1 Te naahew e te me kabuhalan ni Israil ka seeye ne inged, miglibulung sikandan langun diye te Silu, wey miggimu sikandan te Balungbalung ne Temuwanan dan. 2 Ne duen pad pitu ne tribu te me kabuhalan ni Israil ne ware pad nabehayi te inged isip karatuan ne inggaat. 3 Purisu, ingkahiyan ni Huswi ka me kabuhalan ni Israil, “Ken‑u niyu pad eg-angkena ka inged ne imbehey kaniyu te Magbebaye ne Manama te kaap-apuan niyu? 4 Alam kew te tatelu ne etew te tagse tribu. Egpaleuyen ku sikandan te intiru ne inged. Ne eggimu sikandan te mapa eyew egkanengnengan ta ke egmenuwen te egbaad-baad ka seeye ne tane. Ne eglibed e sikandan kayi te keddi. 5 Ne egbaaren dan te pitu ne baad ka inged, angin e te inged te me kabuhalan ni Huda ne diye te igkakawanan ne balabahan, wey ka inged te me kabuhalan ni Husi ne diye te inged te igkahibang ne balabahan. 6 Emun ke egkeimpusan dan e te egmapa, eg-uyanen dan e seini kayi te keddi eyew egpintut-pintuten ku seini diye te tangkaan te Magbebaye ne Manama. 7 Piru ware inged ne egkaangken te me Libita tenged su iyan dan himu ka egpamakey te Magbebaye ne Manama. Ne nakarawat e ka me kabuhalan ni Gad, ni Rubin, wey katenge te me kabuhalan ni Manasis* Inteil ni Muwisis diye te kabuhalan ni Rubin, ni Gad, wey te katenge te kabuhalan ni Manasis ka tane ne diye te igsile te Weyig ne Hurdan wey ka katenge te kabuhalan ni Manasis diye te iglineb. te inged isip karatuan ne inggaat kandan diye te igsile te Hurdan ne imbehey kandan ni Muwisis, ne suluhuanen te Magbebaye ne Manama.”

8 Te egpangipanew e ka naalam ne me etew, ingkahiyan sikandan ni Huswi, “Leuya niyu ka intiru ne inged wey himu kew te mapa. Ne libed kew kayi su egpintut-pintuten ku seini diye te tangkaan te Magbebaye ne Manama eyew egkatahan ta ke hentew ne tribu ka egpakaangken te tagse inged.” 9 Sikan naa ka nangipanew ka me etew ne egleuy te intiru ne inged. Ne inggimuwan dan seini te mapa ne migpakita ne nabaad ka inged te pitu ne baad wey insulat dan ka me siyudad, wey ka me lungsud ne nasakup te tagse baad. Te neimpusan dan e te egmapa, miglibed e sikandan ki Huswi diye te Silu. 10 Ne pinaahi te pegpintut-pintut, imbehayan ni Huswi te baad ka me tribu te Israil ne ware pad nakaangken te inged.

11 Ka an-anayan ne nabehayan te inged pinaahi te pegpintut-pintut, iyan ka me pamilya te me kabuhalan ni Binhamin. Diye seini te elat te naangken ne inged te me kabuhalan ni Huda wey ni Husi. 12 Ne ka eletanan dan te igkahibang ne balabahan; migbunsud diye te Hurdan patakereg diye te igkahibang ne balabahan te Hiriku. Ne peendiye seini te iglineb te me bubungan taman diye te Bit-Abin ne disirtu. 13 Ne puun diye, nekeuma seini diye te igkakawanan ne balabahan te tuhal te Lus, peendiye te igkahibang ne balabahan ne bubungan kayi ne iyan e ngaran kuntee ka Bitil. Ne nakatupang seini diye te Atarut-Adar† Ka Atarut Adar iling ded te inged ne Atarut ne nakahi diye te birsikulu 16:2 wey 16:7. ne diye te bubungan te igkakawanan ne balabahan te diralem te Bit-Hurun. 14 Ne puun diye, migpabulus seini diye te iglineb ne bubungan ne egpakatangke te Bit-Hurun ne diye te igkakawanan ne balabahan. Ne diye nataman seini te Kiryat-Baal (ne egngaranan ded te Kiryat-Hiyarim), ka siyudad te me kabuhalan ni Huda. Ne seeye ka eletanan diye te iglineb. 15 Ne ka eletanan te igkakawanan ne balabahan, migbunsud diye te katamanan te Kiryat-Hiyarim. Nakapabulus seini diye te iglineb peendiye te me Sebseb te Niptuwa. 16 Ne nakatupang seini diye te lenlen te bubungan ne nakatangke te bangalug te Binhinum ne diye te igkahibang ne balabahan te bangalug te Ripaim. Ne puun diye, nakapabulus seini diye te napu te Hinum peendiye te igkakawanan ne balabahan te ilis te lungsud te me Hibusihanen, wey taman seini diye te In-Rugil. 17 Ne nakatiku seini diye te igkahibang ne balabahan peendiye te In-Simis. Ne nekeuma seini diye te Gililut ne nakatangke te takerehen te Adumim. Ne nakatupang seini diye te Batu ni Buhan ne anak ni Rubin. 18 Ne puun diye, nekeuma seini diye te igkahibang ne balabahan te tuhal ne egpakatangke te bangalug te Bit-Araba, wey nakatupang seini diye te bangalug te Araba. 19 Ne nekeuma seini diye te igkahibang ne balabahan te ilis te Bit-Hugla, wey diye nataman seini te igkahibang ne balabahan ne bayaanan te weyig ne Namatey ne Dahat, ne iyan ka pulipusan te Weyig ne Hurdan diye te igkakawanan ne balabahan. Seeye ka eletanan diye te igkakawanan ne balabahan. 20 Ne Weyig ne Hurdan ka eletanan diye te igsile. Ne seeye ka me eletanan te inged ne naangken te me kabuhalan ni Binhamin, ne imbaad-baad dan te tagse pamilya.

21 Ne ka me siyudad ne naangken te me kabuhalan ni Binhamin, ne imbaad-baad dan te tagse pamilya ran iyan ka Hiriku, Bit-Hugla, Imik-Kisis, 22 Bit-Araba, Simaraim, Bitil, 23 Abim, Para, Upra, 24 Kipar-Amuni, Upni, wey Giba. Migginguma ka langun ne me siyudad te sapulu wey daruwa (12) lagkes ka me lungsud kayi. 25 Lagkes degma kayi ka Gibyun, Rama, Biirut, 26 Mispa, Kipira, Musa, 27 Rikim, Irpil, Tarala, 28 Sila, Ha-Ilip, Hibus (Hirusalim e kuntee seini), Gibiya, wey Kiryat-Hiyarim. Migginguma ka langun ne me siyudad te sapulu wey hep‑at (14) lagkes ka me lungsud kayi. Seeye ka inged ne karatuan ne inggaat te me kabuhalan ni Binhamin, ne imbaad-baad dan seeye diye te tagse pamilya.