1  ✡ 2Har 24:1; 2Kru 36:5-7; Dan 1:1-2.Te igkeep‑at ne leg‑un te peghari ni Huwakim ne anak ni Husiyas diye te Huda, ingkahiyan a te Magbebaye ne Manama, 2 “Kuwa ka te eglulunen ne sulatanan wey isulat nu ka langun ne inlalag ku keykew meyitenged te Israil wey Huda, wey te langun ne nasud. Isulat nu ka langun ne inlalag ku keykew puun te an-anayan ne migpakiglalag a keykew te si Husiyas pad ka Hari te Huda taman kuntee. 3 Kema ke eg-inniyug e ka keet-etawan te Huda te maddeet ne me himu ran ke egpakarineg sikandan meyitenged te langun ne karereetan ne igpasalerep ku kandan. Ne egpasayluwen kud sikandan te me sale dan.”

4 Purisu impeumew ku si Baruk ne anak ni Niryas. Inlalag ku kandin ka langun ne inlalag te Magbebaye ne Manama keddiey, wey insulat din e seini diye te eglulunen ne sulatanan. 5 Ne ingkahiyan ku si Baruk, “Kena ad egpaseleren diye te timplu. 6 Purisu sikeykew naan de hendiye te timplu te timpu ne egpuasa ka me etew. Ne basaa nu naa te meemen seini se insulat nu langun ne ingkahi ku keykew eyew egkarineg dan ka langun ne inlalag te Magbebaye ne Manama keddiey. Diye ka sasindeg te egpakarineg ka langun te egbaseen nu, lagkes ka keet-etawan te Huda ne diye egpuun te me inged dan. 7 Kema ke tenged kayi, egparani e sikandan te Magbebaye ne Manama, wey eg-inniyug e sikandan te maddeet ne me himu ran su impanpanayan man e sikandan ne eglegparan te Magbebaye ne Manama tenged te mangune-kune ne langet din.” 8 Sikan naa ka imbase en iya ni Baruk diye te timplu ka inlalag te Magbebaye ne Manama sumale te insuhu ku kandin.

9 Te igkasiyam ne bulan te igkalimma ne leg‑un te peghari ni Huwakim te Huda, migpuase e ka me etew eyew egpeyimmimenew te Magbebaye ne Manama. Migpuasa ka langun ne mahinged te Hirusalim wey ka langun ne nangendiye te Hirusalim puun te me lungsud te Huda. 10 Ne taheed te migpammineg ka langun ne etew, imbase e ni Baruk ka langun ne inlalag ku ne insulat din diye te eglulunen ne baseen. Imbasa rin seini diye te timplu, diye te sinabeng ni Gimariyas ne anak ni Sapan ne sikritari te Hari. Nakaribabew te lama ka sinabeng din, marani te gumawan ne egngaranan te Iyam ne Gumawan te timplu.

11 Te narineg ni Mikiyas ne anak ni Gimariyas wey apu ni Sapan ka inlalag te Magbebaye ne Manama ne imbasa ni Baruk, 12 miggendiyad e sikandin te palasyu te Hari, diye te sinabeng te sikritari ne inlibulungan te me upisyal. Ne diye iya si Ilisama ne sikritari, si Dilayas ne anak ni Simayas, si Ilnatan ne anak ni Akbur, si Gimariyas ne anak ni Sapan, si Sidikiyas ne anak ni Hananiyas, wey duma pad ne me upisyal. 13 Ne igguhuran e sikandan ni Mikiyas te langun ne narineg din ne imbasa ni Baruk diye te me etew. 14 Ne insuhu e te me upisyal si Hihudi ne anak ni Nitaniyas wey apu ni Silimiyas, wey apu te buel ni Kusi eyew egpakahiyan si Baruk, “Hendini ka, wey uyanan nu ka eglulunen ne baseen ne imbasa nu diye te me etew.” Purisu miggendiyad iya si Baruk wey in-uyan din ka eglulunen ne baseen. 15 Ne ingkahiyan dan si Baruk, “Pinnuu ke pa ubag, wey baseyi key te nasulat due te eglulunen ne baseen.” Ne imbase en iya seini ni Baruk. 16 Te nekeimpus e sikandin ka migbasa, migmasilsil-apey e ka me upisyal ne nenaaldek wey migkahi ki Baruk, “Keilangan ne igpanengneng ta seini te Hari.” 17 Nataman, mig-insaan dan e si Baruk, “Lalahi key nikeykew ke immenu nu seini langun te egsulat. Inlalag seini ni Hirimiyas keykew?”

