1 Seini ka me inged ne naangken te me kabuhalan ni Huda, ne imbaad-baad diye te tagse pamilya:

Nekeuma seini taman diye te katamanan te inged ne Idum peendiye te igkakawanan ne balabahan te igsile te Sin ne disirtu. 2 Ne ka katamanan te seeye ne eletanan, migbunsud diye te igkakawanan ne balabahan te igsile te Namatey ne Dahat, 3 peendiye te igkakawanan ne balabahan te takerehen te Akrabim taman diye te Sin ne mammara ne inged ne kene egkeugpaan. Nekeuma pad seini diye te igkakawanan ne balabahan te igsile te Kadis-Barniya, peendiye te Hisrun, patakereg diye te Adar. Ne nakatiku seini peendiye te Karka. 4 Ne nekeuma seini diye te Asmun, nakalurug te weyig te Ihiptu, wey nakatuhun seini diye te Dahat ne Miditiranyu. Seeye ka eletanan te Huda diye te igkakawanan ne balabahan te igsile.

5 Ka eletanan te igsile, iyan ka Namatey ne Dahat taman diye te be‑be te Weyig ne Hurdan.

Ka eletanan te igkahibang ne balabahan, migbunsud diye te ilis te Namatey ne Dahat ne diye te iglepew te Weyig ne Hurdan. 6 Nakatakereg seini diye te Bit-Hugla, wey nekeendiye te igkahibang ne balabahan te Bit-Araba taman diye te Batu ni Buhan ne anak ni Rubin. 7 Ne puun diye, nekeuma seini diye te bangalug ne egngaranan te Akur, peendiye te Dibir, nakatiku seini diye te igkahibang ne balabahan te igsile, peendiye te Gilgal ne egpakatangke te Adunim ne diye te igkakawanan ne balabahan te igsile te napu. Ne nekeuma seini diye te sebseb te In-Simis, wey diye te In-Rugil. 8 Ne puun diye, nekeuma pad man‑e seini diye te napu te Binhinum peendiye te kalandihan te igkakawanan ne balabahan te igsile ne siyudad te me Hibusihanen, ne iyan ka siyudad ne Hirusalim. Ne nekeuma seini diye te puntul te bubungan, diye te iglineb te napu te Hinum, diye te katamanan te igkahibang ne balabahan te napu te Ripaim. 9 Ne puun diye, nekeuma seini diye te Sebseb te Niptuwa, peendiye te me siyudad ne marani te bubungan te Iprun. Ne puun diye, nakatupang te Baala, ne iyan ka Kiryat-Hiyarim. 10 Ne nakatiku seini diye te iglineb te Baala peendiye te Bubungan ne Siir. Ne nakatupang seini diye te tuhal te Bubungan ne Hiyarim, ne iyan ka Kisalun. Ne nakatupang seini diye te Bit-Simis wey nakalihad pad te Timna. 11 Ne puun diye, nakapabulus man‑e seini diye te igkahibang ne balabahan te igsile te tuhal te Ikrun, wey nakatiku seini diye te Sikirun. Ne nakalihad pad seini diye te Bubungan ne Baala taman diye te Habnil, wey diye seini nataman te Dahat ne Miditiranyu. 12 Ne diye te iglineb, iyan ded man‑e eletanan ka Dahat ne Miditiranyu.

Seeye ka me eletanan te naangken ne inged te me kabuhalan ni Huda, ne imbaad-baad dan seini diye te tagse pamilya.

13  ✡ Tal 1:20.Ne insuhu te Magbebaye ne Manama si Huswi ne egpabehayan te inged si Kalib ne anak ni Hipuni, puun te inged ne naangken te me kabuhalan ni Huda. Seini ne inged iyan ka Kiryat-Arba ne iyan ka Hibrun. Ingngaran seini ki Arba ne amey ni Anak. 14 Indeldel ni Kalib puun dutu ne inged ka tatelu ne kabuhalan ni Anak: ka me pamilya ni Sisay, ni Ahiman, wey ni Talmay. 15 Puun diye, migpakiggira pad man‑e ensi Kalib te me mahinged te Dibir. Iyan dengan ngaran te Dibir ka Kiryat-Sipir. 16 Ne migkahi si Kalib, “Igpaasawa ku ka anak ku ne mengebay ne si Aksa, te etew ne eglusud wey egpakaahew te Kiryat-Sipir.” 17 Ne iyan nakaahew dutu si Utnil ne anak ni Kinis ne hari ni Kalib. Sikan naa ka impaasawa rin e ka anak din ne si Aksa ki Utnil. 18 Te nekeg-asawe e sikandan, imbanasalan ni Utnil si Aksa ne egpabuyuen te kamet diye te amey rin. Purisu, miggendiye si Aksa ki Kalib, wey te nakalegsad e sikandin te asnu rin, mig-insaan e sikandin ni Kalib, “Nekey‑a ka innendini nu?” 19 Ne migtabak sikandin, “Egbuyu a te duma ne dasag su ka imbehey nu keddi ne tane diye te Nigib, ware weyig.” Purisu, imbehayan sikandin ni Kalib te me sebseb ne diye te dibabew wey diye te diralem te inged te Nigib.

