9
1 Meupiya perem ke belun ka ulu ku,
wey ke sebseb naa te luwe ka mata ku,
eyew egsinehew a tagse aldew wey marusilem
tenged te keet-etawan ku ne impangimatayan.
2 Meupiya perem ke due egkeugpaan ku diye te disirtu,
eyew egpariyu ad e te keet-etawan ku.
Egmanlibug sikandan langun,
wey me akalen.
3 Andam sikandan layun ne egmanguubat.
Ubat de iya ka mighari te nasud, ware kamalehetan.
Ne migkahi ka Magbebaye ne Manama,
“Malasi eggimu te mareet ka keet-etawan ku,
wey wara ad e nikandan ilaa ne Manama ran.”
4 “Keilangan ne egbantey ka tagse sabeka te sumbaley ran,
wey kene egsalig te me duma ran.
Su me limbungen ka tagse karumaan dan,
wey me id-iranen.
5 Egmalimlimbungey ka tagse sabeka kandan,
wey warad iya minsan sabeka ne kene eg-uubat.
Nalayam e sikandan ne egmanguubat,
wey egpabulus-bulus sikandan ka eggimu te sale.
6 Iyan dan naan de himu se egpanleig-leig te duma wey egpanlimbung,
wey wara ad e nikandan ilaa ne Manama ran.
7 Purisu, egkahi a se Amana ne Maresen ne Magbebaye,
‘Pitew kew, eggimuwen kud ne telek ka keet-etawan ku,
wey eggeraman ku sikandan iling te pelata.
Nekey naan pad iya ka eggimuwen ku te keet-etawan ku?
8 Egpekeiling te egpakapatey ne tunud ka me dile dan,
neneelin naan de iya ne ubat ka egmanlalahen dan.
Meupiya ka egmanlalahen dan diye te me sumbaley ran,
piru migsuman-suman bes ne egdereet kandan.
9 Tenged due, eglegparan ku iya sikandan.
Egsulian ku ka nasud ne iling due.’
Sikeddiey se Magbebaye ne Manama ka miglalag kayi.”
10 Ne migkahi a, “Egsinehawan ku ka me bubungan
wey ka me panabtaban diye te disirtu
su nasilaban e wey warad e egbaye diye.
Warad e egkarineg ne laheng te me baka;
nangawe e ka me manuk-manuk, wey ka me mahintalunan ne mananap.”
11 Ne migkahi ka Magbebaye, “Egguhusen kud ka Hirusalim,
wey egkeyimu e seini ne ugpaan te me mananap ne egpekeiling te asu.
Ne egkeyimu e ne disirtu ka me siyudad te Huda,
wey warad e egpangugpe diye.”
12 Ne mig-insa a te Magbebaye, “Mania te nareetan e wey migmammare e ka inged iling te disirtu wey warad e egbaye kayi? Hentew naan de iya ka matagseb ne etew ne egpakasabut te neyitabu? Hentew‑a ka igpasabut nu kayi eyew egkalalahan dan ka duma?”
13 Ne migtabak ka Magbebaye, “Neyitabu seini su ware dan ma tumana ka balaud ne imbehey ku kandan. Ware sikandan migpalintutuu keddiey wey ke mig-ikul naa te inlalag ku kandan. 14 Nasi de iya migmakehal ka me ulu ran wey migsimba te me larawan te diyus-diyus ne si Baal sumale te impanulu te me kaap-apuan dan kandan. 15 Purisu iyan ku naan de igpakeen te seini ne me etew ka me alibuted ne mapeit,* Ka seini ne pinamula mapeit wey meemut. wey egpeinumen ku te weyig ne due lanit. Sikeddiey se Amana ne Maresen ne Magbebaye te Israil ka miglalag kayi. 16 Ne egtalagtahen ku sikandan diye te duma ne nasud ne ware dan de due nataheyi wey te me kaap-apuan dan. Egpalusuran ku sikandan te me kuntere dan taman te egkaamin sikandan egpatey.”
Ka pegpangananey te keet-etawan te Hirusalim
17 Ne migpabulus ka Magbebaye ne migkahi, “Sumsumana niyu ka neneyitabu!
Pangumawa niyu ka me talaglungku ne me malitan,
ka me malitan ne mangngateu ne eg-ulahing te ulahingen te egdamag.”
18 Ne migkahi ka me etew,
“Paragdahawa niyu sikandan wey peulahinga niyu te ulahingen te egdamag,
taman te egmakasinehew kid
wey egmanulayas e ka me luwe ta.”
19 Ne pammineha niyu ka me etew te Hirusalim† Te Hibruwanen: Siyun. Sabeka seini te me ngaran te Hirusalim. ne egmaninehew.
Egkahi sikandan, “Nareetan kid e!
Mekeyilew-hilew naan de iya seini se neyitabu kanta!
Eg-engkeran tad e ka inged ta
su impangguhus e ka me baley ta.”
20 Ne kuntee,
sikaniyu se me malitan,
pammineg kew te ingkahi te Magbebaye. Ay-ayari niyu seini pammineha.
“Panulua niyu te eglungku ka me anak niyu ne malitan,
wey panulua niyu ka me sumbaley niyu te eg-ulahing te ulahingen te egdamag.
21 Su ka kamatayen, migseled e te me baley ta‡ Te Hibruwanen: miggingume e te me bintana ta.
wey te me malig‑en ne me baley ne me matikang.
Impangimatayan e ka me bate ne egmanggehalew diye te me dalan
wey ka me lukes-lukes diye te me belegyaanan.
22 Egpekeempet de iya ka me minatey te minsan hendei,
egpekeiling e te tei ne natalagtag diye te me kamet,
wey te me ginalab ne in-engkeran e te talaggaani
wey warad e egpanlimud kayi.”
Sika ka inlalag keddi te Magbebaye.
23 Ne migkahi pad man‑e ka Magbebaye,
“Kene ne eleg ne igpeggasal te matagseb ne etew ka katagseb din,
wey ke igpeggasal naa te makeseg ne etew ka kanekal rin,
wey ke igpeggasal naa te meyaman ka karatuan din.
24 ✡ 1Kur 1:31; 2Kur 10:17.Emun ke egkeupian sikandan ne egpeggasal,
keilangan ne iyan dan igpeggasal ka peg-ila ran wey pegsabut dan keddiey.
Tenged su hiimenawen a ne Magbebaye,
eleg wey matareng ka eggimuwen ku kayi te kalibutan
su sika ka egpakapahale keddiey.
Sikeddiey se Magbebaye ne Manama ka miglalag kayi.”
25 Ne migkahi pad iya man‑e ka Magbebaye, “Egginguma ka timpu ne eglegparan ku ka langun ne nenatulian e piru ware nabalbalawi se me batasan— 26 ka me matig-Ihiptu, matig-Huda, matig-Idum, matig-Amun, matig-Muwab, wey ka langun ne mahinged te disirtu ne migmatempug te bulbul§ Ka egpatempug te bulbul, sabeka ne batasan te talagpanubad ne ingkene te me Israilita (egkakita diye te Lib 19:27). ran isip pegtahud te me diyus-diyus dan. Nenatulian e sikandan langun, piru ware dan tumana ka kasabutan ne intuusan kayi. Warad iya minsan sabeka ne etew te seeye ne me nasud, wey warad iya minsan sabeka ne matig-Israil ne migtuman te kasabutan ku.”