1 Ne migpakiglalag keddiey ka Magbebaye ne Manama meyitenged te me Israilita ne mig-ugpe diye te Ihiptu, diye te siyudad te Migdul, Tapanis, Mimpis, wey diye te inged ne Patrus. 2 Migkahi ka Amana ne Maresen ne Magbebaye, “Nakita niyu ka langun ne karereetan ne impeula-ula ku te Hirusalim, wey te langun ne siyudad te Huda. Nagguhus e seini taman kuntee, wey warad e mig-ugpe. 3 Inggimu ku seini tenged te maddeet ne hinimuwan dan. Impeyibelu e red iya nikandan te pegtutung dan te insinsu wey te pegsimba ran te me diyus-diyus ne ware dan neileyi minsan te me kaap-apuan dan. 4 Impeuyanan ku sikaniyu layun te me suluhuanen ku ne me prupita ne migpaney-paney kaniyu ne kene eggimu te mallindit wey te igkatameneng ku ne me himu! 5 Piru ware kew en iya migpammineg wey ke miglinga-linga naa kandan. Ware kew mig-engked ka egtutung te insinsu para te me diyus-diyus. 6 Purisu impeula-ula kud kaniyu ka egmangebel-ebel ne langet ku. Ne nekeiling e seini te hapuy ne nakasilab te me lungsud te Huda, wey te me deralanen te Hirusalim, wey natamtamanan e seini nareeti taman kuntee.”

7 Ne migpabulus ka Amana ne Maresen ne Magbebaye, ka Manama te Israil ne migkahi, “Mania te egtamtamanan niyu iya mule egdereeti ka pegkeetew niyu? Egkeupian kew buwa iya ne egkaamin e ka keet-etawan te Huda? Ka me lukes, me malitan, me bate, wey ka egsusu pad? 8 Mania te egpeyibeluen e red iya mule nikaniyu te pegtutung niyu te insinsu, wey te peghalad niyu te me diyus-diyus kayi te Ihiptu ne in-ugpaan niyu? Nasi niyu re iya egdereeti ka pegkeetew niyu tenged te me himu niyu. Egderali-dian kew te langun ne nasud kayi te ampew te tane, wey egdirilusen kew e. 9 Nalingawan niyu buwad ka langun ne maddeet ne inggimu niyu wey te me asawa niyu, te me kaap-apuan niyu, te me Hari te Huda wey te me asawa ran diye te me lungsud te Huda wey diye te me deralanen te Hirusalim? 10 Piru ware niyud iya ipariralem ka pegkeetew niyu taman kuntee, wey ware kew en iya migtahud keddiey. Ware niyu man‑e tumana ka balaud ku, wey ka me suhu ku kaniyu wey te me kaap-apuan niyu.

11 “Purisu sikeddiey ka Amana ne Maresen ne Magbebaye ne Manama, ka Manama te Israil ka egkahi ne andam ad ne egdereet kaniyu keet-etawan te Huda! 12 Ne sikaniyu se nasame diye te Huda ne egkeupian ne eggendiye te Ihiptu eyew diyad eg-ugpe, egpatey kew langun, inila ma wey se kene, egpatey iya te gira wey gutas diye te Ihiptu. Ne egderali-dian kew, igkengalindit, wey egdirilusen. 13 Eglegparan ku ka mig-ugpe diye te Ihiptu iling te peglegpad ku te me matig-Hirusalim pinaahi te gira, gutas, wey dalu 14 eyew warad iya egkasame kandan. Ne warad egpakalibed diye te Huda minsan pad ke egkeupian sikandan ne eglibed eg-ugpe diye, angin e te pila-pila ne egpakapallahuy.”

