Sakariyas
Igpewun‑a
Ka seini ne baseen, insulatan meyitenged te impanagne ni Sakariyas meyitenged te Hirusalim, wey te me guhuren meyitenged te impallateng ne Misiyas wey te katammanan ne peggukum. Nabaad seini ne baseen te daruwa: 1.) Kapitulu 1–8, ka panagne ni Sakariyas meyitenged te impakita kandin ne pegluwas te Hirusalim, ka pegbalew-balew te timplu, ka peglinis eyew egmatulus ka keet-etawan te Magbebaye ne Manama; 2.) Kapitulu 9–14, ka me guhuren meyitenged te impallateng ne Misiyas wey te katammanan ne peggukum.
Impalintutuuwan ne insulat seini ne baseen te elat-elat te 520 wey te 518 ne leg‑un te ware pad neetew ka Kristu.
Ka nenasulat te seini ne baseen
Ka pegpaney-paney wey pegpallateng 1:1–8:23
Ka peglegpad te me inged ne kuntere te Israil 9:1-8
Ka pegginguma te katubung wey keupianan 9:9–14:21
1
Ka pegpalibed te Manama te keet-etawan din
1 ✡ Isra 4:24–5:1; 6:14.Te igkawalu ne bulan te igkarangeb ne leg‑un te peghari ni Daryu diye te Pirsya, migpanengneng ka Magbebaye ne Manama ki prupita Sakariyas ne anak ni Birikiyas wey apu ni Idu. 2 Ne ingkahiyan te Magbebaye si Sakariyas, “Amana a nabelu te me kaap-apuan niyu. 3 Purisu lalahi nu ka me etew te seini ka inlalag ku te Amana ne Maresen ne Magbebaye, ‘Libed kew kayi te keddi wey eglibed a degma kaniyu. 4 Kene kew iling te kaap-apuan niyu. Napangguhuran e sikandan te me prupita dengan ne egpeengkeren ku te maddeet ne me himu ran piru ware sikandan migpammineg wey ke miglinga-linga naa keddiey.’ 5 Migpatey e ka me kaap-apuan niyu wey ka seeye ne me prupita. 6 Piru te ware pad sikandan migpatey, neyitabu pad diye te kandan ka impalalag ku wey ka impepaney-paney ku kandan te me suluhuanen ku ne me prupita. Sikan naa ka mig-inniyug ka me kaap-apuan niyu te me sale dan wey migkahi, ‘Neyitabu en iya kanta ka ingkahi te Amana ne Maresen ne Magbebaye ne eglegparan ki nikandin tenged te me hinimuwan ta.’ ”
Ka me kudde ne impakita ki Sakariyas
7 Te igkararuwa ne pulu wey hep‑at (24) ne aldew te igkasapulu wey sabeka (11) ne bulan te Sibat, migpanengneng e man‑e ka Magbebaye ne Manama ki prupita Sakariyas ne anak ni Birikiyas wey apu ni Idu. Igkarangeb pad seeye ne leg‑un te peghari ni Daryu. 8 ✡ Imp 6:4; Imp 6:2.Migkahi si Sakariyas ka migpangguhud, “Sabeka ne marusilem, due etew ne impakita keddiey ne migpangudde te malalab! Ne diye seini migsanggel te taliware te me kayu ne mirtul, diye te napu. Ne diye te keinniyuhan din, due migmangudde te mallalab, meebul, wey memaangkag. 9 Ne due degma panalihan ne duma ku wey mig-insaan ku sikandin, ‘Ahalen, hentew ka sika se migmangudde?’
“Ne migtabak ka panalihan, ‘Igpangguhud ku keykew ke hentew sika se migmangudde.’ 10 Nataman, impangguhuran ad te seeye se migpangudde ne migsanggel diye te taliware te me kayu ne mirtul. Migkahi sikandin, ‘Insuhu sikandan te Magbebaye ne Manama eyew egpitew ke nekey ka egkengeyitabu te intiru ne kalibutan.’
11 “Ne impanugtulan te migmangudde ka seeye se panalihan te Magbebaye ne Manama ne migsasindeg diye te taliware te me kayu ne mirtul. Migkahi sikandan, ‘Neempet ney e ka intiru ne kalibutan wey ware samuk ne nakita ney.’
12 “Ne mig-insaan te seeye ne panalihan ka Manama, ‘Amana ne Maresen ne Magbebaye, ken‑u nu naan pad igkeyid‑u ka Hirusalim wey ka me lungsud te Huda ne ingkalangeti nu te pitu ne pulu (70) e ne leg‑un?’
13 “Ne meupiya wey egpakabagget ka intabak te Magbebaye ne Manama diye te panalihan din ne migpakiglalag keddi. 14 Ne ingkahiyan a te panalihan ne migpakiglalag keddi, ‘Ipangguhud nu naa ka seini se igpepangguhud keddi te Amana ne Maresen ne Magbebaye: Amana ku geyinawei wey igkeipeng ka Hirusalim ne egngaranan ded te Siyun. 15 Piru amana a nabelu te me nasud ne hendue te ware igkabantali. Kene e red amana egkabelu kandan dengan, piru impasublaan dan mule te egbayad-bayad ka keet-etawan ku. 16 Purisu, egliberan ku red ka Hirusalim ne igkeyid‑u ku, wey igbalew-balew ku igpasasindeg ka timplu ku wey ka Hirusalim.’ ”* Te Hibruwanen: egsekeren ka Hirusalim.
17 Ne ingkahiyan a te panalihan te igpalalag e man‑e seini, “Migkahi ka Amana ne Maresen ne Magbebaye ne egmatubungen din ded man‑e ka me siyudad te Huda. Ne egbaggeten din ded ka keet-etawan te Siyun† Ka Siyun wey Hirusalim, sabeka re ne inged.; eg-alamen din ded ka Hirusalim ne siyudad din.”
Ka me sungey ne impakita ki Sakariyas
18 “Te pegpitew ku man‑e, iyan kud iya se hep‑at ne sungey. 19 Ne mig-insa a te panalihan te Manama, ‘Nekey naa ka igpasabut te sika se hep‑at ne sungey?’
“Ne migtabak sikandin, ‘Ka sika ne me sungey, iyan sika ka me nasud ne migpegsuwey-suwey te keet-etawan te Huda, te Israil, wey te Hirusalim.’
20 “Ne due impapitew keddi te Magbebaye ne Manama ne hep‑at ne etew ne mannayab. 21 Ne mig-insa a, ‘Nekey ka eggimuwen dan?’
“Ne migtabak sikandin, ‘Miggendini sikandan eyew egginaaldek wey egdereet te me nasud ne migpanaman-taman migdereet te Huda wey migpegsuwey-suwey te me mahinged.’ ”