1 Ka igkarangeb ne nabehayan te inged pinaahi te pegpintut-pintut, iyan ka me pamilya te me kabuhalan ni Simyun. Ka inged ne karatuan ne inggaat kandan, diye te elat-elat te inged ne naangken te me kabuhalan ni Huda. 2  ✡ 1Kru 4:28-33.Nalagkes kayi ka Birsiyiba, Siyiba, Mulada, 3 Hasar-Suwal, Bala, Isim, 4 Iltulad, Bitul, Hurma, 5 Siklag, Bit-Markabut, Hasar-Susa, 6 Bit-Libaut, wey Siyaruhin. Migginguma ka langun ne me siyudad te sapulu wey tatelu (13) lagkes ka me lungsud kayi.

7 Nalagkes degma ka Ayin, Rimun, Itir, wey Asan. Migginguma langun ka me siyudad te hep‑at lagkes ka me lungsud kayi. 8 Nalagkes ka langun ne bariyu taman diye te Baalat-Bir ne iyan ka Rama ne diye te igkakawanan ne balabahan. Seeye ka inged ne karatuan ne inggaat te me kabuhalan ni Simyun, ne imbaad-baad dan seeye diye te tagse pamilya. 9 Ka inged ne karatuan ne inggaat te me kabuhalan ni Simyun, diye angaya te inged te me kabuhalan ni Huda su maluag de ka inged dan du te egkeilanganen dan. Seeye ka egpuunan ke mania te diye ka inged te me kabuhalan ni Simyun te elat-elat te inged te me kabuhalan ni Huda.

10 Ka igkatatelu ne nabehayan te inged pinaahi te pegpintut-pintut, iyan ka me pamilya te me kabuhalan ni Sabulun. Ne nekeuma taman diye te Sarid ka eletanan te inged dan. 11 Ne puun diye, nekeuma seini te iglineb te Marala, te Dabisit, wey nakapabulus seini diye te weyig ne diye te igsile te Hukni-Am. 12 Ne puun te limang te Sarid, nekeuma pad ka eletanan te igsile taman diye te eletanan te Kislut-Tabur, wey nakapabulus seini diye te Dabirat taman diye te Hapiya. 13 Ne puun diye, nekeuma pad seini te igsile te Gat-Hipir peendiye te It-Kasin, wey Rimun. Ne nakatiku seini diye te Niya. 14 Ne ka eletanan te igkahibang ne balabahan, nakatiku diye te Hanatun wey nataman seini diye te bangalug te Ipta-Il. 15 Migginguma ka langun ne siyudad ne naangken te me kabuhalan ni Sabulun te sapulu wey daruwa (12) lagkes ka me lungsud kayi. Timul pad kayi ka Katat, Nahalal, Simrun, Idala, wey Bitlihim. 16 Seeye ka me siyudad wey me lungsud ne naangken te me kabuhalan ni Sabulun isip karatuan ne inggaat kandan, ne imbaad-baad dan seini diye te tagse pamilya.

17 Ka igkeep‑at ne nabehayan te inged pinaahi te pegpintut-pintut, iyan ka me pamilya te me kabuhalan ni Isakar. 18 Seini ka me inged ne naangken dan: ka Hisril, Kisulut, Sunim, 19 Hapara-Im, Siyun, Anaharat, 20 Rabit, Kisyun, Ibis, 21 Rimit, In-Ganim, In-Hada, wey Bit-Pasis. 22 Nekeuma ka eletanan dan diye te Tabur, Sahasima, Bit-Simis, wey nataman seini diye te Hurdan. Migginguma ka langun ne siyudad te sapulu wey hen‑em (16) lagkes ka me lungsud kayi. 23 Ne seeye ka me siyudad wey me lungsud ne karatuan ne inggaat te me kabuhalan ni Isakar, ne imbaad-baad dan seini diye te tagse pamilya.

