1  ✡ Num 35:9-34; Diy 4:41-43; 19:1-13.Ne ingkahiyan te Magbebaye ne Manama si Huswi, 2 “Kahii nu ka me kabuhalan ni Israil ne eg-alam sikandan te me siyudad ne aputanan sumale te ingkahi ku ki Muwisis. 3 Ne ka minsan hentew ne egpakapatey ne ware din tuyui, egpakaaput sikandin te seeye ne me siyudad eyew egpakapariyu te me etew ne egsuli kandin. 4 Egpakaaput sikandin te seeye ne me siyudad, egpeendiye te gumawan te siyudad ne hukumanan, wey egpakahuhud sikandin diye te me igdatu ke nekey ka neyitabu. Egkataman, igpalasud dan e sikandin diye wey diye pad egpeuugpaa. 5 Emun ke eglupuhen sikandin diye te siyudad te me etew ne egsuli kandin, keilangan ne ka me mahinged, kene sikandin igbehey te seeye ne me etew. Tenged su ware din tuyua ka peggimatey wey ware nabelu sikandin ka miggimatey. 6 Ne eg-uugpe pad sikandin te seeye ne siyudad taman te egkewusey e sikandin wey taman te egpatey e ka Labew ne Talagpanubad ne migpamakey te seeye te timpu. Ne egpekeuli e sikandin diye te ugpaan din mismu ne migpuunan din te migpallahuy.”

7 Sikan naa ka in-alam dan ka Kidis ne diye te Galiliya ne diye te bubungan te inged te me kabuhalan ni Naptali, ka Sikim ne diye te bubungan te inged te me kabuhalan ni Ipraim, wey ka Kiryat-Arba ne iyan ka Hibrun ne diye te bubungan te inged te me kabuhalan ni Huda. 8 Ne ka diye te igsile te Hurdan ne marani te Hiriku, in-alam dan ka Bisir ne diye te disirtu diye te napu te inged te me kabuhalan ni Rubin. Ne in-alam dan man‑e ka Ramut diye te Gilyad ne diye te inged te me kabuhalan ni Gad, wey ka Gulan ne diye te Basan ne diye te inged te me kabuhalan ni Manasis. 9 Seeye ka me siyudad ne aputanan ne in-alam para te me kabuhalan ni Israil, wey te kene ne me kabuhalan ni Israil ne miglemung kandan. Ka minsan hentew ne egpakapatey ne ware tuyua, egkaayun ne eg-aput diye eyew kene sikandin egkeyimatayan te etew ne egsuli kandin taheed te kene pad egkapamalehetan diye te hukumanan ne ware sale din.