8
Ka tabak ni Bildad
1 Ne migtabak si Bildad ne matig-Suwa,
2 “Ken‑u ke pad egpeeneng-eneng ka egpanlalag te iling due?
Mahulub ke naan de iya
wey ware me karuan te egmanlalahen nu.
3 Kene egdereetan te Manama ka eleg ne peggukum.
Kene egbegkulen te Amana ne Maresen ke nekey ka meupiya.
4 Nakasale iya te Manama ka me anak nu,
purisu eleg iya ne eglegparan din sikandan.
5 Piru ke egpangananey ka te Maresen ne Manama,
wey egpeyid‑u-hid‑u ka kandin,
6 wey eg-ugpe ka ne matareng wey ware neyimu ne mareet,
egpamminehen ka nikandin wey egbulihan,
wey iglibed ded keykew ka ugpaan nu isip dasag nu.
7 Deisek de ka karatuan nu dengan
du te karatuan ne egginguma pad due te keykew.
8 “Panginsei nu ma ka me buyag,
ke nekey ka nenatuenan te me kaap-apuan dan.
9 Su mallepet de ka umul ta wey ware amana natuenan ta.
Egmanlihad ki re kayi te inged iling te alung ne mahaan de egkaawe.
10 Pammineha nu sikandan,
su egpanuluen ka nikandan puun te katuenan dan.
11 “Ka me hilamunen ne diye te weyig, kene egtubu diye te inged ne mammara,
ke kene, diye de iya degma egtubu te inged ne egkaweyihan.
12 Ke egkeetiyan ka weyig, sika ne me hilamunen ka hun‑a ne egkalanes minsan mangnguwed pad seini.
13 Iling degma due ka egtamanan te etew ne mig-inniyug te Manama.
Ware egkapallateng te etew ne ware migpalintutuu te Manama.
14 Malebud ka langun ne insalihan din,
egpekeiling de te baley te kalawe-lawe.
15 Egsandig sikandin te baley rin,
piru mahaan de seini egkapeled;
egpanggen-gen sikandin kayi,
piru kene seini egpakabulig.
16 Egpekeiling sikandin te pinamula ne imbisbisan wey insilaan te aldew,
wey migtunas seini ne nekeempet te pinamulaan,
17 wey migkampet ka me dalid kayi diye te me batuwen.
18 Piru ke egkabarut seini,
ware minsan hentew ne egpakakahi te due dengan seini migtubu.
19 Ne iling iya rue ka kahalaan te me makasesale, kene egkaluhey.
Ne due duma ne eglepew ne egsubal kandan.
20 “Piru kene egbalaharen te Manama ka etew ne ware igkarew‑ey,
wey kene din degma egpangabangan ka maddeet.
21 Egtuhutan din ne egpakangisi ka,
wey egpakapanguleyi tenged te kahale,* Te Hibruwanen: eggipenuen din ka be‑be nu te ngisi wey ka bibig nu te panguleyi te kahale.
22 piru egpeyilawan din ka egdumut keykew,
wey egdereetan din ka me ugpaan dan.”