31
Ka peg-alam ki Huswi isip liwan ki Muwisis
1 Ne migpabulus-bulus si Muwisis ka migkahi te me kabuhalan ni Israil, 2 ✡ Num 20:12.“120 e ka idad ku kuntee; kena ad e egpekeeleg ne egpangulu kaniyu. Ne ingkahiyan a te Magbebaye ne Manama ne kena a egkaayun ne eglapas te Hurdan. 3 Ka Magbebaye ne Manama niyu mismu ka eggun‑a kaniyu te eglapas te Hurdan. Egpangimatayan din ka me keet-etawan diye ke egpalinggumaan kew e, eyew egkaangken niyu ka tane dan. Ne si Huswi ka egpangulu kaniyu sumale te ingkahi te Magbebaye ne Manama. 4 ✡ Num 21:21-35.Egguleen te Magbebaye ne Manama ka seeye ne keet-etawan iling te inggimu rin engki Sihun wey Ug ne me Hari te me Amurihanen, wey te tane dan. 5 Igpatalu sikandan te Manama kaniyu, wey keilangan ne eggimuwen niyu diye te kandan ka langun ne igsuhu ku kaniyu. 6 Pakannekal kew wey bulut-bulut kew; kene kew kaaldek kandan su egdumaan kew te Magbebaye ne Manama niyu, wey kene kew nikandin egbalaharen wey ke eg-engkeran naa.”
7 Ne impeumew e ni Muwisis si Huswi, wey ingkahiyan din diye te tangkaan te me kabuhalan ni Israil, “Pakannekal ka wey bulut-bulut ka, su sikeykew ka egpangulu te keet-etawan peendiye te Inged ne Insaad te Magbebaye ne Manama ne igbehey te me kaap-apuan niyu, wey bulihi nu sikandan ne egkaangken dan seeye ne tane isip egkapanunud dan. 8 ✡ Huswi 1:5; Hib 13:5.Egdumaan ka te Magbebaye ne Manama; kene ka nikandin egbalaharen wey ke eg-engkeran naa. Purisu kene ka kaaldek.”
Ka pegbasa te Balaud tagse pitu ne leg‑un
9 Insulat ni Muwisis ka seini ne me Balaud te Manama, wey imbehey rin e diye te me talagpanubad ne me kabuhalan ni Libi, ne iyan impiyalan ne eg-uyan te Tahuanan te Kasabutan te Magbebaye ne Manama, wey diye degma te me igdatu te me kabuhalan ni Israil. 10 ✡ Diy 15:1-2; Diy 16:13-15.Ne impanpanayan ni Muwisis ka me talagpanubad wey me Libita te egkahi, “Te katamanan te tagse pitu ne leg‑un ne iyan ka leg‑un ne Kenad e Egsukuten ka me Utang, 11 basaa niyu ka seini ne me Balaud te timpu te Sahakeen te me Leeb diye te tangkaan te me kabuhalan ni Israil te timpu ne eglibulung sikandan diye te tangkaan te Magbebaye ne Manama niyu, diye te inged ne eg-alamen din. 12 Palibulunga niyu ka keet-etawan—ka me lukes, me malitan, me bate, wey ka me lapu ne nangugpe te me lungsud niyu, eyew egpakarineg sikandan langun te Balaud, wey egkateu ne egtahud te Magbebaye ne Manama niyu, wey mapahetpet ne egtuman te me Balaud din. 13 Te sika ne paahi, ka me kabuhalan niyu ne ware pad nakarineg te Balaud te Magbebaye ne Manama, egpakarineg e kayi. Ne egkateu e sikandan ne egtahud te Magbebaye ne Manama taheed te egmangugpe sikandan diye te tane ne mahaan niyud eg-angkena, ne diye te talipag te Hurdan.”
Ka katamanan ne suhu ki Muwisis
14 Ne ingkahiyan te Magbebaye ne Manama si Muwisis, “Mahaan kad egpatey. Purisu ipeumew nu si Huswi, wey parumeey kew diye te Balungbalung ne Temuwanan su egpanuluen ku sikandin te eggimuwen din.”
Purisu migparumeey e si Muwisis wey si Huswi diye te Balungbalung ne Temuwanan. 15 Ne migpapitew kandan ka Magbebaye ne Manama ne migpabaluy ne gapun ne egpekeiling te sungkaleg ne migsasindeg diye te gumawan te Balungbalung ne Temuwanan.
