1  ✡ 2Har 24:17; 2Kru 36:10.Ne nataman, si Sidikiyas ne anak ni Husiyas, inggimu e ne Hari te Huda ni Nibukadnisar ne Hari te Babilunya subal ki Huwakin ne anak ni Huwakim. 2 Piru si Sidikiyas wey ka me upisyal rin wey ka langun ne etew, ware migtuman te lalag te Magbebaye ne Manama ne ingguhud ku kandan.

3 Piru minsan pad due, insuhu ni Hari Sidikiyas si Hihukal ne anak ni Silimiyas, wey ka talagpanubad ne si Supuniyas ne anak ni Maasiyas eyew eghangyu keddiey ne eg-ampu te Magbebaye ne Manama ney para kandan. 4 Te seeye ne timpu, ware e pad naprisu. Sikan naa ka egpakaleug-leug e pad minsan hendei. 5 Ne seeye degma ka timpu ne inlusuran e te me matig-Babilunya ka Hirusalim. Piru te nakataha sikandan ne eggingume e te Hirusalim ka me sundalu te Ihiptu, warad e sikandan migpabulus ka eglusud.

6 Nataman, impanengneng ad te Magbebaye ne Manama, 7 “Kahii nu si Sidikiyas ne Hari te Huda ne migsuhu keykew eyew te peg-ugsi-ugsi keddiey, te migkahi a se Magbebaye ne Manama te Israil, ‘Ka me sundalu te Paraun ne Hari te Ihiptu ne eggendini eyew egbulig keykew, eglibed e diye te inged dan ne Ihiptu. 8 Ne egkataman, egliberan e man‑e eglusuri te me matig-Babilunya ka Hirusalim. Eg-ahawen dan seini wey egsilaban.’ ” 9 Ne migkahi pad man‑e ka Magbebaye ne Manama, “Kene niyu limbungi ka pegkeetew niyu te egsuman-suman ne kenad eglibed ka me matig-Babilunya, tenged su eglibed ded iya sikandan. 10 Ne minsan pad egkatalu niyu ka langun ne sundalu te Babilunya ne eglusud kaniyu, wey iyan naan de egkasame diye te me balungbalung dan ka nenapaddel, egbukal-bukal red iya sikandan wey egsilaban dan ka seini ne siyudad. Sikeddiey se Magbebaye ne Manama ka miglalag kayi.”

11 Te mig-isues e ka me sundalu te Babilunya puun te Hirusalim tenged te me sundalu te Paraun, 12 mig-awa ad degma diye te Hirusalim wey miggendiya ad te inged ni Binhamin eyew egdawat te keddiey ne baad te tane diye te pamilya ku. 13 Piru te nekeyinguma ad e diye te Gumawan ni Binhamin, indakep ad te kepitan te me talagtameng te gumawan ne si Iriha ne anak ni Silimiyas, wey apu ni Hananiyas. Ingkahiyan a nikandin, “Egpallahuy ka wey eglapig kad te me matig-Babilunya!”

14 Ne migtabak a, “Kene ne malehet sika! Wara a miglapig te me matig-Babilunya.” Piru ware migpammineg si Iriha keddiey. Nasi e re iya dakepa nikandin wey uyana diye te me upisyal. 15 Ne nalanglangetan keddiey ka me upisyal. Impahumian a nikandan wey impaprisu diye te baley ni Diyunatan ne sikritari. Inggimu ran e ne prisuwan ka baley rin. 16 Imprisu a nikandan diye te sinabeng ne diye te diralem te tane, wey diya a naluhey.

17 Nataman impaangey ad ni Hari Sidikiyas, wey impeuyan a nikandin diye te palasyu. Ne diye, mig-insaan ad nikandin te heles de te migkahi, “Due guhuren nu ne egpuun te Magbebaye ne Manama?”

Ne migtabak a, “Uya due. Igbehey kad diye te Hari te Babilunya.” 18 Ne mig-insaan kud ka Hari, “Mania te impaprisu a nikeykew? Nekey bes ka sale ku kaniyu te me upisyal nu, wey te me etew? 19 Hendeid naa ka me prupita nu ne migkahi keykew, ‘Kene ka eglusuran te Hari te Babilunya, wey ka seini ne nasud?’ 20 Ne kuntee mahal ne Hari, pammineha a ubag nikeykew ke egkaayun. Kena ad ubag ipalibed diye te baley ni Diyunatan ne sikritari, su emun ke eggimuwen nu sika, diye e re iya egpatey.”

21 Sikan naa ka migsuhu e si Hari Sidikiyas ne diye e re igpaprisu te lama te me talagbantey te palasyu. Ne migsuhu man‑e sikandin ne egpabehayan a tagse aldew te paan puun diye te me talaggimu te paan, taman te egkaaminan e te paan ka siyudad. Sikan naa ka diya ad prisuwa te lama te me talagbantey te palasyu.