1 Ne narineg ni Aduni-Sidik ne Hari te Hirusalim ka guhuren ne naahew ni Huswi ka Ay wey indereetan din iya seini, wey inggimatayan din ka Hari diye iling te inggimu rin te Hiriku wey te Hari diye. Ne narineg degma ni Aduni-Sidik ka guhuren ne migpakigsabeka ka me matig-Gibyun kandan, wey miglemung e kandan. 2 Naaldek amana sikandin, wey ka me mahinged te Hirusalim su natahaan din ne maresen ne siyudad ka Gibyun, wey due degma Hari kayi. Ne dakel pad seini te Ay, wey mabbulut ka me sundalu. 3 Sikan naa ka impabayaan ni Aduni-Sidik ne Hari te Hirusalim si Huham ne Hari te Hibrun, si Piram ne Hari te Harmut, si Hapya ne Hari te Lakis, wey si Dibir ne Hari te Iglun. 4 Ne impanagtahaan din sikandan te seini, “Hendini kew wey bulihi a; eglusuran ta ka Gibyun su migpakigsabeke e sikandan ki Huswi wey te me kabuhalan ni Israil.” 5 Purisu, migsabeka ka seini se lalimma ne Hari: ka Hari te Hirusalim, Hibrun, Harmut, Lakis wey Iglun. Ne inlibulung dan ka me sundalu ran wey inlusuran dan e ka Gibyun.

6 Ne impabayaan te me matig-Gibyun si Huswi diye te kampu ran diye te Gilgal, wey impakahiyan, “Kene key balahara nikeykew se me suluhuanen nu. Dagdahew kew hendini wey luwasa key nikaniyu. Bulihi key su migsabekaan key lusuri te langun ne Hari ne me Amurihanen ne nangugpe diye te me bubungan.” 7 Purisu, migligkat e puun te Gilgal si Huswi wey ka langun ne sundalu rin, lagkes seeye se langun ne me bahani. 8 Ne ingkahiyan te Magbebaye ne Manama si Huswi, “Kene ka kaaldek kandan, impatalu kud sikandan keykew. Ware minsan sabeka kandan ne egpakatalu keykew.”

9 Ne miggipanew puun te Gilgal si Huswi wey ka me duma rin te intiru ne marusilem, wey intigkew ran lusuri ka me kuntere dan. 10 Ne impaliyasan te Magbebaye ne Manama ka me kuntere te pegkakita ran te me kabuhalan ni Israil. Ne impangimatayan te me kabuhalan ni Israil ka me kuntere dan diye te Gibyun. Ne impanalukunan dan ka duma diye te dalan patakereg te bubungan te Bit-Hurun taman te Asika wey Makida. 11 Taheed te impanalukunan te me kabuhalan ni Israil ka me kuntere dan diye te Bit-Hurun peendiye te Asika, impeuranan e te Magbebaye ne Manama ka me kuntere dan te derakel ne me batu* Iling karakel seini te atelug te manuk. wey nammatey e sikandan. Masulug pad ka nammatey tenged te me batu du te neyimatayan te me kabuhalan ni Israil.

12 Ne mig-ampu si Huswi te Magbebaye ne Manama diye te tangkaan te me kabuhalan ni Israil, te timpu te impatalu te Magbebaye te me Israilita ka me Amunihanen. Miggenendue sikandin:

15 Nataman, miglibed e si Huswi wey ka langun ne me kabuhalan ni Israil diye te kampu ran te Gilgal.

16 Ne nakapallahuy ka lalimma ne Hari wey nekeeles sikandan diye te sulung te Makida. 17 Piru due nakakita ne nangeles sikandan diye te sulung, wey ingguhuran e si Huswi ke hendei sikandan nangeles. 18 Purisu, migkahi si Huswi, “Bunbuni niyu ka be‑be te sulung te derakel ne batu wey bantayi niyu seini. 19 Piru kene kew uugpe diye. Lupuha niyu ka me kuntere niyu wey pasampayi niyu sikandan eyew kene egpakalasud diye te siyudad dan. Su impatalu e sikandan te Magbebaye ne Manama niyu.” 20 Ne inggule pangimatayi ni Huswi wey te me kabuhalan ni Israil ka me kuntere dan. Piru due duma ne nakapallahuy wey nakaseled diye te me siyudad ne in-alad te matikang wey makepal ne batu. 21 Ne miglibed ka langun ne sundalu diye ki Huswi diye te kampu te Makida.

Puun te seeye ne timpu, warad egpaalag-alag ne eglelalis te me kabuhalan ni Israil.

