ka limang ne ulaula te kirubin, wey nakatangke seeye diye te palmira. Ne ulaula te liyun ka limang, wey nakatangke degma seeye diye te lein ne palmira. Impangulit langun seeye ne me dayan-dayan diye te intiru ne alabat te seled te timplu 20 puun te seeg peendiye te dibabew, lagkes ka diye te lihawangan ne alabat te Matulus wey maluag ne seled te timplu. 21 Kuwadradu ka me sungkaleg te gumawan te Matulus wey maluag ne seled te timplu. Ne ka diye te egkatangkaan te Amana ne Matulus ne Sinabeng, due egpekeiling te altar ne kayu. 22 Ne ka katikangan te altar, sabeka ne mitrus wey liware, wey sabeka ne mitrus ka kaluag. Neelin ne kayu ka me sungkaleg lagkes ka me pabunsuranan wey ka diye te kakiliran. Ne ingkahiyan a te etew, “Sika ka lamisa ne diye te tangkaan te Magbebaye.”

23 Ne tigdaruwa ka gumawan te Matulus wey maluag ne seled te timplu, wey te Amana ne Matulus ne Sinabeng. 24 Ne ka tagse gumawan, due daruwa ne lekeb ne egkalupi-lupi. 25 Ka me gumawan te Matulus wey maluag ne seled te timplu, due impangulit ne ulaula te me kirubin wey me palmira iling te diye te alabat. Ne due me atep‑atep ne kayu te likansu. 26 Ne ka tagse kakiliran te likansu, due mallig-et ne bintana ne impangulitan te me palmira. Ne ka me sinabeng diye te tagse kakiliran te timplu due degma me atep‑atep.