24 Ka igkalalimma ne nabehayan te inged pinaahi te pegpintut-pintut, iyan ka me pamilya te me kabuhalan ni Asir. 25 Seini ka me inged ne naangken dan: ka Hilkat, Hali, Bitin, Aksap, 26 Alamilik, Amad, wey Misal. Ne ka eletanan dan diye te iglineb, nekeuma diye te Karmil wey Sihur-Libnat. 27 Ne nakatiku seini diye te igsile peendiye te Bit-Dagun, ne nekeuma diye te Sabulun wey diye te bangalug te Ipta-Il. Ne nekeuma seini diye te igkahibang ne balabahan peendiye te Bit-Imik wey Nil. Ne nakapabulus seini diye te igkahibang ne balabahan te Kabul, 28 Ibrun, Rihub, Hamun, Kana, wey taman diye te Dakel ne Sidun. 29 Ne nakatiku seini diye te Rama, ne peendiye te siyudad ne Tiru ne in-alad te matikang wey makepal ne batu. Ne nakatiku seini diye te Husa, wey nataman diye te Dahat ne Miditiranyu. Nalagkes ka duma ne me siyudad ne Mahalab, Aksib, 30 Uma, Apik, wey Rihub. Migginguma ka langun ne me siyudad te daruwa ne pulu wey daruwa (22) lagkes ka me lungsud kayi. 31 Ne seeye ka me siyudad wey me lungsud ne karatuan ne inggaat te me kabuhalan ni Asir, ne imbaad-baad dan seini diye te tagse pamilya.

32 Ka igkeen‑em ne nabehayan te inged pinaahi te pegpintut-pintut, iyan ka me pamilya te me kabuhalan ni Naptali. 33 Ne ka eletanan te inged dan, migbunsud diye te Hilip wey te kayu ne uk ne diye te Sa-Ananim peendiye te Adami-Nikib wey te Habnil peendiye te Lakum, ne diye nataman seini te Weyig ne Hurdan. 34 Ne puun diye, nakatiku seini diye te iglineb peendiye te Asnut-Tabur, peendiye te Hukuk taman diye te eletanan te Sabulun diye te igkakawanan ne balabahan, peendiye man‑e te eletanan te Asir diye te iglineb wey te Hurdan diye te igsile. 35 Ne ka nalagkes ne me siyudad ne in-alad te matikang wey makepal ne batu, iyan ka Sidim, Sir, Hamat, Rikat, Kinirit, 36 Adama, Rama, Hasur, 37 Kidis, Idrii, In-Hasur, 38 Irun, Migdal-Il, Hurim, Bit-Anat, wey Bit-Simis. Migginguma ka langun ne me siyudad te sapulu wey siyam (19) lagkes ka me lungsud kayi. 39 Seeye ka me siyudad wey me lungsud ne karatuan ne inggaat te me kabuhalan ni Naptali, ne imbaad-baad dan seini diye te tagse pamilya.

40 Ka igkapitu ne nabehayan te inged pinaahi te pegpintut-pintut, iyan ka me pamilya te me kabuhalan ni Dan. 41 Naangken dan ka me inged te Sura, Ista-Ul, Ir-Simis, 42 Sa-Albim, Ayalun, Hitla, 43 Ilun, Timna, Ikrun, 44 Iltiki, Gibitun, Baalat, 45 Hihud, Bini-Birak, Gat-Rimun, 46 Mi-Harkun, wey Rakun, lagkes ka inged ne talipag te Hupa. 47  ✡ Tal 18:27-29.Piru naahew te kuntere ka inged ne naangken te me kabuhalan ni Dan, sikan naa ka inlusuran dan ka inged te Lais, wey impangimatayan dan ka me mahinged diye. In-ahew ran seini wey diyad sikandan nangugpe. Ne imbalbalawan dan seini ngarani te Dan ne ngaran te kaap-apuan dan. 48 Seeye ka me siyudad wey me lungsud ne karatuan ne inggaat te me kabuhalan ni Dan, ne imbaad-baad dan seini diye te tagse pamilya.

49 Te neimpusan e te pegbaad-baad te me kabuhalan ni Israil ka inged isip karatuan ne inggaat, imbehayan dan degma te inged si Huswi ne anak ni Nun.

50 Ne sumale te insuhu te Magbebaye ne Manama, imbehey ran kandin ka siyudad ne imbuyu din ne iyan ka Timnat-Sira ne diye te bubungan te Ipraim. Ne imbalbalawan din ka siyudad pasasindeha wey diyad sikandin mig-ugpe.

51 Ne iyan migbaad-baad te tane si Ilyasar ne talagpanubad, si Huswi ne anak ni Nun, wey ka me pangulu te tagse tribu te Israil. Imbaad-baad dan seeye pinaahi te pegpintut-pintut diye te tangkaan te Magbebaye ne Manama, diye te gumawan te Balungbalung ne Temuwanan diye te Silu. Purisu, neimpusan e ka pegbaad-baad te inged.