1 Te migpatey e si Huswi, mig-inse ka me Israilita diye te Magbebaye ne Manama ne miggenendue, “Hentew‑a kanami ka eggun‑a ne eggira te me matig-Kanaan?” 2 Ne migtabak ka Magbebaye ne Manama, “Iyan eggun‑a ka me sundalu te me kabuhalan ni Huda su imbehey kud kandan ka tane.”

3 Ne ingkahiyan te me sundalu te me kabuhalan ni Huda ka me sundalu te me kabuhalan ni Simyun ne me karumaan dan, “Dumeyi key diye te tane ne intahahe kanami, wey egsabeka ki ka egkuntere te me matig-Kanaan. Ne egdumaan ney degma sikaniyu diye te intahahe ne tane para kaniyu.” Purisu indumaan sikandan te me sundalu te me kabuhalan ni Simyun. 4 Sikan naa, te peglusud te me sundalu ne me kabuhalan ni Huda wey ni Simyun, impatalu e te Magbebaye ne Manama kandan ka me matig-Kanaan wey ka me matig-Piris, wey natalu ran ka sapulu ne libu (10,000) ne etew diye te Bisik. 5 Ne neumaan dan si Adunibisik diye wey migpahiggireey sikandan, wey natalu te me sundalu te me kabuhalan ni Huda ka me matig-Kanaan wey me matig-Piris. 6 Ne migpallahuy si Adunibisik, piru inlupug sikandin te me sundalu te me kabuhalan ni Huda, wey narakep dan sikandin. Ne impanempug dan ka me timbebakal te belad din wey te paa rin. 7 Ne migkahi si Adunibisik, “Insulian ad te Manama te inggimu ku te pitu ne pulu (70) ne me Hari ne impanempuhan ku te me timbebakal te belad dan wey te paa ran wey impepamurut ku te mummu diye te diralem te lamisa ku.” Ne in-uyan dan sikandin diye te Hirusalim wey diyad e sikandin migpatey.

8 Ne inlusuran te me kabuhalan ni Huda ka Hirusalim wey naahew ran seini. Impangimatayan dan ka me mahinged wey insilaban dan ka siyudad. 9 Nataman, migpakiggire e man‑e ka me kabuhalan ni Huda te me matig-Kanaan ne mig-ugpe diye te me bubungan, diye te inged te Nigib, wey diye te me napu dapit te iglineb. 10 Ne migpakiggira pad man‑e ka me kabuhalan ni Huda te me matig-Kanaan ne diye mig-ugpe te siyudad te Hibrun (Kiryat-Arba dengan ka ngaran te Hibrun). Natalu ran ka me pangulu ne ensi Sisay, si Ahiman wey si Talmay.

11 Puun diye, migpakiggira pad man‑e sikandan te me mahinged te Dibir. (Kiriyat-Sipir dengan ka ngaran te Dibir.) 12 Ne migkahi si Kalib, “Igpaasawa ku ka anak ku ne mengebay ne si Aksa, te etew ne eglusud wey egpakaahew te Kiriyat-Sipir.” 13 Iyan nakaahew dutu si Utnil ne anak ni Kinis ne hari ni Kalib. Sikan naa ka impaasawe e ni Kalib ki Utnil ka mengebay ne anak din ne si Aksa. 14 Te nekeg-asawe e sikandan, imbanasalan ni Utnil si Aksa ne egpabuyuen te kamet diye te amey rin. Purisu miggendiye si Aksa ki Kalib, wey te nakalegsad e sikandin te asnu rin, mig-insaan e sikandin ni Kalib, “Nekey‑a ka innendini nu?” 15 Ne migtabak si Aksa, “Egbuyu a te duma ne dasag su ka imbehey nu keddi ne tane diye te inged te Nigib, ware weyig.” Purisu, imbehayan sikandin ni Kalib te me sebseb ne diye te dibabew wey diye te diralem te Nigib.

