44
Ware iling te Manama
1 “Piru pammineg kew,
he kabuhalan ni Hakub ne suluhuanen ku,
keet-etawan te Israil ne in-alam ku.
2 Seini ka ingkahi te Magbebaye ne miggimu kaniyu,
ka egpekeiling te migpalelesut kaniyu wey migbulig kaniyu:
He me kabuhalan ni Hakub ne suluhuanen ku, wey Hisurun* Ka ngaran ne ‘Hisurun,’ gennal seini ni Israil ne inggamit diye te Bibliya te me Hibruwanen. ne in-alam ku,
kene kew kaaldek.
3 “Su egpaweyihan ku ka mammara ne tane
wey egparalanahan ku te weyig ka mammara ne me kamet.
Egpeuyan a te panisingan ku diye te me kabuhalan niyu
wey egpanalanginan ku ka me karumaan niyu.
4 Egmatubung sikandan iling te mallapung ne hilamunen ne migmanubu diye te egkaweyihan
wey ke me kayu naa diye te ilis te weyig.
5 “Ne egkahi ka tagse sabeka,
‘Ka Magbebaye ne Manama ka kamuney keddi,’
ne egkahi ka duma, ‘Kabuhalan a ni Hakub.’
Ne due degma egsulat te ngaran te Magbebaye ne Manama diye te belad dan,
wey egsuman-suman sikandan ne keet-etawan sikandan te Israil.”
6 ✡ Isa 48:12; Imp 1:17; 22:13.Seini ka ingkahi te Amana ne Maresen ne Magbebaye, ka Hari wey Manluluwas te Israil,
“Sikeddi ka bunsuranan wey ka katamanan,
wey warad lein ne manama angin e keddi.
7 Hentew‑a ka eg-angken ne egpekeiling sikandin keddi?
Igpahuhud kandin ka langun ne neyitabu puun pad te peg-alam ku te karaan ne me etew,
wey igpahuhud kandin ke nekey ka egginguma ne egkeyitabu?
8 Kene kew kaaldek keet-etawan ku!
Ingguhud kud e kaniyu dengan ke nekey ka tuyu ku.
Ne sikaniyu ka me talagpamalehet ku
ne ware lein ne manama angin e keddi
ne egpakapangabang kaniyu, warad en iya.”
Ware karuan te pegsimba te diyus-diyus
9 Ware karuan te seeye se langun ne egpangimu te diyus-diyus wey ware karuan te me diyus-diyus ne ingkahale dan. Me butud ka migsimba kandan wey ware kalintahaan. Sikan naa ka egkeyilawan iya sikandan. 10 Ungel ka etew ne egpangimu te larawan ne diyus-diyus ne kene egpakabulig. 11 Pammineg kew! Egkeyilawan ka langun ne migsimba te diyus-diyus su me etew re degma ka miggimu due. Palibulunga nu sikandan wey pasasindeha nu diye te hukumanan—egkengaaldek sikandan wey egkengeyilew.
12 Ka mannayab, egkuwa te putew wey eglalaben din seini diye te baha. Egdekdeken din seini egpatamtamani eyew eggimuwen ne lawa te diyus-diyus. Egpakahutas ka himu rin, egpakammara, wey egpakabeley.
13 Ne egsekeren degma te panday ka kayu, egbadlisan din wey egmarkaan. Eggimuwen din seini ne iling te etew. Egpaay-ayaran din seini te eggimu wey igtahu diye te baley. 14 Ne eyew due egkahamit din ne kayu, egpeled sikandin te sidar, wey ke eg-alam naa sikandin te uk ne kayu wey ke sipris naa diye te puwalas. Egpamula degma sikandin te ahuu wey iyan egpakapatulin kayi ka uran. 15 Ne igtemeg din ka tempug te kayu eyew egpekeyinarang sikandin wey egpekeyilutu te paan. Ne ka tempug te kayu, eggimuwen din ne diyus-diyus wey egpanimbuel sikandin ka egsimba. 16 Igtemeg din ka tempug te kayu wey egtutuug sikandin te ngalap diye te baha. Egkeenen din ka intuug din wey egkabulung sikandin. Ne egginarang sikandin wey egkahi, “Meupiya su migmeinit-init a ubag ka egtetengteng te hapuy.” 17 Ne ka subla te kayu eggimuwen din ne sabeka ne diyus-diyus. Egpanimbuel sikandin, egsimba, wey eg-ampu ne egkahi, “Luwasa a su manama ku sikeykew.”
18 Ka seini ne me etew ware nakanengneng wey nakasabut, su migpileng sikandan eyew kene egpakakita, wey inlekeban dan ka me suman-suman dan eyew kene sikandan egpakasabut. 19 Ware minsan sabeka ne nakasuman-suman, wey ke duen naa katuenan, wey ke nakanengneng naa eyew egkahi, “Intemeg ku ka tempug te kayu, eyew egginarangan ku, wey inggilutuan ku te paan wey intuuhan ku te ngalap ne ingkeen ku. Ne mani buwa te eggimuwen ku ne manama ka same te kayu? Egsimbe e bes naa te tempug te kayu?”
20 Iling de te migkeen sikandin te abu. Neyimalu sikandin te suman-suman din wey kene din egkaluwas ka pegkeetew rin wey ke egpakakahi naa te, “Kene ne malehet ne manama ka seini te kawanan ne belad ku.”
21 Migkahi ka Magbebaye,
“Keet-etawan te Israil, sumsumana niyu ne suluhuanen ku sikaniyu.
Inggimu ku sikaniyu, wey kene ku iya eglingawan sikaniyu.
22 In-awe ku ka me sale niyu iling te kibel wey ke gapun naa ne inggiyup te kalamag.
Libed kew e kayi te keddi su sikeddi ka migluwas kaniyu.”
23 Ulahing kew me langit
tenged te kein-inuwan ne inggimu te Magbebaye.
Panguleyi kew te kahale se kinariraleman te tane.
Ulahing kew se me bubungan wey sikaniyu se me kayu due te puwalas.
Su inluwas te Magbebaye ne Manama ka matig-Israil
wey egdayanen sikandin diye te Israil.
24 Seini ka ingkahi te Magbebaye ne Manluluwas niyu,
ka egpekeiling te migpalelesut kaniyu,
“Sikeddi ka Magbebaye ne Manama ne miggimu te langun.
Sikeddi de iya ka miggimu te me langit, wey migtumpi te tane.
25 ✡ 1Kur 1:20.Inggimu ku ne ware karuan te me panagne te ubaten ne me prupita
wey impapitew ku ne me ungel ka egmahehane.
Inggimu ku ne kene ne meupiya ka me tambag te matagseb ne me etew
wey neyimu ne keungelan ka salabutan dan.
26 Sikeddi ka egtuhut ne egkeyitabu ka impanagne te suluhuanen ku
wey me sinuhu ku.
Ne migkahi a meyitenged te Hirusalim,
‘Egkeugpaan ded seini.’
Ne ka me siyudad te Huda,
‘Igpakapes-ek ded ig-abey wey igpakapasasindeg ded ka nagguhus.’
27 Ne emun ke egsuhu a ne egkeetiyan ka dahat,
egkeetiyan iya seini.
28 ✡ 2Kru 36:23; Isra 1:2.Ne egkahiyan ku si Siru,
‘Sikeykew ka egtameng te keet-etawan ku,
wey himuwa nu ka langun ne igkeupii ku.
Suhu ka ne igpasasindeg man‑e ka Hirusalim wey ka timplu.’ ”