1 Due degma inged ne naangken te katenge te me kabuhalan ni Manasis,* Inteil ni Muwisis diye te kabuhalan ni Rubin, ni Gad, wey te katenge te kabuhalan ni Manasis ka tane ne diye te igsile te Weyig ne Hurdan wey ka katenge te kabuhalan ni Manasis diye te iglineb. ka kinakakayan ne anak ni Husi. Ne naangken te pamilya ni Makir ka Gilyad wey ka Basan tenged su meupiya sikandin ne sundalu. Si Makir ka amey ni Gilyad, ka kinakakayan ne anak ni Manasis. 2 Ne ka inged ne diye te iglineb te Weyig ne Hurdan, naangken te duma ne me kabuhalan ni Manasis ne me pamilya ni Abi-Isir, Hilik, Asril, Sikim, Hipir, wey Simida. Ne imbaad-baad dan seini diye te tagse pamilya. 3 Ne due etew ne egngaranan ki Silupihad. Anak sikandin ni Hipir, wey apu sikandin ni Gilyad. Ne si Gilyad, anak ni Makir, wey si Makir, anak ni Manasis. Ne neelin de ne malitan ka anak ni Silupihad ne iyan ensi Mala, Nuwa, Hugla, Milka wey Tirsa. 4  ✡ Num 27:1-7.Ne nangendiye ka seeye ne me malitan ki Ilyasar ne talagpanubad, ki Huswi ne anak ni Nun, wey diye te me pangulu, wey migkahi sikandan, “Migsuhu ka Magbebaye ne Manama ki Muwisis ne egpabehayan key te inged isip karatuan ne inggaat iling te me karumaan ney ne me lukes.” Purisu, nabehayan sikandan te inged sumale te insuhu te Magbebaye ne Manama. 5 Seini ka egpuunan ne natimulan te sapulu ne baad ka naangken ne inged te kabuhalan ni Manasis, angin e te Gilyad wey Basan ne diye te igsile te Hurdan, 6 tenged su nabehayan ma degma te inged ka me malitan ne kabuhalan din iling te kabuhalan din ne me lukes. Ne naangken ka Gilyad te duma ne me kabuhalan ni Manasis.

7 Ne ka inged ne naangken te kabuhalan ni Manasis, migbunsud diye te Asir peendiye te Mik-Mitat ne igsile te Sikim. Ne migginguma seini diye te igkakawanan ne balabahan te igsile peendiye te nangugpaan te matig-In-Tapuwa. 8 Ne iyan nakaangken ka kabuhalan ni Manasis te inged ne nakalingut te Tapuwa, piru ka Tapuwa diye te eletanan te inged ni Manasis ne naangken te me kabuhalan ni Ipraim. 9 Ne nakatupang ka eletanan diye te Weyig ne Kana. Ne due me siyudad diye te igkakawanan ne balabahan te igsile te weyig ne naangken te me kabuhalan ni Ipraim, minsan ke naseled seini te naangken te me kabuhalan ni Manasis. Ne nakapabulus ka eletanan te me kabuhalan ni Manasis diye te igkahibang ne balabahan te Weyig ne Kana taman diye te Dahat ne Miditiranyu. 10 Ne naangken te me kabuhalan ni Ipraim ka diye te igkahibang ne balabahan te igsile, wey naangken te me kabuhalan ni Manasis ka diye te igkakawanan ne balabahan te igsile. Ne iyan eletanan te me kabuhalan ni Manasis diye te iglineb ka Dahat ne Miditiranyu. Ne naangken te me kabuhalan ni Asir ka diye te igkahibang ne balabahan, wey naangken degma te me kabuhalan ni Isakar ka diye te igsile. 11 Ne due degma me siyudad ne nasakup te inged te me kabuhalan ni Isakar wey ni Asir ne naangken te me kabuhalan ni Manasis: ka Bit-San, Iblaim, Dur, In-Dur, Taanak, Migidu, wey ka me bariyu ne nakalingut kayi. 12  ✡ Tal 1:27-28.Piru ka seeye ne me siyudad ware neugpei te me kabuhalan ni Manasis, tenged su ware dan nadeldel ka me matig-Kanaan diye. 13 Piru te migmaresen e ka me kabuhalan ni Israil, in-uripen dan e ka me matig-Kanaan, piru ware dan sikandan deldela.

14 Ne migkahi ka me kabuhalan ni Husi diye ki Huswi, “Mania te sabeka re ne baad ne inged ka imbehey nu kanami? Masulug key amana tenged su impanalanginan key te Magbebaye ne Manama.”

15 Ne migtabak si Huswi, “Emun ke masulug kew amana, wey emun ke kene ne eleg kaniyu ka me bubungan te Ipraim, pangendiye kew te me Puwalas te me Pirisihanen wey me Ripaimhanen. Ne gehawan kew te inged diye ne para kaniyu.”

16 Ne migkahi ka me kabuhalan ni Husi, “Kene ne eleg kanami ka me bubungan. Ne kene ney egkatalu ka me matig-Kanaan ne diye te napu tenged su due me karwahi ran ne putew. Ne iling ded ka me Kanaanen ne diye te Bit-San, wey ka nakalingut ne me lungsud kayi, wey minsan ka diye te bangalug ne egngaranan te Hisril.”

17 Ne intabak ni Huswi ka kabuhalan ni Husi ne iyan ka me kabuhalan ni Ipraim wey ni Manasis, “Masulug niyu bes iya wey tenged due egmaresen kew amana. Ne keilangan ne kene ne sabeka re ne baad ka egkaangken niyu. 18 Egkaangken niyu man‑e ka puwalas diye te me bubungan. Gawani niyu re, wey kaniyud e puun te iglenlen te seeye ne bubungan taman diye te puntul. Ne egkadeldel niyu ka me matig-Kanaan minsan maresen sikandan, wey minsan ke due me karwahi ran ne putew.”