45
Ka peg-alam te Manama ki Siru
1 Seini ka ingkahi te Magbebaye ne Manama ki Siru, ka in-alam wey inlig‑en din ka geem:
“Igpasakup ku keykew ka me nasud wey igpatalu ku keykew ka me Hari.
Eglukatan ku ka me gumawan te me siyudad dan eyew kenad seini egkalekeban.
2 Eggun‑a a keykew wey egpatahen ku ka me bubungan.
Egguhusen ku ka me gumawan ne burunsi
wey ka me pagul ne me putew.
3 Igpakita ku keykew ka dakel ne karatuan ne nekeeles diye te nekeeles ne inged,
eyew egkanengnengan nu ne sikeddi se Magbebaye ne Manama te Israil,
ka mig-umew keykew.
4 In-umew ku sikeykew eyew egbulihan nu ka Israil ne suluhuanen ku,
ka keet-etawan ne in-alam ku.
Imbantug ku sikeykew minsan ware ka nekeila keddi.
5 “Sikeddi de ka Magbebaye, warad lein;
warad lein ne Manama angin e keddi.
Egbehayan ku sikeykew te keseg ne ingkeilangan nu
minsan ware ka nekeila keddi.
6 Eggimuwen ku seini eyew egpakanengneng ka keet-etawan ne egpuun te igsile
peendiye te iglineb ne warad e lein ne Manama angin e keddi.
Sikeddi ka Magbebaye ne Manama wey warad lein.
7 Sikeddi ka miggimu te malayag wey te marusilem,
wey egpeuyan te keupianan wey te karereetan.
Sikeddi ka Magbebaye ne Manama ka miggimu te seini se langun.
8 Egbehey a te kapanaluwan
iling te langit ne egbehey te uran.
Egkarawat seini te me etew kayi te kalibutan,
wey egpekeempet ka kaluwasan wey ka katareng
iling te pinamula ne nanubu.
Sikeddi se Magbebaye ka miggimu kayi.”
Ka pegpaney-paney te Manama
9 ✡ Isa 29:16; Rum 9:20.Mekeyid‑u-hid‑u seeye se egpakig-apul te miggimu kandin su iling te langun ne etew,
tahuanan de ne neyimu puun te tane.
Egpakaapul naa ka tahuanan ne tane te talaggimu kandin?
Egkakahiyan din naa ka talaggimu te kuren,
“Kulang ka katuenan nu.”
10 Mekeyid‑u-hid‑u ka anak ne egkahi te amey wey iney rin,
“Mania te neetew e pad ne iling kayi?”
11 Seini ka ingkahi te Magbebaye ne Manama,
ka matulus ne Manama te Israil wey ka miggimu kayi,
“Ware katenged niyu te peg-inse keddi meyitenged te me anak ku.
Kena a nikaniyu panulua ke nekey ka eggimuwen ku.
12 Sikeddi ka miggimu te kalibutan,
wey te me etew ne mig-ugpe kayi.
Sikeddi ka miggimu te langit wey te langun ne diye te langit.
13 Sikeddi iya ka migbagget ki Siru te pegtuman te matareng ne katuyuan ku
wey eggimuwen ku ne eleg ka langun ne paahi rin.
Ne igpasasindeg din ded ka siyudad ku,
wey igpalihawang din ka keet-etawan ku ne naddakep wey neneuyan.
Eggimuwen din sika, kene ne tenged te seleppi, wey ke tenged naa te dasag. Sikeddi se Amana ne Maresen ne Magbebaye ka miglalag kayi.”
14 Ne ingkahiyan te Magbebaye ka me kabuhalan ni Israil,
“Egkaangken niyu ka karatuan te Ihiptu wey te Itiyupiya,
wey egkeuripen niyu ka mallangkew ne me lukes diye te Siba.
Egsinundul sikandan kaniyu ne due me keddina,
wey egpanimbuel sikandan diye te kaniyu,
wey egpeyid‑u-hid‑u ne egkahi,
‘Malehet ne migduma kaniyu ka Manama
wey sikandin de ka Manama!
15 He Manama wey Manluluwas te Israil,
malehet ne sikeykew ka Manama ne miggeeles te pegkeetew.
16 Egkeyilawan iya wey eglemetan ka langun ne migpangimu te me diyus-diyus.
17 Piru egluwasen nu Magbebaye ka Israil,
wey ka kaluwasan dan kene egkataman.
Kenad e sikandan egkeyilawan
wey ke eglemetan naa te ware egtamanan.’ ”
18 Migkahi ka Magbebaye, ne Manama, ka miggimu te langit,
ka migtumpi te kalibutan wey ka mig-ayad-ayad kayi.
Ware din seini engkeri ne ware neimpusi,
ke kene impaay-ayaran din eyew eg-ugpaan.
Migkahi sikandin, “Sikeddi ka Magbebaye wey warad lein.
19 Wara a miggeles-heles miglalag wey ke tuyu ku naa ne iggeles ka tumung ku.
Wara a migkahi te me kabuhalan ni Hakub,
‘Pamitawa a nikaniyu diye te me inged ne kene niyu egkitaan keddiey.’
Sikeddi ka Magbebaye ne Manama ne miglalag te kamalehetan,
wey impanengneng ku ka eleg.”
Ka Magbebaye wey ka me diyus-diyus
20 Migkahi ka Magbebaye ne Manama,
“Libulung kew wey parani kew keddi ka nenasame puun te me nasud.
Ware iya kalintahaan te seeye se egmanguyan-uyan te me diyus-diyus ne kayu
wey mig-ampu te me diyus-diyus ne kene egpakaluwas.
21 Mein-inseey kew wey ilalag niyu ka katarengan niyu.
Hentew‑a ka migtagne dengan te neneyitabu?
Kene bes ne sikeddi se Magbebaye? Warad lein ne Manama ne matareng,
wey manluluwas angin e keddi.
22 “Libed kew keddi eyew egkaluwas kew se keet-etawan te intiru ne kalibutan,
su sikeddi ka Manama wey warad lein.
23 ✡ Rum 14:11; Pil 2:10-11.Migpanaad a te pegkeetew ku
wey malehet ka impanlalag ku wey kene seini egkabalbalawan.
Ne egpanimbuel keddi ka langun
wey egpanaad ka tagse sabeka ne egmatinumanen e keddi.”
24 Ne egkahi ka keet-etawan,
“Ka Magbebaye ne Manama
ka egpuunan te langun ne katareng wey keseg.”
Egparani kandin ka langun ne nabbelu
wey egkeyilawan.
25 Pinaahi te bulig te Magbebaye ne Manama,
egpanalu ka langun ne kabuhalan ni Israil wey egdeyrey kandin.