18 Ne migtabak si Baruk, “Inlalag seini langun ni Hirimiyas keddiey, wey insulat kud degma kayi te eglulunen ne baseen.”

19 Nataman, migkahiyan e si Baruk te me upisyal, “Keilangan ne eggeles kew ki Hirimiyas, wey kene kew pataha te minsan hentew ke hendei kew eggeles.”

20 Ne intahu e te me upisyal ka eglulunen ne baseen diye te sinabeng ni Ilisama ne sikritari te Hari, wey miggendiyad sikandan te palasyu wey inlalahan dan e ka Hari te langun. 21 Purisu impaangey e te Hari ki Hihudi ka eglulunen ne baseen. Ne in-angey en iya seini ni Hihudi diye te sinabeng ni Ilisama, wey imbasa rin e seini diye te Hari, wey diye te me upisyal ne miglingut kandin migmanasindeg. 22 Timpu seeye te tingmaagsil, ne ka Hari, diye migpinpinnuu te ugpaanan din ne para te tingmaagsil, wey due hapuy diye te tangkaan din. 23 Ne tagse egpekeimpus si Hihudi ka egbasa te tatelu wey ke hep‑at naa ne baad, egtempuhen e seini te Hari te gepes wey ig-antug din e seini diye te hapuy. Ne henduen de due dahayun taman te naamin e nasilabi ka eglulunen ne baseen. 24 Piru warad iya naaldek ka Hari wey ka me upisyal ne nakarineg te imbasa ne sulat. Ware dan degma bindasa ka me kumbale dan eyew te pegpapitew te pegkalaggew ran. 25 Minsan ke inhangyu e enni Ilnatan, Dilayas, wey ni Gimariyas ka Hari ne kene egsilaban ka eglulunen ne baseen, piru warad iya migpammineg ka Hari. 26 Nasi de iya suhua te Hari ka anak din ne si Hiramil, si Sirayas ne anak ni Asriil, wey si Silimiyas ne anak ni Abdiil ne egdakep kanami ki Baruk ne sikritari. Piru inggeles key te Magbebaye ne Manama.

27 Pegkapenga silabi ni Hari Huwakim ka eglulunen ne baseen ne impasulat ku ki Baruk, impanengneng ad te Magbebaye ne Manama, 28 “Kuwa ka te lein ne eglulunen ne sulatanan wey isulat nu ka langun ne nakasulat diye te an-anayan ne eglulunen ne baseen ne insilaban ni Huwakim ne Hari te Huda. 29 Ne kahii nu naa ka Hari te migkahi a se Magbebaye ne Manama, ‘Insilaban nu ka eglulunen ne baseen su nasulat dutu ne egdereetan iya te Hari te Babilunya ka seini ne inged, wey egpangimatayan din ka me etew wey me mananap. 30 Purisu eglalahan ku sikeykew Huwakim ne Hari te Huda: Ware kabuhalan nu ne eghari te migharian ni Dabid. Eggimatayan ka wey igdegpak e ka lawa nu. Egkarampil seini ke maaldew wey egkaremmuhan ke marusilem. 31 Eglegparan ku sikeykew wey ka me kabuhalan nu, lagkes ka me upisyal nu tenged te me sale niyu. Ne igpasalerep kud sikaniyu wey ka keet-etawan te Hirusalim wey Huda te langun ne karereetan ne inlalag ku ne igpasalerep ku kaniyu, su ware kew ma migpammineg keddiey.’ ”

32 Ne migkuwa ad te lein ne eglulunen ne sulatanan wey imbehey kud seini ki Baruk. Ne insulat din e man‑e ka langun ne inlalag ku kandin, iling ded te langun ne nakasulat diye te an-anayan ne baseen ne insilaban ni Hari Huwakim. Ne masulug ka nakatimul ne me lalag ne iling ded te newun‑a.