20 Seini ka me siyudad ne karatuan ne inggaat te me kabuhalan ni Huda ne imbaad-baad dan diye te tagse pamilya, 21 ka me siyudad ne diye te igkakawanan ne balabahan te igsile ne diye te katamanan te Nigib ne marani te eletanan te Idum: ka Kabsil, ka Idir, ka Hagur, 22 ka Kina, ka Dimuna, ka Adada, 23 ka Kidis, ka Hasur, ka Itnan, 24 ka Sip, ka Tilim, ka Bi-Alut, 25 ka Hasur-Hadata, ka Kiryut-Hisrun ne iyan ka Hasur, 26 ka Amam, ka Sima, ka Mulada, 27 ka Hasar-Gada, ka Hismun, ka Bit-Pilit, 28 ka Hasar-Suwal, ka Birsiba, ka Bisyutiya, 29 ka Baala, ka Iyim, ka Isim, 30 ka Iltulad, ka Kisil, ka Hurma, 31 ka Siklag, ka Madmana, ka Sansana, 32 ka Libaut, ka Silim, ka Ayin, wey ka Rimun. Migginguma ka langun ne me siyudad te daruwa ne pulu wey siyam (29) lagkes ka me lungsud ne nakalingut kayi.

33 Ne naangken dan degma ka me siyudad ne diye te napu diye te iglineb ne iyan ka Istaul, ka Sura, ka Asna, 34 ka Sanuwa, ka In-Ganim, ka Tapuwa, ka Inam, 35 ka Harmut, ka Adulam, ka Suku, ka Asika, 36 ka Sa-Araim, ka Aditaim, ka Gidira, wey ke Gidirutaim. Migginguma ka langun ne me siyudad te sapulu wey hep‑at (14) lagkes ka me lungsud ne nakalingut kayi.

37 Nalagkes degma ka Sinan, ka Hadasa, ka Migdal-Gad, 38 ka Dilyan, ka Mispi, ka Huktil, 39 ka Lakis, ka Buskat, ka Iglun, 40 ka Kabun, ka Lamam, ka Kitlis, 41 ka Gidirut, ka Bit-Dagun, ka Naama, wey ka Makida. Migginguma ka langun ne me siyudad te sapulu wey hen‑em (16) lagkes ka me lungsud ne nakalingut kayi.

42 Naangken dan man‑e ka Libna, ka Itir, ka Asan, 43 ka Ipta, ka Asna, ka Nisib, 44 ka Kila, ka Aksib, wey ka Marisa. Migginguma ka langun ne me siyudad te siyam lagkes ka me lungsud ne nakalingut kayi.

45 Nalagkes degma ka Ikrun wey ka me siyudad, wey ka me lungsud ne nakalingut kayi, 46 wey ka langun ne siyudad wey me lungsud ne marani te Asdud puun te Ikrun peendiye te Dahat ne Miditiranyu.

47 Nalagkes degma ka Asdud, wey Gasa, wey lagkes kayi ka me siyudad dan wey me lungsud dan peendiye te Weyig te eletanan te Ihiptu, wey peendiye te ilis te Dahat ne Miditiranyu.

48 Ne naangken dan man‑e ka me siyudad diye te me bubungan ne iyan ka Samir, ka Hatir, ka Suku, 49 ka Dana, ka Kiryat-Sana ne iyan ka Dibir, 50 ka Anab, ka Istimu, ka Anim, 51 ka Gusin, ka Hulun, wey ka Gilu. Migginguma ka langun ne me siyudad te sapulu wey sabeka (11) lagkes ka me lungsud kayi.

52 Nalagkes degma ka Arab, ka Duma, ka Isan, 53 ka Hanim, ka Bit-Tapuwa, ka Apika, 54 ka Humta, ka Kiryat-Arba ne iyan ka Hibrun, wey ka Siyur. Migginguma ka langun ne me siyudad te siyam lagkes ka me lungsud kayi.

55 Naangken dan man‑e ka Maun, ka Karmil, ka Sip, ka Huta, 56 ka Hisril, ka Hukdi-Am, ka Sanuwa, 57 ka Kain, ka Gibiya, wey ka Timna. Migginguma ka langun ne me siyudad te sapulu lagkes ka me lungsud kayi.

58 Naangken dan man‑e ka Halhul, ka Bit-Sur, ka Gidur, 59 ka Maarat, ka Bit-Anut, wey ka Iltikun. Migginguma ka langun ne me siyudad te hen‑em lagkes ka me lungsud kayi.

60 Naangken dan man‑e ka Kiryat-Baal ne iyan ka Kiryat-Hiyarim, wey ka Raba. Migginguma ka langun ne me siyudad te daruwa lagkes ka me lungsud kayi.

61 Ne naangken dan man‑e ka me siyudad ne diye te disirtu, ne iyan ka Bit-Araba, ka Midin, ka Sikaka, 62 ka Nibsan, ka siyudad te Asin, wey ka In-Gidi. Migginguma ka langun ne me siyudad te hen‑em lagkes ka me lungsud kayi.

63  ✡ Tal 1:21; 2Sam 5:6; 1Kru 11:4.Piru ware nadeldel te me kabuhalan ni Huda ka me Hibusihanen ne nangugpe diye te Hirusalim. Sikan naa ka minsan kuntee, mig-ugpe ded sikandan duma te me matig-Huda.