22 Ne migkahi si Huswi, “Lukati niyu ka sulung wey uyana niyu kayi te keddi ka lalimma ne Hari.” 23 Purisu, impalihawang dan te sulung ka lalimma ne Hari: ka Hari te Hirusalim, Hibrun, Harmut, Lakis, wey Iglun. 24 Te diyad e te tangkaan ni Huswi ka lalimma ne Hari, inlibulung din e ka langun ne me pangulu te Israil wey ingkahiyan din ka me pangulu te me sundalu rin ne migduma kandin, “Hendini kew, wey dieki niyu ka lieg† Ka pegdiek te lieg te me kuntere igpakita ne natalu e ka me kuntere. te seini ne me Hari.” Sikan naa ka migparani sikandan wey indiekan dan ka lieg te me Hari. 25 Ne ingkahiyan sikandan ni Huswi, “Kene kew kaaldek wey ke egmahuye naa. Pakannekal kew wey kene kew duwa-ruwa su iling kayi ka eggimuwen te Magbebaye ne Manama diye te langun ne kuntere niyu.” 26 Ne nangimatayan ni Huswi ka lalimma ne Hari, wey imbitin din sikandan diye te lalimma ne me kayu, wey imbalahad din diye taman te naapunan. 27 Te peglineb e te aldew, impakuwe e ni Huswi ka me minatey wey imparegpak din diye te sulung ne inggelesan dan. Ne impabunbunan din te derakel ne me batu ka be‑be te sulung. Ne minsan kuntee, diye ded ka me batu.

28 Te seeye ded ne aldew, insakup ni Huswi ka Makida. Inggule din pangimatayi ka langun ne mahinged, lagkes ka Hari dan. Warad iya nasame ne neuyag. Ne inggimatayan ni Huswi ka Hari te Makida iling te inggimu rin te Hari te Hiriku.

29 Nataman, migligkat si Huswi wey ka langun ne me kabuhalan ni Israil diye te Makida wey migpabulus diye te Libna, wey inlusuran dan seeye. 30 Ne impatalu e man‑e te Magbebaye ne Manama te me kabuhalan ni Israil ka seeye ne siyudad wey ka Hari dan. Impangimatayan dan ka langun ne mahinged, wey warad iya nasame ne neuyag. Ne inggimatayan ni Huswi ka Hari te Libna iling te inggimu rin te Hari te Hiriku.

31 Nataman, migligkat e man‑e si Huswi wey ka langun ne me kabuhalan ni Israil diye te Libna wey migpabulus diye te Lakis. Ne inlingutan dan seini wey inlusuran dan. 32 Ne impatalu te Magbebaye ne Manama te me kabuhalan ni Israil ka Lakis te igkarangeb ne aldew te gira. Ne impangimatayan dan ka langun ne mahinged te Lakis iling te inggimu ran diye te Libna. 33 Te sasangan pad sikandan ne eglusud te Lakis, migginguma si Huram ne Hari te Gisir wey ka me sundalu rin ka egpangabang te Lakis. Piru natalu red sikandan ni Huswi, wey impangimatayan sikandan langun.

34 Nataman, migligkat e man‑e si Huswi wey ka langun ne me kabuhalan ni Israil diye te Lakis wey migpabulus diye te Iglun. Ne inlingutan dan seini wey inlusuran dan. 35 Te seeye ne aldew, nasakup dan ka Iglun wey inggule dan pangimatayi ka langun ne mahinged diye iling te inggimu ran diye te Lakis.

36 Nataman, migligkat e man‑e si Huswi wey ka langun ne me kabuhalan ni Israil diye te Iglun wey migpabulus diye te Hibrun wey inlusuran dan seini. 37 Ne in-ahew ran ka siyudad, wey inggimatayan dan ka Hari wey ka langun ne mahinged kayi. Ne inlagkes dan pangimatayi ka me mahinged te nakalingut ne me siyudad. Ne warad iya nasame ne neuyag. Indereetan dan iya ka intiru ne siyudad iling te inggimu ran diye te Iglun.

38 Nataman, miggendiye si Huswi wey ka langun ne me kabuhalan ni Israil diye te Dibir, wey inlusuran dan seini. 39 Ne in-ahew ran ka siyudad wey ka Hari kayi lagkes ka langun ne lungsud ne nakalingut kayi. Inggimatayan dan ka langun ne mahinged diye. Ne warad iya nasame ne neuyag. Ne ke nekey ka inggimu ran diye te Hibrun wey te Libna wey te me Hari diye, sikan ded degma ka inggimu ran diye te Dibir wey te Hari kayi.

40 Insakup ni Huswi ka intiru ne inged: ka me bubungan, ka inged te Nigib, ka me napu diye te iglineb, ka inged diye te me kalandihan wey ka me Hari te seeye ne me inged. Inggule pangimatayi ni Huswi ka langun ne mahinged diye, wey warad iya neuyag ne nasame. Inggimu ran seini su intuman dan ka insuhu te Magbebaye ne Manama, ka Manama te Israil. 41 Indereetan ni Huswi ka me inged puun te Kadis-Barniya taman diye te Gasa, wey puun te intiru ne inged te Gusin taman diye te Gibyun. 42 Ne nasakup ni Huswi ka seeye ne me inged wey ka me Hari kayi te kasabeka re ne peglusud, puun su imbulihan ma sikandan te Magbebaye ne Manama te pegpakiggira ran. 43 Nataman, miglibed e si Huswi wey ka langun ne me pangulu te Israil diye te kampu ran diye te Gilgal.