1  ✡ Hib 11:31; San 2:25.Ne migsuhu te heles de si Huswi ne anak ni Nun te daruwa ne tahasiliban ne egpuun te kampu te Sitim wey ingkahiyan din, “Pakannekali niyu te egnengneng ka inged te Kanaan, labi en iya ka Hiriku.” Sikan naa ka nangipanew e sikandan, wey te pegginguma ran e diye te Hiriku, diye sikandan migpamaneyik te baley te malitan ne egpamelegye te lawa ne egngaranan ki Rahab, wey diye sikandan miggirehe. 2 Piru nahuhuran ka Hari te Hiriku, “Due me lukes ne egpuun te kabuhalan ni Israil ne nakaseled kuntee ne marusilem kayi te inged ta eyew egsisilib.” 3 Ne impakahiyan te Hari te Hiriku si Rahab, “Keilangan ne igpalihawang nu ka migtuen te baley nu su miggendini sikandan ka egsisilib te intiru ne inged ta.”

4 Piru nekeeles e ni Rahab ka daruwa ne tahasiliban human nekeuma ka insuhu te Hari, migkahi sikandin, “Uya, malehet ne due miggendini keddiey ne me lukes, piru wara a nakataha ke hendei sikandan egpuun. 5 Te pegkamarusilem e, te mahaan e eglekebi ka gumawan te siyudad, nangipanew e sikandan wey wara ad nakataha ke hendeid e sikandan miggendiye. Lupuha niyu sikandan il-iyali su egkeumaan niyu pad sikandan.” 6 (Kunaleg te in-uyan bes ni Rahab ka me tahasiliban diye te atep te baley* Mapatag ka atep te me baley diye te Hiriku. rin wey imbunbunan din sikandan te me baluy.) 7 Sikan naa ka intalukunan ka me tahasiliban te me etew te Hari. Te peglihawang dan, inlekeban dan e ka gumawan te siyudad. Ne nekeuma sikandan taman diye te iglapas te Weyig ne Hurdan ka egpanalukun te me tahasiliban.

8 Te ware pad miglipereng ka me tahasiliban te seeye ne marusilem, migpamaneyik e man‑e si Rahab diye te atep eyew egpakiglalag kandan. 9 Ne migkahiyan din sikandan, “Nakataha a ne imbehey kaniyu te Magbebaye ne Manama ka seini ne inged, wey seini ka egpuunan ne naliyasan key kaniyu wey amana naaldek kaniyu ka langun ne mahinged kayi. 10  ✡ Iks 14:21; Num 21:21-35.Nakarineg key ke immenu te Magbebaye ne Manama te eg-eti ka Malalab ne Dahat te timpu te peglihawang niyu puun te Ihiptu. Nakarineg key degma ke immenu niyu te peggimatey ka daruwa ne Hari te Amurihanen ne si Sihun wey si Ug diye te igsile te Weyig ne Hurdan. 11 Te pegkarineg ney kayi, naawaan key langun te kabulut tenged kaniyu, su ka Magbebaye ne Manama niyu iyan iya ka Manama te langit wey te tane. 12 Purisu kuntee, pahunlibet kew keddi te ngaran te Magbebaye ne Manama, ne egpapitew kew te keupiya te pamilya ku iling te keupiya ne impapitew ku kaniyu, wey pamaleheti niyu ne egtumanen niyu seini. 13 Luwasa niyu ka amey ku, iney ku, me maama ku, me hari ku ne malitan, wey ka langun ne pamilya ran. Luwasa key nikaniyu ne kene key egkapatey.”

14 Ne ingkahiyan sikandin te daruwa ne tahasiliban, “Egpeyimatey key ke kene ney egkatuman ka ingkahi ney! Kene nu re iya degma igpanugtul ka pegsisilib ney kayi. Ne emun ke igbehey e kanami te Magbebaye ne Manama ka seini ne inged, igpapitew ney keykew ka keupiya ney wey egtumanen ney ka ingkahi ney keykew.”

15 Purisu intuntun sikandan ni Rahab diye te bintana pinaahi te lubid, puun su lenged ma te batu ne alad te siyudad ka baley rin. 16 Ne ingkahiyan din sikandan, “Pangendiye kew te bubungan su eyew kene kew egkakita te seeye se egmanalukun kaniyu. Heles kew diye te tatelu ne aldew taman te eglibed e sikandan. Egkataman, kaayun kew e ne egpabulus eg-uli.”

17 Ne ingkahiyan te daruwa ne tahasiliban si Rahab, “Kene key egkeyiketan te impepahunlibet nu kanami angin e ke egkatuman nu ka seini: 18 Te peglusud ney kayi te inged niyu, ihiket nu te bintana ka seini se malalab ne lubid ne inggamit nu te pegtuntun kanami. Ne libulunga nu kayi te baley nu ka amey nu, iney nu, me maama nu, wey ka langun ne pamilya nu. 19 Emun ke due eglihawang kayi te baley nu ne eggendiye te dalan wey egpatey sikandin, warad labet ney su seyyup din e sika. Piru emun ke eggilabetan ka diye te baley nu, sikanami ka egpanabak due. 20 Piru emun ke igwangal-wangal nu ka pegsisilib ney, kene ney egtumanen ka impepahunlibet nu kanami.” 21 Ne migtabak sikandin, “Uya, egtumanen ku ka ingkahi niyu.” Ne impeyipanew rin e sikandan. Te nekeyipanew e sikandan, inggiket din e ka malalab ne lubid diye te bintana din.

22 Ne miggendiye ka me tahasiliban te bubungan wey miggeles sikandan diye te tatelu ne aldew. Ne impamitew sikandan te seeye se egmanalukun kandan diye te langun ne deralanen, piru ware nakita sikandan purisu mig-uli e ka me etew te Hari. 23 Ne miglibed e ka daruwa ne tahasiliban. Migtupang sikandan te bubungan wey miglapas te weyig taman te nekeyingume e sikandan diye ki Huswi ne anak ni Nun. Ne ingguhud dan ki Huswi ka langun ne neyitabu. 24 Ingkahiyan dan si Huswi, “Malehet iya ne imbehey te Magbebaye ne Manama kanta ka intiru ne inged, wey timul pad due, nenaaldek kanta ka langun ne mahinged diye.”