15 Ne due susuluhi ne etew ne miglibulung diye ne migpammineg keddiey—langun ne lukes ne nakataha te mighalad te insinsu ka me asawa ran diye te me diyus-diyus, wey nanasindeg ka langun ne malitan diye duma te langun ne Israilita ne mig-ugpe diye te inged ne Patrus. Migkahi sikandan, 16 “Meyitenged te inlalag nu kanami te ngaran te Magbebaye ne Manama, kene key egpalintutuu rue! 17 Eggimuwen ney ka langun ne insaad ney. Egtutung key te insinsu para te diyus-diyus ney ne Rayna te Langit, wey eghalad key te binu para kandin iling te inggimu ney wey te me kaap-apuan ney, me Hari ney, wey me pangulu ney diye te me lungsud te Huda, wey diye te me deralanen te Hirusalim. Te seeye ne timpu, matubung ka peg-ugpe ney. Dakel ka egkakeen ney, wey ware mareet ne neula-ula ney. 18 Piru te mig-engked key e ka egtutung te insinsu wey ka eghalad te binu para te Rayna te Langit, nasi e ne ware egkakeen ney wey masulug e ka migpatey te gira wey gutas.”

19 Ne migkahi pad man‑e ka me malitan, “Mig-uyun ka me asawa ney ne egpangimu key te me paan ne egpekeiling te Rayna te Langit, wey ke egtutung key naa te insinsu wey ke eghalad key naa te binu para kandin.”

20 Ne ingkahiyan ku ka langun ne etew ne miglalag keddi te iling dutu, 21 “Kahiyen niyu buwa ne ware nataheyi te Magbebaye ne sikaniyu, ka kaap-apuan niyu, ka me Hari niyu, ka me pangulu niyu, wey ka langun ne etew te mighalad kew te insinsu diye te me lungsud te Huda wey diye te deralanen te Hirusalim? 22 Warad nakapegnel ka Magbebaye ne Manama te mallindit ne hinimuwan niyu, sikan naa ka indereetan din e ka inged niyu iling te seini kuntee. 23 Neyitabu kaniyu ka seini se karereetan tenged su migtutung kew te insinsu, wey mareet ka hinimuwan niyu diye te Magbebaye. Ware kew migtuman te balaud din wey ke migtuman naa te me suhu din.”

24 Ne ingkahiyan ku ka me etew, “Pammineha niyu ka inlalag te Magbebaye kaniyu langun te me matig-Huda ne mig-ugpe te Ihiptu. 25 Seini ka inlalag te Amana ne Maresen ne Magbebaye ne Manama, ka Manama te Israil, ‘Intuman niyu iya wey te me asawa niyu ka insaad niyu ne egtutung kew te insinsu wey eghalad te binu te Rayna te Langit. Uya! Ipabulus niyu ka inggimu niyu wey tumana niyu iya ka insaad niyu.’ 26 Piru kuntee, pammineha niyu ka iglalag ku kaniyu te keet-etawan te Huda ne mig-ugpe te Ihiptu. Igpahunlibet ku te matulus ne ngaran ku ne kene kew e egpakapahunlibet te ngaran ku. 27 Kene ku igtuhut ne egmatubung kew, eglegparan ku iya sikaniyu. Egpatey kew langun te gira wey ke gutas naa taman te warad egkasame kaniyu. 28 Piru due pila-pila ne egpakapallahuy puun te Ihiptu peendiye te Huda. Egkataman ne egkatahaan dan e ke hentew ne lalag ka egkatuman, ka kandan naa wey ka keddiey. 29 Ne seini ka palinneu ne eglegparan ku iya sikaniyu kayi ne inged, wey egkanengnengan niyu ne egkatuman e ka karereetan ne inlalag ku kaniyu. 30  ✡ 2Har 25:1-7.Igbehey kud si Hupra ne Hari te Ihiptu diye te me kuntere din ne egkeupian ne eggimatey kandin, iling te pegbehey ku ki Sidikiyas ne Hari te Huda diye te kuntere din ne si Hari Nibukadnisar, ka Hari te Babilunya ne egkeupian ne eggimatey kandin.”