2
1 Purisu ngarani nu ka me suled nu ne me lukes te “Ami,”* Iyan igpasabut te ngaran ne Ami te Hibruwanen ne linalahan ka “Keet-etawan te Manama.” wey ngarani nu ka me atebey nu te “Ruhama.”† Iyan igpasabut te ngaran ne Ruhama te Hibruwanen ne linalahan ka “Inggeyinawaan.”
Ka peglegpad te Israil iling te malitan ne egpamelegye te lawa
2 “Hangyua niyu ka iney niyu,
minsan kenad e ne asawa ku sikandin wey kena ad e degma ne asawa rin,
sapari niyu sikandin ne egpeengkeren e ka pegpamelegye te lawa rin,
wey ka pegpalibug-libug din.
3 Su emun ke kene, kema ke eglebasan ku sikandin wey egpekeiling e te sikan pad miglesut ne migpalawas,
wey eggimuwen ku ka inged din ne egpekeiling te disirtu,
wey egpekeiling te tane ne migbekabeka, wey egkapatey sikandin ka egkammaraan.
4 Kene ku igkeyid‑u ka me anak din,
tenged su ingkaberes ma sikandan te malitan ne egpamelegye te lawa.
5 Migpalibug-libug ka iney ran,
wey ingkaberes sikandan te malitan ne ware hilew ne egpamelegye te lawa.
Ne migkahi sikandin,
‘Egpamitawen ku ka nanggeyinawaan ku
ne iyan migbehey keddi te egkakeen wey weyig,
kumbale ne bulbul te karniru, hinabel, lana, wey te inumen ku.’
6 Sikan naa ka eg-alaren ku te me hilamunen ne duhiyen ka dalan din‡ Te Hibruwanen: nu.
wey eggimu a te alad ne matikang wey makepal eyew egkeeletan sikandin.
7 Egpanlupuhen din seeye se nanggeyinawaan din
piru kene din sikandan egkeumaan;
egpamitawen din sikandan,
piru kene din sikandan egkakita.
Ne egkahi sikandin,
‘Eglibed ad diye te malehet ne asawa ku,
su meupiya pad ka peg-ugpe ku dengan du te kuntee.’
8 “Ne ware din nanengnengi ne sikeddi bes ka migbehey kandin te egkakeen, te iyam ne binu, te lana,
wey te dakel ne bulawan wey pelata piru inggamit din mule te egsimba ki Baal.
9 Purisu eggawien ku ka trigu ku te timpu te tinggaani
wey ka iyam ne binu ne imbehey ku te tagse timpu te tingpamupu te behas te paras.
Ne egkuen ku ka imbehey ku ne kumbale ne bulbul te karniru wey hinabel ne impasaluub kandin te nalebasan.
10 Ne kuntee igpapitew ku ka pegkamareet din diye te tangkaan te nanggeyinawaan din,
wey ware egpakaluwas kandin puun te geem§ Te Hibruwanen: belad. ku.
11 Egtamanen kud ka langun ne kahalaan din:
ka pegsahakeen te tagse leg‑un,
ka pegsahakeen te iyam ne me bulan,
ka pegsahakeen te me Aldew te Peggimeley,
wey ka langun ne inteil rin ne sahakeen.
12 Egdereetan kud ka me parasan din,
ka me igiraan din ne egkahiyen din ne
imbayad kandin te seeye se nanggeyinawaan din.
Egpabenesan kud ka me pinamulaan din,
wey iyan e egmangeen te me behas ka mahintalunan ne me mananap.
13 Eglegparan ku sikandin
tenged te me aldew te pegtutung din te insinsu para te pista ni Baal.
Migsaluub sikandin te me sising
wey te me dayan-dayan te lawa,
wey miggendiye sikandin te nanggeyinawaan din
wey nalingawan ad nikandin.”
Sika ka ingkahi te Magbebaye ne Manama.
Ka geyinawa te Manama te keet-etawan din
14 Piru seini ka eggimuwen ku. Eg-inniyaten ku sikandin wey eg-uyanen ku diye te disirtu,
wey kene ku sikandin eglanglangitan.
15 ✡ Huswi 7:24-26.Ne iglibed kud kandin ka parasan din,
wey eggimuwen ku ka bangalug ne egngaranan te Akur* Iyan igpasabut te ngaran ne Akur te Hibruwanen ne linalahan ka “kahubut”. ne gumawan te egkapallatengan.
Ne diye eg-ulahing sikandin ne iling te timpu te bate pad sikandin
wey iling te peg-awe din diye te inged te Ihiptu.
16 Ne migkahi ka Magbebaye ne Manama, “Te sika kangkuwa ne aldew, egngaranan ad e nikandin te ‘Iglukes ku’ wey kenad e ne ‘Baal ku.’ ” 17 Ne kene kud sikandin egpangaranen te me diyus-diyus;
kene kud sikandin egparawiten pad te me ngaran ni Baal.
18 Eggimu a te kasabutan para te keupianan dan. Kasabutan seini duma te me mahintalunan ne mananap wey te me manuk-manuk, wey te me mananap ne egdul‑ug te tane. Egdereetan kud ka piet, wey kampilan, wey eg-aween kud ka gira due te Israil, wey eg-ugpe sikandan ne mariyu te samuk.
19 Eg-asaween ku sikeykew Israil te ware egtamanan,
igpapitew ku keykew ka pegkamatareng wey eleg ne peggukum,
geyinawa ne kene egkabalbalawan wey himenew.
20 Egsaad a keykew wey egtumanen ku seini, wey eg-angkenen ku sikeykew ne keddi,
wey eg-ileen a nikeykew ne Magbebaye ne Manama.
21-22 Migkahi ka Magbebaye, “Te sika kangkuwa ne aldew,
egtabaken ku ka me peg-ampu te keet-etawan ku ne me matig-Israil.† Te Hibruwanen: Hisril.
Egpeuranan ku ka tane,
wey egpakahaani sikandan te dakel ne trigu, wey egpakapamupu te me behas te paras wey me ulibu.
23 ✡ Rum 9:25; 1Pid 2:10.Egpeugpeen ku ka keet-etawan ku due te tane dan wey egmatubungen ku sikandan.
Eggeyinawaan ku seeye se ingngaranan te ‘Ware geyinawei,’
wey egngaranan ku te ‘Keet-etawan ku’
seeye se ingngaranan te ‘Kene ne keet-etawan ku.’
Ne egtabak sikandan, ‘Sikeykew ka Manama ney.’ ”
*2:1 Iyan igpasabut te ngaran ne Ami te Hibruwanen ne linalahan ka “Keet-etawan te Manama.”
†2:1 Iyan igpasabut te ngaran ne Ruhama te Hibruwanen ne linalahan ka “Inggeyinawaan.”
‡2:6 Te Hibruwanen: nu.
§2:10 Te Hibruwanen: belad.
*2:15 Iyan igpasabut te ngaran ne Akur te Hibruwanen ne linalahan ka “kahubut”.
†2:21-22 Te Hibruwanen: Hisril.