16 Ne due me Kinihanen ne me kabuhalan te anuhang dengan ni Muwisis. Migduma sikandan te kabuhalan ni Huda wey miggendiye sikandan te siyudad te me Palmira ne diye te disirtu diye te Huda. Ka seeye ne inged, diye te inged te Nigib ne marani te Arad, wey miglemung sikandan te me mahinged diye. 17 Ne migduma ka me kabuhalan ni Huda te me kabuhalan ni Simyun ne miglusud te me matig-Kanaan ne mahinged diye te Sipat. Ne ingguhus dan ka siyudad, sikan naa ka ingngaranan e ka siyudad te Hurma.* Iyan igpasabut te lalag ne Hurma ka impatamtamanan te egguhus. 18 Naahew degma te kabuhalan ni Huda ka intiru ne sakup te Gasa, Askalun wey te Ikrun. 19 Ne migdumaan te Magbebaye ne Manama ka kabuhalan ni Huda, wey naahew ran ka me bubungan. Piru ware dan narelrel ka me mahinged diye te napu, su due me karwahi ran ne putew. 20  ✡ Huswi 15:13-14.Ne imbehey ki Kalib ka Hibrun su sika ka inlalag ni Muwisis. Ne indeldel rin ka tatelu ne anak ni Anak ne nangugpe diye. 21  ✡ Huswi 15:63; 2Sam 5:6; 1Kru 11:4.Piru ware narelrel te kabuhalan ni Binhamin ka me Hibusihanen ne diye nangugpe te Hirusalim. Sikan naa ka minsan kuntee miglemung ded mig-ugpe ka me Hibusihanen te kabuhalan ni Binhamin diye te Hirusalim.

22 Ne inlusuran te kabuhalan ni Husi ka Bitil, wey indumaan sikandan te Magbebaye ne Manama. 23 Ne migsuhu sikandan te me talag-iipat diye te Bitil. (Lus dengan ka ngaran te Bitil.) 24 Ne nakakita ka me talag-iipat te etew ne miglihawang puun te siyudad wey migkahiyan dan sikandin, “Panulua key ke egmenuwen te egseled te siyudad, eg-unahan ney re sikeykew.” 25 Ne impanulu din sikandan ke egmenuwen te egseled te siyudad, wey impangimatayan dan ka me mahinged diye te siyudad piru impalihawang dan ka seeye ne etew duma te langun ne pamilya rin. 26 Ne miggendiye ka seeye ne etew te tane te me Hitihanen, wey migpasasindeg sikandin te sabeka ne siyudad wey ingngaranan din te Lus, ne seeye ded ka ngaran taman kuntee.

27  ✡ Huswi 17:11-13.Piru ware narelrel te kabuhalan ni Manasis ka me mahinged te me siyudad te Bitsan, Tanak, Dur, Ibliam, Migidu wey ka langun ne nangugpe diye te marani ne me bariyu. Piru warad iya mig-awe ka me matig-Kanaan te seeye ne inged. 28 Te migmaresen e ka me kabuhalan ni Israil, impehes dan ka me matig-Kanaan ne egpatrabahuwen, piru ware dan iya sikandan narelrel. 29  ✡ Huswi 16:10.Ne ware narelrel te kabuhalan ni Ipraim ka me matig-Kanaan ne diye nangugpe te Gisir, purisu migpalemungey red sikandan ka nangugpe diye.

30 Ne ware degma narelrel te kabuhalan ni Sabulun ka me mahinged te Kitrun, wey ka me mahinged te Nahalul. Migpalemungey red sikandan ka nangugpe dutu piru impehes dan sikandan patrabahuwa.

31 Ne ware ded degma narelrel te kabuhalan ni Asir ka me mahinged te Aku, Sidun, Ahulab, Aksib, Hilba, Apik wey Rihub. 32 Purisu migpalemungey red degma ka kabuhalan ni Asir te me matig-Kanaan ne mig-ugpe te seeye ne me inged, ne ware dan narelrel.

33 Ne minsan ka kabuhalan ni Naptali ware degma nakarelrel te me mahinged te Bit-Simis wey Bit-Anat. Purisu, migpalemungey red ka kabuhalan ni Naptali te me matig-Kanaan. Ne impehes dan patrabahuwa seeye se mahinged te Bit-Simis wey Bit-Anat.

34 Piru natalu mule te me Amunihanen ka me kabuhalan ni Dan wey indelrel diye te bubungan eyew kene egpekeugpe diye te napu. 35 Ne ware mig-awe ka me Amurihanen diye te bubungan te Hiris, Ayalun, wey Salbim. Piru migmaresen ka kabuhalan ni Husi, sikan naa ka impehes dan sikandan patrabahuwa. 36 Ka eletanan te tane te me Amunihanen diye migbunsud te dalan patakereg te Akrabim taman diye te kewun‑aan te Sila.