1  ✡ Huswi 20:1-9.Ne ingkahiyan e man‑e ni Muwisis ka me kabuhalan ni Israil, “Ke egpangimatayan e te Magbebaye ne Manama niyu ka me mahinged diye te tane ne igbehey rin kaniyu, wey egkaddeldel niyud sikandan, wey egmangugpe kew e te me siyudad wey me baley ran, 2 baara niyu te tatelu ne distritu ka tane ne igbehey kaniyu te Magbebaye ne Manama niyu. 3 Ne teil kew te tigsabeka ne siyudad puun te tagse distritu eyew eggimuwen ne aputanan. Ne pangay-ayari niyu ka me kelesadda peendiye te sika ne me siyudad, 4 eyew ka minsan hentew ne egpakapatey te duma rin te ware din tuyui, wey ware din dumuti, egkaayun ne eg-aput te sabeka te seini ne me siyudad ne aputanan, eyew ware minsan hentew ne egpekeyilabet kandin. 5 Ne panunggilingan ke due daruwa ne etew ne migparumeey diye te puwalas eyew egpameled te kayu; taheed te migpepetpet ka sabeka, napesuk ka wasey rin wey nasuhat mule ka duma rin wey migpatey e, egkaayun sikandin ne eg-aput te sabeka te seini ne me siyudad ne aputanan, eyew ware minsan hentew ne egpekeyilabet kandin. 6 Piru ke sabeka re ka siyudad ne aputanan, wey mariyu seini te etew ne nakapatey, wey egkalupug sikandin te egkeupian ne egsuli kandin tenged te langet, egkapatey iya sikandin. Ne kene ma perem ne eleg ne eggimatayan sikandin su ware din ma tuyui te eggimatey ka duma rin wey ke indumutan din naa. 7 Sikan naa ka insuhu ku sikaniyu ne egteil te tatelu ne aputanan ne me siyudad.

8 “Ne emun ke egmaluahen e te Magbebaye ne Manama niyu ka tane niyu sumale te insaad din te me kaap-apuan niyu, wey egkaangken niyud ka intiru ne Inged ne Insaad din kandan, 9 timul kew teil te lein ne tatelu ne siyudad. Igbehey rin iya kaniyu ka intiru ne tane ke egtumanen niyu ka langun ne suhu ne ingkahi ku kaniyu kuntee, ne eggeyinawaan niyu ka Magbebaye ne Manama niyu, wey eg-ikulen niyu ka langun ne igpeyimu rin. 10 Himuwa niyu seini eyew ware egkapatey ne etew ne ware sale diye te tane niyu, wey eyew kene kew eg-isipen ne nakasale puun te kamatayen te etew ne ware sale.

11 “Piru ke indumutan te sabeka ne etew ka duma rin, wey in-atangan din seini wey inggimatayan din, wey mig-aput sikandin te sabeka te seini ne me aputanan ne me siyudad, 12 keilangan ne igpaangey sikandin te me igdatu te siyudad din, wey egpeyimatayan te seeye se egkeupian ne egsuli kandin. 13 Kene kew keyid‑u kandin. Keilangan ne eglinisan niyu ka Israil te sale ne iyan ka peggimatey te etew ne ware sale, eyew egmeupiya ka peg-ugpe niyu.”

14  ✡ Diy 27:17.“Ne kene niyu halina ka palinneu te eletanan te tane te duma niyu ne impes-ek te hun‑a pad ne me kabuhalan diye te inged ne igbehey kaniyu te Magbebaye ne Manama niyu.”

15  ✡ Num 35:30; Diy 17:6; Mat 18:16; Huw 8:17; 2Kur 13:1; 1Tim 5:19; Hib 10:28.Ne ingkahiyan e man‑e ni Muwisis ka me kabuhalan ni Israil, “Kene kew hukum ne nakasale ka sabeka ne etew tenged de te sabeka ne talagpamalehet; keilangan iya ne daruwa wey ke tatelu naa ka egpamalehet ne nakasale ka sabeka ne etew. 16 Ne emun ke eg-uubat diye te hukumanan ka sabeka ne talagpamalehet ne nakasale ka sabeka ne etew, 17 pasasindeha niyu sikandan se daruwa diye te tangkaan te Magbebaye ne Manama, te me talagpanubad, wey te me talewukum. 18 Ne keilangan ne eg-ay-ayaran te me talewukum te eg-ugsi-ugsi ke kene naa ne ubat ka sumbung te talagpamalehet. Ne emun ke egkanengnengan ne ubat ka pegpamalehet din meyitenged te sabeka ne etew, 19 himuwa niyu diye te kandin ka igkeupii rin perem ne eggimuwen diye te sabeka ne etew. Keilangan ne eg-aween niyu ka mareet ne hinimuwan due te kaniyu, 20 eyew ke egpakanengneng ka duma ne me kabuhalan ni Israil meyitenged te seini, egkaaldek e sikandan, wey warad minsan hentew kaniyu ne eg-abey eggimu te iling due. 21  ✡ Iks 21:23-25; Lib 24:19-20; Mat 5:38.Keilangan ne kene kew egkeyimenawan; ke nakapatey ka etew te duma rin, eggimatayan degma sikandin; ke nakabutud sikandin, egbuturan degma sikandin; ke nakabingew sikandin, egbingawan degma sikandin; ke nakahepu sikandin te belad wey ke paa naa te duma rin, eggepuen degma ka belad wey ke paa rin naa.”