1  ✡ 2Har 24:18-20; 2Kru 36:11-13.Te ware pad naluhey ne mighari te Huda si Sidikiyas ne anak ni Husiyas, ingkahiyan a te Magbebaye ne Manama, 2 “Hirimiyas, himu ka te yuggu ne eggiketan te lubid ne laplap wey isaluub nu naa. 3 Ne pahuhuri nu ka me Hari te Idum, Muwab, Amun, Tiru, wey Sidun te me suluhuanen dan ne nangendini te Hirusalim ka egpakigkita ki Sidikiyas ne Hari te Huda. 4 Iguhud nu kandan seini ne lalag eyew igguhud dan te me Hari dan te migkahi a se Amana ne Maresen ne Magbebaye ne Manama te Israil: 5 ‘Pinaahi te dakel ne geem wey keseg ku, inggimu ku ka kalibutan, me etew, wey me mananap ne mig-ugpe kayi, wey igbehey ku seini te minsan hentew ne igkeupii ku ne egbehayan. 6 Ne kuntee, igbehey kud ka nasud niyu te suluhuanen ku ne si Nibukadnisar ne Hari te Babilunya. Minsan ka me mahintalunan ne me mananap, egpepamakayen kud kandin. 7 Ne ka langun ne nasud, egpamakey te Hari, te me anak din, wey te me apu din taman te eggingume e ka timpu ne ka nasud din e degma ka egdereetan. Ne egkataman, ka nasud din e degma ka egpamakey te masulug ne me nasud wey te mabbantug ne me Hari.

8 “ ‘Piru ke due nasud wey ke migharian naa ne kene egparuma-ruma wey ke egpasakup ki Nibukadnisar ne Hari te Babilunya, igpasalerep ku seini te gira, gutas, wey me dalu taman te egkareetan din en iya seini. 9 Purisu kene kew pammineg te me prupita, me manenagne, me talagluwas te me taheinep, me timbusawen, wey me salamangkiru niyu ne egkahi te kene kew egpepamakayen te Hari te Babilunya. 10 Ubat ka egmanlalahen dan, wey sika ka egpuunan ne egpandeldelen ku sikaniyu puun te inged niyu. Egpandeldelen kud sikaniyu wey eglegparan. 11 Piru ka nasud ne egpasakup te Hari te Babilunya, egpabulus ne eg-ugpe wey egpamula diye te inged dan. Sikeddiey se Magbebaye ne Manama ka miglalag kayi.’ ”

12 Ne sikan ded degma ka inlalag ku ki Sidikiyas ne Hari te Huda. Ingkahiyan ku sikandin, “Pasakup kew te Hari te Babilunya. Pamakaya niyu sikandin wey ka keet-etawan din ke egkeupian kew pad ne egkeuyag. 13 Su emun ke kene, egpatey ka wey ka keet-etawan nu te gira, gutas, wey dalu iling te inlalag te Magbebaye ne egkeyitabu te nasud ne kene egpamakey te Hari te Babilunya. 14 Ne kene kew pammineg te me prupita ne egkahi, ‘Kene kew pamakey te Hari te Babilunya!’ su igpalubuk kew re nikandan te karereetan. 15 Migkahi ka Magbebaye: ‘Ware ku suhua sika ne me prupita. Ubat ka egmanlalahen dan pinaahi te ngaran ku. Ne emun ke egpammineg kew kandan, egpandeldelen kud sikaniyu wey egdereetan, lagkes ka sika ne me prupita.’ ” 16 Nataman, ingkahiyan kud ka me talagpanubad wey ka langun ne etew, “Migkahi ka Magbebaye te kene kew pammineg te me prupita ne migkahi te kene egkaluhey, egpakalibed e puun te Babilunya ka me kasangkapan te timplu. In-ubatan kew nikandan. 17 Kene kew pammineg kandan. Iyan niyu parumdumeyi ka Hari te Babilunya ke egkeupian kew pad ne egkeuyag. Kenad likes ne egkareetan ka seini ne siyudad! 18 Ne emun ke malehet sikandan ne me prupita, wey egpangguhud te lalag ku, paampua niyu sikandan keddiey, te Amana ne Maresen ne Magbebaye. Paampua niyu sikandan ne kene ku igpeuyan diye te Babilunya ka nasame ne me kasangkapan te timplu ku, me kasangkapan te palasyu te Hari te Huda wey te Hirusalim.”

19 Nahuhud te Amana ne Maresen ne Magbebaye ka meyitenged te daruwa ne burunsi ne sungkaleg te timplu, ka dakel ne pelenggana ne burunsi ne egngaranan te ‘Ka Dahat,’ wey ka karwahi ne burunsi. Nahuhud din pad man‑e ka duma pad ne me kasangkapan ne nasame kayi te siyudad. 20 Ware seini uyana ni Hari Nibukadnisar diye te Babilunya te timpu ne indakep din ka Hari te Huda ne si Huwakin ne anak ni Huwakim, duma te langun ne mabantug ne etew te Huda wey Hirusalim.

21 Piru kuntee, migkahi ka Amana ne Maresen ne Magbebaye, ka Manama te Israil, “Pammineg kew te eglalahen ku meyitenged te me kasangkapan ne nasame diye te timplu ku, diye te palasyu te Hari te Huda wey diye te Hirusalim. 22 Egpanguyanen e seini diye te Babilunya wey diye de iya seini igpanahu taman te timpu ne egpanguen kud e man‑e seini wey igmanlibed kud e man‑e kayi te Hirusalim. Sikeddiey se Magbebaye ne Manama ka miglalag kayi.”