30
Ka saad te Magbebaye te keet-etawan din
1 Ne ingkahiyan a te Magbebaye ne Manama te Israil, 2 “Isulat nu ka langun ne iglalag ku keykew. 3 Egginguma ka timpu ne egpeulien kud ka naddakep wey neneuyan ne keet-etawan ku ne me matig-Israil wey me matig-Huda. Igpalibed kud sikandan diye te inged ne imbehey ku te kaap-apuan dan wey egkakandan e man‑e seini. Sikeddiey se Magbebaye ne Manama ka miglalag kayi.”
4 Ne migkahi pad man‑e ka Magbebaye meyitenged te keet-etawan te Huda wey te Israil,
5 “Egkarineg ka kuleyian te me etew ne egkewukag tenged te mangune-kune ne liyas,
wey ware keupianan.
6 Ne kuntee, peeneng-eneng kew wey suman-suman kew!
Eglesutan naan iya ka lukes?
Mania te nakita ku ka me lukes ne migmemakalawag e ka egmanggehen-gen te getek dan
iling te malitan ne eglesutan?
7 Eggingume e ka makaliyas-liyas ne aldew
ne warad iya egpekeiling.
Timpu sika te kalised te me kabuhalan ni Hakub
piru egkaluwas ded sikandan puun due.”
8 Ne migpabulus ka Amana ne Maresen ne Magbebaye ne migkahi, “Te sika ne aldew, kenad e sikandan eg-uripenen te me lapu. Egluwasen kud e sikandan se naddakep wey neuripen.* Te Hibruwanen: Egmanggepuen kud ka me yuggu ne diye te me lieg dan, wey egpamugtusen kud ka immambaku kandan. 9 Egpamakey e sikandan keddiey, te Magbebaye ne Manama ran, wey te kabuhalan ni Dabid ne eggimuwen ku ne Hari dan.
10 ✡ Hir 46:27-28.Sikan naa, kene kew kaaldek, he keet-etawan ku,
kene kew kaalati, he keet-etawan te Israil.
Egluwasen ku sikaniyu puun due te diriyui ne inged,
ka inged ne imprisuwan kaniyu.
Egpekeuli kew red te ugpaan niyu,
wey egmeupiya red ka peg-ugpe niyu.
Egmalinawen kew wey warad e igkaaldek niyu.
11 Su duma a nikaniyu wey egluwasen ku sikaniyu.
Ne egdereetan kud ka langun ne nasud
ne intalagtahan ku kaniyu,
piru kene ku sikaniyu egdereetan.
Eglegparan ku red sikaniyu,
piru te matareng wey eleg ne paahi.
Sikeddiey se Magbebaye ne Manama ka miglalag kayi.”
12 Ne migkahi pad man‑e ka Magbebaye te keet-etawan din,
“Kenad egkeulian ka me pali niyu,
kenad egkabawian ka me paddel niyu.
13 Warad egpakatanggu kaniyu,
wey warad egpakabawi kaniyu.
Kene kew en iya egkeulian.
14 Inlingawan kew e te me lapig niyu ne me nasud,
ware kew e nikandan sumsumana.
Inlusuran kud sikaniyu iling te kuntere ku,
wey mangune-kune ka peglegpad ne neula-ula niyu
su dakel ma ka me sale niyu
wey maddeet ka me batasan niyu.
15 Kene kew sagsahukul tenged te me paddel niyu,
su kenad sika egkeulian.
Inlegparan kud sikaniyu
su dakel ma ka sale niyu
wey maddeet ka me batasan niyu.
16 Piru kuntee, ka langun ne migdereet kaniyu, egdereetan degma,
wey egpandakepen ka langun ne me kuntere niyu.
Ne ka langun ne migdeeg-deeg kaniyu, egde-deehen degma,
wey ka langun ne migpangahew te me karatuan niyu, egpangahawan degma te me karatuan dan.
17 Iglibed ku red ka meupiya ne peglelawa niyu
wey egbawian kud red ka me pali niyu
minsan migkahi ka me kuntere niyu,
‘Nabalahad e ka me matig-Israil,
wey warad e migsuman-suman kandan.’
Sikeddiey se Magbebaye ne Manama ka miglalag kayi.”
18 Ne migkahi pad man‑e ka Magbebaye,
“Igpalibed ku ka keet-etawan ku diye te inged dan
wey igpaheram ku ka hid‑u ku diye te tagse pamilya ran.
Ig-abey ran igpasasindeg ka Hirusalim,
wey ka palasyu diye te impasasindehan ded dengan kayi.
19 Ne egmangulahing te pegpasalamat ka me etew ne nangugpe diye,
wey egmanguleyi sikandan te kahale.
Egkengabuhal sikandan,
wey kene egdeisek;
egmabantug sikandan su egpanalanginan ku ma.
20 Ne egmatubungen ku ka me anak dan iling dengan,
wey eglig‑enen ku sikandan.
Eglegparan ku ka langun ne eg-ayu-ayu kandan.
21 Ne egpuun ded te inged dan ka egkeyimu ne pangulu ran,
wey karumaan dan ded ka egkeyimu ne Hari dan.
Egginggaten ku sikandin wey egparani sikandin keddiey,
su ware eg-aku ne egparani keddiey ke kene ku egginggaten sikandin.
22 Ne egkeyimu sikandan ne keet-etawan ku,
wey egkeyimu a ne Manama ran.
23 “Pammineg kew! Iling ka langet ku te bagyu wey ke balisusu naa ne egpakasuhat te ulu te me etew ne maddeet se hinimuwan! 24 Ne kene iya egkabewu ka langet ku taman te egkeyimu ku ka igkeupii ku ne eggimuwen. Ne egkaay-ayaran niyu red seini egkasabut te egginguma ne me timpu. Sikeddiey se Magbebaye ne Manama ka miglalag kayi.”
*30:8 Te Hibruwanen: Egmanggepuen kud ka me yuggu ne diye te me lieg dan, wey egpamugtusen kud ka immambaku kandan.