1 Ne migsaad ka me Israilita diye te Mispa. Migkahi sikandan, “Kene ta igpaasawa te me kabuhalan ni Binhamin ka me anak ta ne me malitan.” 2 Ne nangendiye sikandan te Bitil wey nanlungku sikandan diye te tangkaan te Manama. Migpandalawit sikandan taman te marusilem. 3 Migkahi sikandan, “He Magbebaye ne Manama te Israil, mania te neyitabu seini te Israil? Mania te naawaan te sabeka ne kabuhalan ka Israil?”

4 Te maselem e, miggimu sikandan te altar diye te Bitil. Ne mig-uyan sikandan te egtutungen ne igpanubad wey me halad eyew egpekeg-uli ka meupiya ne geyinawa ran te Manama. 5 Ne migpein-inseey ka me Israilita te migkahi, “Hentew ne kabuhalan ka ware mig-apil te peglibulung ta diye te tangkaan te Magbebaye ne Manama diye te Mispa?” (Su nakasaad ma sikandan ne eggimatayan dan ka kene eggendiye te tangkaan te Manama.) 6 Piru neyid‑u ka me Israilita te karumaan dan ne kabuhalan ni Binhamin. Migkahi sikandan, “Kuntee ne aldew, naawaan ka Israil te sabeka ne kabuhalan. 7 Nekey ka eggimuwen ta eyew egpakaasawa ka seeye se nenasame, te nakasaad ki ma te Magbebaye ne Manama ne kene ta igpaasawa kandan ka me anak ta ne me malitan?”

8 Ne migkahi sikandan, “Hentew ka ware mig-apil ne kabuhalan te Israil te peglibulung ta diye te tangkaan te Magbebaye ne Manama diye te Mispa?” Ne natahaan dan ne ware matig-Habis-Gilyad ne mig-apil te peglibulung. 9 Inseel ran ka me etew wey puun due, natahaan dan ne ware matig-Habis-Gilyad diye. 10 Purisu, migsuhu sikandan te sapulu wey daruwa ne libu (12,000) ne bahani ne me sundalu wey ingkahiyan dan, “Hendiye kew te Habis-Gilyad wey pangimatayi niyu ka langun ne mahinged diye, lagkes ka me malitan wey ka me bate. 11 Pangimatayi niyu ka langun ne me lukes lagkes ka me malitan ne neyilabetan e. Piru kene niyu re ilagkes ka ware pad neneyilabeti.” 12 Ne nakakita sikandan te hep‑at ne gatus (400) ne mengebay ne me mahinged te Habis-Gilyad wey in-uyan dan sikandan diye te kampu ran diye te Silu ne sakup te Kanaan.

13 Nataman, migsuhu ka langun ne kabuhalan ni Israil ne egpakahiyan ka me kabuhalan ni Binhamin diye te pahangen te Rimun, “Egkaayun e ne eg-uli kew su neimpusan e ka gubut.” 14 Sikan naa ka nanguli e ka kabuhalan ni Binhamin, wey imbehey e kandan te me Israilita ka me mengebay ne egpuun te Habis-Gilyad. Piru ware de nakaatul ka me malitan kandan.

15 Nalaggew ka me Israilita te kabuhalan ni Binhamin tenged su in-awe e te Magbebaye ne Manama ka kabuhalan ni Binhamin te kabuhalan ni Israil. 16 Ne migkahi ka me pangulu te me kabuhalan ni Israil, “Warad nasame ne malitan te kabuhalan ni Binhamin. Nekey naan e ka eggimuwen ta eyew due egkaasawa te seeye se ware pad asawa? 17 Keilangan ne kene egkaawaan ka Israil te sabeka ne kabuhalan. Keilangan ne due eggimuwen ta eyew egkabuhal red ka me kabuhalan ni Binhamin ne nasame. 18 Piru kene egkaayun ne igpaasawa ta kandan ka me anak ta ne me mengebay.” Nalalag dan seeye su nakasaad e sikandan ne egdilusen dan seeye se egpaasawa te me kabuhalan ni Binhamin.

19 Sikan naa ka migkahi sikandan, “Due sahakeen tagse leg‑un diye te Silu para te Magbebaye ne Manama.” (Diye ka Silu te igkahibang ne balabahan te Bitil, ne igkakawanan ne balabahan te Libuna, wey kewun‑aan te dalan te Bitil peendiye te Sikim.)

20-21 Ne ingkahiyan dan ka me kabuhalan ni Binhamin, “Hendiye kew te parasan wey heles kew diye. Ne emun ke eglihawang e ka me malitan ne matig-Silu ne egsesayew, lihawang kew e puun te me parasan wey kuwa kew e te eg-asawaan niyu wey uyana niyu sikandan te inged niyu. 22 Ne emun ke egsumbung kanami ka me amey ran wey ke me maama ran naa, egkahiyan ney sikandan, ‘Paasawei niyu ubag sikandan te me anak niyu tenged su ware sikandan naatul te me mengebay ne naangey ney diye te Habis-Gilyad. Kene kew red egkarilus su kene ma ne sikaniyu ka mig-uney-uney migpaasawa te me anak niyu kandan.’ ”

23 Ne intuman seini te me kabuhalan ni Binhamin. Taheed te nanesayew ka me malitan, mig-alam ka tagse sabeka kandan te malitan wey impehes dan sikandan uyana eyew eg-asaween dan. Ne nanguli e sikandan diye te ugpaan dan wey imbalbalawan dan te eggimu ka me lungsud dan wey diyad sikandan nangugpe. 24 Ne migmanguli e degma ka me Israilita diye te ugpaan dan wey te me pamilya ran.

25  ✡ Tal 17:6.Te seeye ne timpu, ware Hari te Israil, sikan naa ka minsan nekey re due ka eggimuwen dan, ne kahiyen dan ne eleg kun iya.