Ka egbaseen ni
Husiyas
Igpewun‑a
Ka seini ne baseen meyitenged te intagne dengan ni prupita Husiyas ne anak ni Biiri te me walu ne gatus (800) ne leg‑un te ware pad neetew si Hisus. Nekeg-iling si prupita Husiyas wey si Amus ne migpanagne diye te me etew te iling ded ne timpu. Piru migpabulus-bulus mule migpanagne si Husiyas te nenakasinundul pad ne me leg‑un. Te seeye ne timpu, nabaad te daruwa ka inged te Israil wey diye migwali si Husiyas te ampew ne baad ne senge-kakuwa ne egngaranan din te Israil, wey senge-kakuwa ne egngaranan man‑e te Ipraim. Ipraim ka ngaran te amana ne impurtanti ne tribu diye te ampew ne baad. Ne ka Samarya ka iney ne siyudad. Ne ka deisek ne baad te inged te Israil, ingngaranan din te Huda. Migwali sikandin te ware pad dereeti ka Samarya te miglusud ne me kuntere dan.
Te seini ne baseen, impapitew ni Husiyas ka pegsupak te keet-etawan te Magbebaye ne Manama wey ka peg-engked dan kandin. Egpekeiling sikandan te masinupaken ne asawa rin ne si Gumir wey mig-engked kandin. Ne amana nalaggew si Husiyas tenged te pegsupak te me etew wey migsimba te me diyus-diyus, wey warad e migsalig te Magbebaye ne Manama. Piru te katammanan, iyan ded iya egdapit ka geyinawa te Manama te keet-etawan din wey egpakalibed ded man‑e sikandan diye te kandin. Dakel amana ka geyinawa rin kandan, wey impanengneng din seini kayi te amana ne makalulunu ne me lalag, “Egmenuwen ku sikeykew te eg-engked, he Ipraim? Kene ku iya sikeykew egbalaharen ne egkatalu, he Israil. Kene ku sikeykew egdereetan iling te Adma wey Sibuwim. Kene egpakatuhut ka pusung ku te iling due, su dakel ka geyinawa ku keykew.” (11:8).
Ka nenasulat te seini ne baseen
Ka peg-asawa ni Husiyas wey ka pamilya rin 1:1–3:5
Ka pegbayung te Israil 4:1–13:16
Ka saad wey ka suhu te peg-inniyug te sale 14:1-9
1
1 ✡ 2Har 15:1-7; 2Kru 26:1-23; 2Har 15:32-38; 2Kru 27:1-8; 2Har 16:1-20; 2Kru 28:1-27; 2Har 18:1–20:21; 2Kru 29:1–32:33; 2Har 14:23-29.Seini ka inlalag te Magbebaye ne Manama diye te me matig-Israil pinaahi ki Husiyas ne anak ni Biiri te timpu ne nekegsinsinundul mighari te Huda ensi Usiyas, si Hutam, si Ahas, wey si Isikiyas wey iyan mighari te Israil si Hirubuwam ne anak ni Huwas.
Ka asawa wey me anak ni Husiyas
2 An-anayan seini ne pegpakiglalag te Magbebaye ne Manama te me matig-Israil pinaahi ki Husiyas. Ne ingkahiyan din si Husiyas, “Hipanew ka wey pangasawa ka te malitan ne egpamelegye te lawa wey egpakaanak sikandin te me anak niyu ne egsupu kandin. Migpahunsiling sika te peg-inniyug te me matig-Israil keddi wey migsimbe e te me diyus-diyus iling te malitan ne migpamelegye te lawa.”
3 Sikan naa ka miggipanew e si prupita Husiyas wey impangasawa rin e si Gumir ne anak ni Diblaim. Ne naberes e si Gumir wey mig-anak te lukes. 4 ✡ 2Har 10:11.Ne ingkahiyan te Magbebaye ne Manama si prupita Husiyas, “Ngarani nu sikandin ki ‘Hisril’* Ka ngaran ne Hisril, ngaran seini te siyudad wey te napu ne inggimatayan ni Dihu te Hari te Israil, wey te duma pad. su te kene egkaluhey eglegparan ku ka me kabuhalan ni Dihu tenged te pegpangimatey rin diye te Hisril wey egtamanen kud ka migharian te Israil. 5 Te sika ne aldew, egpanggepuen ku ka me pane te me sundalu te Israil diye te bangalug te Hisril.”
6 Ne nataman naberes e man‑e si Gumir wey mig-anak te malitan. Ne ingkahiyan te Magbebaye ne Manama si Husiyas, “Ngarani nu sikandin ki ‘Luruhama’† Iyan igpasabut te ngaran ne Luhurama te Hibruwanen ne linalahan ka “Kene kud eggeyinawaan.” su kene kud e eggeyinawaan wey ke egpasayluwen naa ka me matig-Israil. 7 Piru eggeyinawaan ku mule ka me matig-Huda wey egluwasen ku sikandan, kene ne pinaahi te pane, te kampilan wey ke gira naa, te me kudde wey ke sundalu ne migmangudde, su sikeddi iya se Magbebaye ne Manama ran ka eg-uney-uney ne egluwas kandan.”
8 Te nalutas e ni Gumir si Luruhama, naberes e man‑e sikandin wey mig-anak e man‑e te lukes. 9 Ne migkahi ka Magbebaye ne Manama, “Ngarani nu sikandin ki Luami‡ Iyan igpasabut te ngaran ne Luami te Hibruwanen ne linalahan ka “kene ne keet-etawan ku.” su kene kud e ne keet-etawan ka me matig-Israil wey kena ad ne Manama ran.”
Ka pegpalibed te Israil diye te Manama
10 ✡ Rum 9:26.Piru ka keet-etawan te Israil, egpekeiling kasulug te pantad diye te dahat ne kene egkatakes, wey kene egkaseel. Ne diye te inged ne ingkahiyan sikandan te, “Kene ku sikaniyu ne keet-etawan,” egngaranan ded sikandan diye te, “Me anak te manekal ne Manama.” 11 Ne egkasabeke e man‑e ka me matig-Huda wey ka me matig-Israil wey eg-alam sikandan te pangulu ran. Ne egmasulug sikandan wey egmatubung ka nasud dan.§ Te Hibruwanen: egtakereg sikandan puun te tane. Te seeye kangkuwa ne timpu, egmabantug e ka ngaran te Hisril.* Te Hibruwanen: Egpamula ka Manama.
✡1:1 2Har 15:1-7; 2Kru 26:1-23; 2Har 15:32-38; 2Kru 27:1-8; 2Har 16:1-20; 2Kru 28:1-27; 2Har 18:1–20:21; 2Kru 29:1–32:33; 2Har 14:23-29.
*1:4 Ka ngaran ne Hisril, ngaran seini te siyudad wey te napu ne inggimatayan ni Dihu te Hari te Israil, wey te duma pad.
†1:6 Iyan igpasabut te ngaran ne Luhurama te Hibruwanen ne linalahan ka “Kene kud eggeyinawaan.”
‡1:9 Iyan igpasabut te ngaran ne Luami te Hibruwanen ne linalahan ka “kene ne keet-etawan ku.”
§1:11 Te Hibruwanen: egtakereg sikandan puun te tane.
*1:11 Te Hibruwanen: Egpamula ka Manama.