46
Ka lalag meyitenged te Ihiptu
1 Ne seini ka inlalag keddiey te Magbebaye ne Manama meyitenged te me nasud. 2 ✡ Isa 19:1-25; Isi 29:1–32:32.An-anayan ka meyitenged te Ihiptu. Ne seini ka inlalag din meyitenged te me sundalu ni Paraun Niku ne Hari te Ihiptu, ne natalu ni Nibukadnisar ne Hari te Babilunya diye te Karkimis ne marani te Weyig ne Iyupratis, te igkeep‑at ne leg‑un te peghari ni Huwakim ne anak ni Husiyas diye te Huda:
3 “Andama niyu ka me kalasag niyu
wey lusud kew e diye te giraanan!
4 Sakangi niyu ka me kudde niyu, wey unturi niyud seini!
Luyud kew e wey isaluub niyud ka me hilmit niyu!
Kamangaa niyud ka me deldeg niyu
wey isaluub niyud ka akeb te me kumeng niyu!”
5 Ne mig-inse ka Magbebaye ne Manama ne migkahi, “Piru nekey seini se nakita ku?
Eglibed e sikandan tenged te liyas.
Natalu e sikandan wey migdagdahew e nangawe,
wey warad miglilingey tenged te liyas.
6 Piru kene iya egpakaalihu minsan ka meiyal ne egpamallahuy
wey ke me bahani naa su egpakarugsu wey egpatey sikandan
diye te igkahibang ne balabahan ne marani te Weyig ne Iyupratis.
7 Hentew‑a sika se egpekeiling te Weyig ne Nilu ne migtulin,
wey egpekeiling te weyig ne migbaggiyu?
8 Iyan sika ka Ihiptu ne migtulin iling te Weyig ne Nilu,
iling te weyig ne migbaggiyu.
Migkahi ka Ihiptu, ‘Egtulin a wey egbunbunan ku ka intiru ne kalibutan,
egdereetan ku ka me siyudad wey ka me etew ne nangugpe diye.
9 Palungkesuwa niyud ka me kudde niyu wey ka me karwahi!
Ne panguntud kew e me bahani: me sundalu puun te Itiyupiya
wey puun te Put ne me mangngateu ne eggamit te kalasag,
wey sundalu puun te Lud ne me tummawan ne egpane.’ ”
10 Seini ka aldew te Amana ne Maresen ne Magbebaye ne Manama;
egsulian din ka me kuntere din
wey egpanlegparan din sikandan.
Egkeenen sikandan te kampilan din
wey eg-inumen ka me langesa ran taman te egkabulung e ka kampilan din.
Te seini ne aldew, ighalad te Amana ne Maresen ne Manama ka me minatey
diye te igkahibang ne balabahan, marani te Weyig ne Iyupratis.
11 Ne migkahi pad man‑e ka Magbebaye ne Manama,
“Panakereg kew e diye te Gilyad me matig-Ihiptu
wey pamitew kew te delemetan!
Ware karuan te masulug ne delemetan ne inggamit niyu,
su kene kew e egkeulian.
12 Nakarineg ka langun ne nasud te pegkeyilew niyu,
wey narineg te langun ka pegsinehew niyu.
Ne egmemekegsukeung e ka me sundalu niyu,
wey egkengapeled e sikandan.”
Ka pegginguma ni Nibukadnisar
13 ✡ Hir 43:10-13.Ne inlalahan a te Magbebaye ne Manama te egginguma si Nibukadnisar ne Hari te Babilunya eyew eglusud te Ihiptu. Migkahi sikandin,
14 “Ipanengneng nu seini diye te Ihiptu, diye te me siyudad te Migdul, Mimpis, wey Tapanis: Pangandam kew e ka egpakiggira
su andam e ka me kampilan ne egdereet kaniyu langun!
15 Mania te natalu e ka diyus-diyus niyu ne si Apis?
Uya su inggumian sikandin te Magbebaye ne Manama!
