40
Ka pegliwang te Manama te keet-etawan din
1 Ne migkahi ka Manama,
“Baggeta niyu ka keet-etawan ku! Liwanga niyu sikandan!
2 Paay-ayari niyu te eglalag ka keet-etawan te Hirusalim.
Kahii niyu sikandan te warad e gubut, wey impasaylu e ka me sale dan.
Su inlegparan kud sikandan patamtamani tenged te me sale dan.”
“Andama niyu ka dalan diye te inged ne ware mig-ugpe para te Magbebaye.
Tul-ira niyu ka dalan ne diye te disirtu para te Manama ta.
4 Buneli niyu ka tagse bangalug,
wey pataha niyu ka langun ne labuntud wey me bubungan;
buneli niyu ka langun ne inged ne migmanleb-eng-leb-eng.
5 Egkataman, igpakite e ka katelesan te Magbebaye
wey egkakita seini te langun ne etew.
Ka Magbebaye iya ka miglalag kayi.”
6 ✡ San 1:10-11; 1Pid 1:24-25.Ne due migkahi keddi, “Wali ka.”
Ne mig-insa a, “Nekey‑a ka igwali ku?”
Ne migkahi sikandin, “Iwali nu ne ka langun ne etew iling te hilamunen,
wey iling te me bulak diye te kamet, kene sikandan egkaluhey.
7 Egkalanes ka hilamunen wey egkengeulug ka me bulak
ke egpakalamahan seini te Magbebaye te meinit ne kalamag.
Malehet iya ne iling de te hilamunen ka etew.
8 Egkalanes ka hilamunen wey egkengeulug ka me bulak
piru egpalunggehaat te ware egtamanan ka lalag te Manama ta.”
9 Sikaniyu se talagpanengneng te meupiya ne panugtulen due te Siyun, ne iyan ka siyudad te Hirusalim,
takereg kew diye te puntul te bubungan wey ipanguleyi niyu ka meupiya ne panugtulen.
Ipataman-taman niyu seini ipanguleyi wey kene kew kaaldek.
Kahii niyu ka siyudad te Huda, “Eggingume e ka Manama niyu.”
10 ✡ Isa 62:11; Imp 22:12.Uya, egginguma ka Magbebaye ne Manama ne maresen,
wey eghari sikandin ne due geem.
Ne egginguma sikandin ne eg-uyan te unag wey dasag.
11 ✡ Isi 34:15; Huw 10:11.Egtangguwen din ka keet-etawan din
iling te pegtanggu te sabeka ne talagtameng te me karniru rin.
Egsapipiyen din ka dereisek ne karniru
wey egpaay-ayaran din te eg-inahak seeye se due me nati.
Ware egpekeiling te Magbebaye te Israil
12 Hentew‑a ka egpakatirew te weyig pinaahi te palad din
wey egpakaseked te langit pinaahi te pegdangew?
Hentew‑a ka egpakatahu te kalibutan diye te sabeka ne tahuanan
wey ke egpakatimbang naa te me bubungan wey me labuntud?
13 ✡ Rum 11:34; 1Kur 2:16.Hentew‑a ka egpakapanulu te Panisingan te Magbebaye ne Manama ke nekey ka eggimuwen din
wey ke egpakatambag naa kandin?
14 Hentew‑a ka egpakatambag kandin
eyew egpakasabut sikandin?
Hentew‑a ka egpakapanulu kandin te katareng?
Hentew‑a ka egpakapanulu kandin te katuenan
wey egpakapanulu kandin te salabutan?
15 Ka malehet, ka me nasud egpekeiling de te sabeka ne tihis te weyig puun te baldi
wey ke iling naa te alinepung diye te timbangan.
Eggenaten te Manama ka me isla ne egpekeiling de kaagkap te alinepung.
16 Ka me mananap diye te Libanun,
kene pad eleg ne igpanubad diye te kandin,
wey ka me kayu diye,
kene pad eleg ne igtemeg diye te altar ne tutunganan te igpanubad.
17 Kene de egpakaseked ka langun ne nasud ke igpeiling kandin. Egpekeiling de seini te ware me karuan.
18 ✡ Him 17:29.Purisu hentew ka egpeilingan niyu te Manama?
Kene niyu igpakapapitew ka iling te ula-ula rin te sabeka ne larawan.
19 Iling naa sikandin te me diyus-diyus ne inggimu re te etew,
wey in-akeban te bulawan te talagdekdek te bulawan,
wey indayan-dayanan te pelata ne keddina? Kene sika egkaayun.
20 Kene degma egkaayun ne igpeiling sikandin te diyus-diyus ne kayu ne kene egkalepuk
ne impeyimu te etew ne egkaayu-ayu eyew iyan din ubag ighalad
su kene sikandin egpekeutel te pelata wey bulawan.
Mangngateu ne panday ka impeyimu rin eyew kene seini egkapeled.
21 Ware kew bes nakanengneng?
Ware bes migpangguhud kaniyu puun pad dengan?
Ware kew bes nakarineg ke immenu te Manama te eggimu ka kalibutan?
22 Inggimu seini te Manama ne migpinnuu te trunu rin diye te ampew te kalibutan,
wey egpekeiling de te palahe ka etew diye te diralem.
Ingkanat din ka langit iling te kurtina.
Intangen din seini iling te balungbalung eyew eg-ugpaan.
23 In-awe din ka katenged te me pangulu
wey warad geem dan.
24 Iling sikandan te pinamula ne iyam pad ipamula
ne ware pad nakareralid.
Nahangu seini te inggiyup te Magbebaye,
wey miglayap e seini iling te ukaba.
25 Ne mig-inse ka matulus ne Manama, “Hentew ka egpeilingan niyu keddi?
Hentew ka egpekeiling keddi?”
26 Leng‑ag kew te langit!
Hentew bes ka miggimu te sika se me bituen?
Ka miggimu due iyan ka Manama.
Impalepew rin ka tagse sabeka
wey impangngaranan din seini.
Tenged te geem din, ware minsan sabeka te me bituen ne egkalaag.
27 Sikaniyu se keet-etawan te Israil ne me kabuhalan ni Hakub,
mania te migkahi kew te ware nakita te Magbebaye ne Manama ka me keyirapan niyu
wey imbalahad din ka me katenged niyu?
28 Ware kew bes nakataha wey ke nakarineg naa te ka Magbebaye ne ware egtamanan iyan miggimu te intiru ne kalibutan?
Kene sikandin egkabeley wey egmahuye,
wey ware egpekeugseb te suman-suman din.
29 Imbehayan din te keseg ka nenabbeley wey intimulan din te keseg seeye se magguye.
30 Ne egkengabeley wey egmagguye minsan ka me bate pad
wey egkengapeled ka me kanakan.
31 Piru ka migsalig te Magbebaye ne Manama,
egpakaangken ded te keseg.
Egpekeiling sikandan te miglayang ne banug.
Egpamallahuy sikandan ne kene egkengabeley,
wey egpangipanew sikandan ne kene egmagguye.