1 Te narineg ni Habin ne Hari te Hasur ka guhuren ne migpanalu ka me kabuhalan ni Israil, migpanahe e sikandin te me Hari ne ensi Hubab ne Hari te Madun, me Hari te Simrun wey te Aksap, 2 me Hari diye te bubungan ne diye te igkahibang ne balabahan te igsile, me Hari diye te napu te Hurdan ne diye te igkakawanan ne balabahan te Lanew ne Galiliya,* Te Hibruwanen: igkakawanan ne balabahan te igsile te Kinirut. me Hari diye te me napu, wey me Hari diye te ilis te Dur te iglineb. 3 Ne impataha rin man‑e ka me Hari te me Kanaanen diye te igsile wey iglineb te Weyig ne Hurdan, ka me Hari te me Amurihanen, ka me Hari te me Hitihanen, ka me Hari te me Pirisihanen, ka me Hari te me Hibusihanen ne nangugpe diye te me bubungan, wey ka me Hari te me Hibihanen ne nangugpe diye te diralem te Bubungan ne Hirmun diye te inged te Mispa. 4 Ne nanginguma ka seeye ne me Hari lagkes ka me sundalu ran, ne iling sikandan kasulug te lelanek ne diye te ilis te dahat. Ne amana ne masulug ka me kudde dan wey me karwahi ran. 5 Nasabeka ka seeye ne me Hari wey migkekampu sikandan diye te ilis te Weyig ne Mirum eyew egpakiggira te me kabuhalan ni Israil.

6 Ne ingkahiyan te Magbebaye ne Manama si Huswi, “Kene ka kaaldek su igpatalu ku sikandan keykew kaaselem iling te seini ne uras. Lepui niyu ka me kudde dan, wey silabi niyu ka me karwahi ran.” 7 Sikan naa ka intigkew lusuri ni Huswi wey te me sundalu rin ka me kuntere dan diye te Weyig ne Mirum. 8 Ne impatalu te Magbebaye ne Manama te me kabuhalan ni Israil ka me kuntere dan. Impanalukunan dan ka me kuntere dan taman diye te Mabantug ne Sidun wey Misriput-Maim taman diye te napu te Mispa te igsile. Ne inggule dan pangimatayi ka me kuntere dan. 9 Inggimu ni Huswi kandan ka impeyimu te Magbebaye ne Manama. Impanlepuan din ka me kudde dan wey impanilaban din ka me karwahi ran.

10 Nataman, miggendiyad si Huswi wey ka me duma rin wey in-ahew ran ka Hasur, wey inggimatayan dan ka Hari kayi. Te seeye ne timpu, iyan maresen ne inged ka Hasur te langun ne migharian. 11 Inggule dan degma pangimatayi ka langun ne mahinged te Hasur, ne warad iya neuyag ne nasame. Ne insilaban dan ka siyudad.

12 Ne naahew ni Huswi ka langun ne siyudad. Inggule dan pangimatayi ka langun ne mahinged lagkes ka me Hari diye. Neyitabu seini pinaahi te suhu ni Muwisis ne suluhuanen te Magbebaye ne Manama. 13 Piru ware panilabi te me kabuhalan ni Israil ka me siyudad ne diye neyimu te nahuhus ne me siyudad, angin e te Hasur ne insilaban mule ni Huswi. 14 Impanguwa te me kabuhalan ni Israil ka langun ne kasangkapan wey me ayam te seeye ne me siyudad. Piru inggule dan pangimatayi ka langun ne mahinged diye, wey warad iya neuyag ne nasame. 15 Seeye ka insuhu te Magbebaye ne Manama ki Muwisis, wey insuhu din e degma ki Huswi. Ne intuman ni Huswi ka langun ne insuhu te Magbebaye ne Manama ki Muwisis.

16 Naahew ni Huswi ka intiru ne inged: ka me bubungan, ka intiru ne inged te Nigib, ka intiru ne inged te Gusin, ka me napu diye te iglineb, ka bangalug te Hurdan, ka me bubungan wey napu te Israil. 17-18 Ka inged ne nasakup te me kabuhalan ni Israil, migbunsud te bubungan te Halak patakereg te Siir taman diye te Baal-Gad. Diye seini te napu te Libanun ne diye te lenlen te Bubungan ne Hirmun. Naluhey ka pegpakiggira ni Huswi te me Hari te seini ne me inged. Impandakep ni Huswi ka me Hari te seeye ne me inged, wey impangimatayan din sikandan. 19 Ne warad siyudad ne migpakigsabeka te me kabuhalan ni Israil angin e te me Hibihanen ne mig-ugpe diye te Gibyun. Ne natalu te me kabuhalan ni Israil ka langun te pegpakiggira ran. 20  ✡ Diy 7:16.Tenged su impakehal te Magbebaye ne Manama ka ulu† Te Hibruwanen: pusung. te me kuntere dan eyew egpakiggira kandan. Ne te seini ne paahi, inggule dan pangimatayi ka me kuntere dan te ware pegkeyid‑u sumale te insuhu te Magbebaye ne Manama ki Muwisis.

21 Te seeye ded ne timpu, inlusuran ni Huswi ka me Anakanhen ne nangugpe diye te me bubungan te Hibrun, Dibir, Anab, wey langun ne bubungan te Huda wey te Israil. Indereetan en iya sikandan ni Huswi, wey ka me siyudad dan. 22 Ne warad nasame ne me Anakanhen diye te inged te me kabuhalan ni Israil, piru duen pad duma ne nasame diye te Gasa, Gat, wey Asdud.

23 Naahew ni Huswi ka intiru ne inged sumale te insuhu te Magbebaye ne Manama ki Muwisis. Ne impamehey seini ni Huswi diye te me kabuhalan ni Israil isip karatuan ne inggaat kandan, wey imbaad-baad dan seini diye te tagse tribu.

Te seeye ne timpu, warad e samuk te seeye ne inged.