16 Ne ingkahiyan te Magbebaye ne Manama si Muwisis, “Ke egpatey kad e, egsimbe e seini ne me etew te me manama ne insimba te keet-etawan diye te tane ne eggendiyaan dan; eg-inniyuhan ad nikandan, wey egsupaken dan e ka kasabutan ne inggimu ku duma kandan. 17 Ke egkeyitabu sika, egkanlabkanlab ka langet ku kandan. Ne eg-engkeran ku sikandan, wey kene kud eg-ileen ne keet-etawan ku. Ne egpakasalerep e sikandan te mangune-kune ne karereetan wey me peg-antus. Ne egpakakahi e sikandan te, ‘Kema ke iyan egpuunan ne neyitabu seini kanta su in-engkeran kid Manama?’ 18 Ne kene ku iya sikandan egpangabangan su in-engkeran e ma nikandan pinaahi te pegsimba ran te lein ne me manama. 19 Purisu isulat nu seini ne ulahingen, wey ipanulu nu te me kabuhalan ni Israil, eyew egkasuman-suman a nikandan, wey ware aliddanan dan eyew egsupak keddi. 20 Eg-uyanen ku sikandan diye te meupiya ne tane wey dakel se eg-uma,* Te Hibruwanen: tane ne egtulayasan te gatas wey teneb. sumale te insaad ku te me kaap-apuan dan. Ne emun ke egmatubung e sikandan diye, wey egkakeen dan e ka minsan nekey ne igkeibeg dan te egkeen, wey egkengabulung sikandan, wey egmanlambeg, egsupaken dan e ka kasabutan ku. Egsamsamilian ad nikandan, wey eg-engkeran; iyan dan e egsimbeen ka lein ne me manama. 21 Ne emun ke egpakasalerep e sikandan te mangune-kune ne karereetan wey me peg-antus, ka seini naa ne ulahingen ka egpasuman-suman kandan su kene ma seini egkalingawan te me kabuhalan dan. Nakanengneng a te suman-suman dan kuntee, minsan ware ku pad sikandan uyana diye te Inged ne Insaad ku ne igbehey kandan.”
22 Purisu te seeye de ne aldew, insulat e ni Muwisis ka ulahingen, wey impanulu din e seini te me kabuhalan ni Israil.
23 ✡ Num 27:23; San 1:6.Ne ingkahiyan te Magbebaye ne Manama si Huswi ne anak ni Nun, “Pakannekal ka wey bulut-bulut ka, su sikeykew ka eg-uyan te me kabuhalan ni Israil diye te Inged ne Insaad ku kandan, wey egdumaan ku sikeykew.”
24 Te neimpusan e ni Muwisis te egsulat ka langun ne Balaud, 25 impanpanayan din e ka me Libita ne iyan talag-uyan te Tahuanan te Kasabutan te Magbebaye ne Manama, ne migkahi sikandin, 26 “Uyana niyu seini se baseen te Balaud, wey itahu niyu diye te kakiliran te Tahuanan te Kasabutan te Magbebaye ne Manama niyu. Ne keilangan ne diye de iya seini isip kamalehetan ne nakanengneng kew te igpeyimu te Magbebaye ne Manama. 27 Nakanengneng a te pegkamasinupaken wey pegkamakehal te ulu niyu, su inhanggat niyu ma ka langet te Magbebaye ne Manama minsan manekal e pad kuntee duma kaniyu. Ne wey naam pa iya ke egpatey ad!” 28 Ne ingkahiyan din e man‑e ka me Libita, “Palibulunga niyu kayi te tangkaan ku ka langun ne pangulu te me kabuhalan niyu wey ka me upisyal su egguhuran ku sikandan te seini ne me suhu. Ne egdawiten ku isip me talagpamalehet meyitenged kayi ka langit wey tane. 29 Nakanengneng a ne emun ke egpatey ad, eggimu kew iya te mareet wey eg-engkeran niyud ka langun ne insuhu ku kaniyu. Ne egkalangetan e kaniyu ka Magbebaye ne Manama wey egpasalerepen kew nikandin te karereetan su inhanggat niyu ma ka langet din pinaahi te peggimu niyu te igkene kaniyu.”
30 Ne impanulu e ni Muwisis diye te me kabuhalan ni Israil ka seini ne ulahingen, puun te bunsuranan taman te neepus.