16 Nenasaligkat wey nenapeled e ka me sundalu niyu
wey migmalalahey e sikandan ka migkahi,
‘Mahaan kew! Egmanguli kid e diye te me karumaan ta,
diye te inged ta eyew egpakapallahuy ki te kampilan te kuntere ta!’
17 “Ne egkahi sikandan, ‘Iyan de iya migtuha se hambug te Hari te Ihiptu. Timpu rin e perem seini piru nasi din de da-daati.’
18 Sikeddiey ka manekal ne Hari,
ka Amana ne Maresen ne Manama.
Iling te Bubungan ne Tabur ne matmatikang pad te duma ne me bubungan,
wey te Bubungan te Karmil ne egpakapantew te dahat,
iling degma due ka geem te eglusud kaniyu.
19 Sikaniyu se me mahinged te Ihiptu,
pangandam kew e ne egkarakep!
Ne egkeyimu e ne disirtu ka siyudad te Mimpis,
wey warad eg-ugpe diye.
20 Egpekeiling ka Ihiptu te mateles ne eglaha-laha pad ne nati te baka,
piru eglusuran sikandin te egpanehed ne egpuun te igkahibang ne balabahan.
21 Minsan ka me sundalu ne insuulan din,
nenekeiling e te impalambeg ne nati te baka.
Ware sikandan migsasindeg wey migpakiggira;
migmanlibed sikandan langun wey migpamallahuy.
Neyitabu seini tenged su migginguma man e ka timpu te peglegpad
wey pegdereet kandan.
22 Ne egpekeiling e te dahing te egpananap ne uled ka dahing te me matig-Ihiptu ne egpamallahuy
te pegginguma te me sundalu ne kuntere dan.
Mig-uyan sikandan te me wasey ka eglusud,
iling te me etew ne egmamepeled te kayu.
23 Ne minsan pad iling kasulug te me kayu diye te makepal ne puwalas ka me matig-Ihiptu,
egkatalu red iya sikandan
su iling ma kasulug te talangas ne kene egkaseel ka me kuntere dan.
24 Egkengeyilawan ka me matig-Ihiptu
su igbehey man e sikandan diye te me etew ne egpuun te igkahibang ne balabahan.”
25 Ne migkahi pad man‑e ka Amana ne Maresen ne Manama ka Manama te Israil, “Eglegparan ku si Amun ne diyus-diyus te me matig-Tibis, lagkes ka duma ne me diyus-diyus te Ihiptu. Ne eglegparan ku degma ka Ihiptu, wey ka me Hari. Eglegparan ku ka Paraun wey seeye se migsalig kandin. 26 Igbehey kud sikandan diye te egkeupian ne eggimatey kandan, diye ki Nibukadnisar ne Hari te Babilunya wey te me sundalu rin. Piru egginguma ka timpu ne eg-ugpaan ded ka Ihiptu, iling te dengan. Sikeddiey se Magbebaye ne Manama ka miglalag kayi.”
Ka pegluwas te Manama te keet-etawan din
27 ✡ Hir 30:10-11.Ne migkahi ka Magbebaye ne Manama, “Kene kew kaaldek keet-etawan ku
kene kew kaliyasi, keet-etawan te Israil.
Egluwasen ku sikaniyu puun due te mariyu ne inged,
puun te inged ne in-uyanan kaniyu te me dinakep.
Egmekeuli kew red wey egmeupiya red ka peg-ugpe niyu
wey warad igkaaldek niyu.
28 Eggenduen a te kaniyu wey egluwasen ku sikaniyu.
Egdereetan ku ka me nasud
ne intalagtahan ku kaniyu,
piru kene ku re mule sikaniyu egguleen.
Egdisiplineen ku re sikaniyu te eleg ne paahi, wey kena a egtuhut ne kene kew egkalegparan.
Sikeddiey se Magbebaye ne Manama ka miglalag kayi.”