1 Ne in-uyan a te etew diye te igkarangeb ne lama te timplu,* Malig-et seini ne lama ne diye te egkatangkaan te Matulus ne Sinabeng te timplu. wey diye key migbaye te igkahibang ne balabahan ne baad te timplu. Ne impapitew rin keddi diye ka me sinabeng ne inlinya dapit te igkahibang ne balabahan ne baad te lama te timplu, wey ka baley ne dapit te igkahibang ne balabahan. 2 Ne lalimma ne pulu (50) ne mitrus se katikang te tagse baley, wey daruwa ne pulu wey lalimma (25) ne mitrus se kaluag. 3 Ne sapulu (10) ne mitrus ka kariyuan te eletanan te timplu wey te me sinabeng. Nenakatangke ka seeye ne me sinabeng diye te insimintu ne bayaanan ne impalingut diye te an-anayan ne lama. Tigtatelu ne untud ka seeye ne me sinabeng. 4 Ne diye te egkatangkaan te seeye ne me sinabeng, due dalan ne egpeendiye te seled. Lalimma ne mitrus se kaluag, wey lalimma ne pulu (50) ne mitrus se kalayat. Ne ka me gumawan te seeye ne me sinabeng, nenakatangke diye te igkahibang ne balabahan. 5 Mallig-et ka me sinabeng diye te kinaribabawan ne untud su iyan malmaluag ka me likansu. Piru malmaluag mule ka me sinabeng te an-anayan wey te igkarangeb ne untud. 6 Ne ware mule me sungkaleg te seeye se tatelu ne untud ne me sinabeng, kene ne iling te me sinabeng ne diye te lama. Immeg-untud-untud de seeye ne me sinabeng wey mallig-et e ka diye te kinaribabawan ne untud du te me sinabeng te an-anayan wey te igkarangeb ne untud. 7 Ne ka seeye ne me sinabeng, bayew nakariyu-diyu te lama te timplu, su duen ma alad diye te eletanan ne daruwa ne pulu wey lalimma (25) ne mitrus se kalayat. 8 Ke ware ka alad, egkiteen diye te lama te timplu ka liware ne baad te me sinabeng ne daruwa ne pulu wey lalimma (25) ne mitrus se kalayat. Ne ka me sinabeng ne diye te egkatalipag te timplu, lalimma ne pulu (50) ne mitrus se kalayat. 9 Ne diye te selib te seeye ne me sinabeng, due bayaanan dapit te igsile, puun te lama paseled. 10 Ne due degma me sinabeng dapit te igsile ne naseled te igkarangeb ne lama. Ka seeye ne me sinabeng, madmarani te dakel ne baley ne dapit te iglineb. 11 Ne diye te egkatangkaan te seeye ne me sinabeng, due degma bayaanan iling te diye te egkatangkaan te me sinabeng ne dapit te igkahibang ne balabahan. Nenekeg-iling se me kalayat wey kakepal te seeye ne me bayaanan. Ne ka me gumawan te me sinabeng ne dapit te igkahibang ne balabahan, 12 iling ded degma te me sinabeng ne dapit te igkakawanan ne balabahan. Due degma me bayaanan paseled te seeye ne me sinabeng, wey due degma me alad diye te tagse kakiliran te me bayaanan.

13 Ne ingkahiyan a te etew, “Ka me sinabeng ne dapit te igkakawanan wey igkahibang ne balabahan ne nenakatangke diye te lama te timplu, neneelin ne matulus ne me sinabeng su dutun ma egkeena te me talagpanubad ne egparani diye te tangkaan te Magbebaye ne Manama ka amana ne matulus ne me halad. Ne dutun dan degma igpanahu ka amana ne matulus ne me halad iling te me halad ne egkakeen ne egpuun te egketuen ne pinamula, me halad ne iglinis te sale, wey ka me halad ne igbayad te sale su me matulus ma seeye ne me sinabeng. 14 Ke egseled ka me talagpanubad diye te Amana ne Matulus ne Sinabeng wey egkeupian sikandan ne eglihawang, keilangan ne egluungen dan pad ka insaluub dan te migpamakey diye su me matulus ma seini ne me kumbale. Keilangan ne egliwanan dan pad seini, wey human pad sikandan egkaayun ne eglihawang diye te lama te timplu ne libulunganan te me etew.”

15 Te neimpusan e te etew te egseked ka intiru ne seled te timplu, in-uyan ad e man‑e nikandin diye te lihawangan wey diye key migbaye te gumawan ne dapit te igsile. Ne inseked din e man‑e ka intiru ne kaluahan te timplu diye te lihawangan. 16 Inseked din ka kakiliran ne dapit te igsile, wey daruwa ne gatus wey lalimma ne pulu (250) ne mitrus se kalayat dutu. Iyan din inseked ka kayu ne igseked ne ingkekemkem din. 17 Ne mig-alingkus sikandin wey inseked din degma ka diye te igkahibang ne balabahan, wey daruwa ne gatus wey lalimma ne pulu (250) degma ne mitrus se kalayat dutu. 18 Ne inseked din degma ka diye te igkakawanan ne balabahan, wey 250 degma ne mitrus se kalayat dutu. 19 Ne inseked din degma ka diye te igsile, wey 250 degma ne mitrus se kalayat dutu. 20 Kuwadradu ka timplu, wey nalingut te alad ne iyan nakapegdiyu te matulus wey te kene ne matulus.