1 Ne due ingkahi te Magbebaye ne Manama keddi te timpu ne impeendini ni Hari Sidikiyas te keddi si Pasur ne anak ni Malkiyas duma ki Supuniyas ne talagpanubad ne anak ni Maasiyas. Ne ingkahiyan a nikandan, 2  ✡ 2Har 25:1-11; 2Kru 36:17-21.“Hangyua nu ubag ka Magbebaye ne egbulihan key nikandin su eglusuran key ni Nibukadnisar ne Hari te Babilunya. Kema ke eggimu sikandin te kein-inuwan iling te inggimu rin dengan, wey egpeeneng-eneng e si Nibukadnisar ka eglusud.”

3 Ne ingkahiyan kud e sikandan, 4 “Kahii niyu si Sidikiyas te migkahi ka Magbebaye, ka Manama te Israil, ‘Warad karuan te me panganiban nu ne eggamiten nu te egpakiggira ki Nibukadnisar, wey te me sundalu rin ne miglingut te matikang wey makepal ne alad ne batu. Ne egmanlimuren kud e ka me panganiban te me sundalu nu due te taliware te siyudad. 5 Ne tenged te mangune-kune ne langet ku, sikeddiey e mismu ka egpakiggira kaniyu duma te karesen ku. 6 Egpangimatayan ku ka langun ne mig-ugpe te seini ne siyudad, me etew wey me mananap. Egpatey sikandan te mangune-kune ne dalu. 7 Piru igparakep ku sikeykew, ka me upisyal nu, wey ka me etew ne nasame te gira, te bitil, wey te dalu. Igparakep ku sikaniyu ki Nibukadnisar wey te me kuntere niyu ne egkeupian ne eggimatey kaniyu. Eggimatayan kew langun ni Nibukadnisar te ware pegkeyid‑u. Sikeddiey se Magbebaye ne Manama ka miglalag kayi.’ ”

8 Ne ingkahiyan a te Magbebaye, “Kahi nu ka keet-etawan, ‘Pammineg kew te ingkahi te Magbebaye! Egpaalamen ku sikaniyu te dalan peendiye te keupianan wey te dalan peendiye te karereetan. 9 Ne seeye se egpalunggaat kayi te siyudad, egpatey te gira, te gutas, wey te dalu. Piru seeye se eglihawang wey eggural te me matig-Babilunya ne sasangan e ne eglusud kuntee te siyudad, kene eggimatayan. 10 Nasabeke e ka geyinawa ku te pegdereet te seini ne siyudad. Igbehey kud seini diye te Hari te Babilunya, wey egsilaban din e seini. Sikeddiey se Magbebaye ne Manama ka miglalag kayi.’ ”

11 Ne ingkahiyan ad man‑e te Magbebaye, “Kahii nu ka pamilya te Hari te Huda ne me kabuhalan ni Dabid te migkahi a se Manama, ‘Pammineg kew 12 He pamilya te Hari ne me kabuhalan ni Dabid, himuwa niyu layun ka eleg ne peggukum tagse aldew. Pangabangi niyu seeye se egmanakawan puun te seeye se egmanleig-leig kandan. Su ke kene, egkeundulan e ka langet ku ne egpekeiling e te egkanlabkanlab ne hapuy ne ware sabeka ne egpekeebuk. 13 Egkuntereen ku sikaniyu, me matig-Hirusalim ne mig-ugpe te malig‑en ne inged ne diye te puntul te bubungan ne mapatag ne batuwen. Migpaambug kew ne ware egpakalusud kaniyu wey ke egpakaseled naa te inged niyu. 14 Piru eglegparan ku sikaniyu tenged te hinimuwan niyu. Egsilaban ku ka palasyu wey egkatutung ka langun ne nakalingut kayi. Sikeddiey se Magbebaye ne Manama ka miglalag kayi.’ ”