Habakuk 3

Ka peg-ampu ni Habakuk

1 Seini ka peg-ampu* ni prupita Habakuk.

2 He Magbebaye ne Manama, narineg ku ka me guhuren meyitenged keykew.

Ne narineg ku man‑e ka me himu nu, wey neinu-inu a.

Ne ipapitew nu kanami kuntee ne timpu ka meupiya ne me himu ne inggimu nu dengan;

ipanengneng nud man‑e seini kuntee ne timpu

wey ikeyid‑u key nikeykew minsan ke due igkabelu nu.

3 Eglepew ka Manama puun te Timan,

ka matulus ne Manama egginguma puun te Bubungan te Paran.

Neempet te katelesan din ka langit,

wey napenu te egdayan kandin ka ampew te tane.

4 Eglepew sikandin iling te kilat ne eggeteb,

wey eglepew ka malayag diye te belad din,

wey dutu nekeeles ka geem din.

5 Impewun‑a rin kandin ka dalu te me etew,

wey impasinundul din kandin ka kamatayen.

6 Migsasindeg sikandin wey nawelwel ka tane;†

migsil-ap sikandin wey ingkelkel ka me etew te me nasud.

Ka me bubungan ne ware pad nabalbalawi bunsud pad te bunsuranan, egkatempag e,

ka me labuntud ne kene egkaweil, egmapatag e;

seeye ka me inged ne impamayaan din dengan.

7 Nakita ku ne nabaybayaran ka keet-etawan‡ te Kusan,

wey nangelkel ka keet-etawan§ te Midiyan.

8 He Magbebaye, iyan nu naa ingkabelu ka me weyig?

Igkalangeti nu naa ka me weyig,

wey ke igkatameneng nu naa ka dahat?

Migpangudde ka te me kudde nu,

wey migpanpanalu ne mig-untud te karwahi nu.*

9 Inhubus nu ka piet nu,

wey intangen nud ka tunud nu.

Sahuhune ne imperi nu ka tane wey migbusuwak ka weyig.

10 Naweil ka me bubungan iling te me etew ne naaldek-haldek te pegkakita ran keykew,

wey miglugsu ka dakel ne uran;

miglehes ka weyig diye te diralem,

wey migbusuwak ka me luwak.

11 Tenged te layag te migwaheswes ne pane nu wey te kasil‑ew te mig-ilak-ilak ne deldeg nu,

ware nakaweil ka aldew wey bulan.

12 Egpangebel-ebel ka langet nu te pegleuy nu te inged,

wey impandiekan nu ka me nasud tenged te kabelu nu.

13 Miggipanew ka eyew te pegluwas te keet-etawan nu,

wey eyew te pegpangabang te in-alam nu.

Impangimatayan nu ka me pangulu te me etew ne maddeet se hinimuwan,

wey inggule nu pangimatayi ka me hibateen dan.†

14 In-uney nu pilaka ka pangulu te me bahani te deldeg din ded.

Inlusuran key nikandan iling te balisusu

ne migpegsuwey-suwey kanami.

Ne amana sikandan egkahale-gale ne egtigkew eglusud

eyew te pegdereet te seeye se ware egkeyimu.

15 Impalapas nu ka me kudde nu te dahat,

wey migbubunlud ka dakel ne weyig.

16 Narineg ku ka langun, wey impangelkel a;

migkelkel ka bibig ku te liyas te pegkarineg ku te dahing.

Ne hendue te migmahuye ka lawa ku, wey migsayudsud ka me buel ku.

Egpeeneng-eneng e re ne egtetahad

te timpu ne eglegparan e te Magbebaye ka keet-etawan ne eglusud kanami.

17 Minsan ke kenad e egbubulak ka me kayu ne iggira,

wey kenad e egbebehas ka me paras,

wey ka me kayu ne ulibu,

wey minsan ware eg-uma diye te kamet,

wey minsan egpamatey ka me karniru,

wey warad me baka diye te kulungan,

18 piru egkeele e red wey egmahalew mule,

su ka Magbebaye ka manluluwas ku.

19 ✡Ka Manama ne Magbebaye, iyan egpuunan te kanekal ku.

Inggimu rin ne maagsik-agsik ka paa ku iling te paa te usa,

wey impepamaneyik a nikandin te matikang ne me bubungan.

(Para te egpangulu te mangngulahing: egbalesen seini te egkeliten ne intagpesan ne instrumintu te peg-ulahing.)

*3:1 Duen pad sumpul diye te Hibruwanen ne miggenendue, “sumale te sigiyunut”. Piru ware natueni te me etew ke nekey ka igpasabut kayi. Kema ke iyan igpasabut kayi ka peg-ampu ne eg-eparen wey ke eg-ulahingen naa.

†3:6 Te Hibruwanen: Migsasindeg sikandin wey inseked din ka tane.

‡3:7 Te Hibruwanen: me balungbalung.

§3:7 Te Hibruwanen: me kurtina.

*3:8 Te Hibruwanen: wey migpanpanalu ne mig-untud te karwahi te kaluwasan.

†3:13 Te Hibruwanen: inluwitan ka bubun din taman te lieg din.

✡3:19 2Sam 22:34; Sal 18:33.