Pegkalange
ni Hirimiyas
Igpewun‑a
Ka baseen te Me pegkalange iyan seini ka nalimud ne me sinulat meyitenged te pegkalange tenged te dakel ne karereetan ne neyitabu te Hirusalim, wey te pegkarakep te me mahinged diye, te 586 ne leg‑un te ware pad neetew ka Magbebaye ne si Hisus. Ne minsan pad te pegkalaggew ne naheraman ne impapitew te seini ne baseen, due degma impapitew meyitenged te pegsalig diye te Magbebaye ne Manama wey ka egkapallateng te egginguma ne me timpu. Ka seini ne me balak inggamit te me Hudiyu* Ka me Hudiyu ka kabuhalan ni Hakub ne ingngaranan ded degma ki Israil. Ingngaranan sikandan te me Hudiyu tenged su diye sikandan ne mahinged te Hudiya dengan. diye te me pegsimba te timpu te tagse leg‑un ne pegpuasa wey pegkalange taman kuntee, eyew te pegtanud-tanud te karereetan ne neyitabu te Hirusalim.
Ka nenasulat te seini ne baseen
Ka me peglungku te Hirusalim 1:1-22
Ka pegparusa te Hirusalim 2:1-22
Ka pegparusa wey ka egkapallateng 3:1-66
Ka pegkahuhus te Hirusalim 4:1-22
Ka peg-ampu te pegpabulig 5:1-22
1
Ka me peglungku te Hirusalim
1 Migsabsabeka naan de ka siyudad ne Hirusalim
ne in-ugpaan pad dengan te susuluhi ne etew!
Ka siyudad ne subla ne mabantug te intiru ne kalibutan,
piru kuntee nekeiling e sikandin te balu ne malitan!
Ka mabantug te langun ne siyudad
piru kuntee neuripen e.
2 Egkapawaan sikandin ka egpanaman-taman egsinehew,
wey egpanulayas de due ka luwe din.
In-engkeran e sikandin te langun ne miggeyinawa kandin,
wey warad egliwang kandin.
In-akalan sikandin te langun ne me alukuy rin,
wey kuntee neyimu e sikandan ne me kuntere din.
3 Ne impandakep wey impaantus ka keet-etawan te Huda;
impehes sikandan te me kuntere dan ne eg-engked te me ugpaan dan.
Diyad e sikandan nenekeugpe te duma ne me nasud,
wey warad iya egkeyimelayan dan.
Inlingutan sikandan te langun ne kuntere dan
wey warad egkapallahuyan dan.
4 Ne makaal-alimengew e ka me dalan peendiye te Hirusalim,† Te Hibruwanen: Siyun. Sabeka seini te me ngaran te Hirusalim.
su warad ma egpangendiye te timplu te aldew te pegsahakeen.
Warad me etew te langun ne gumawan te siyudad te Hirusalim;
migdeg-uy ka me talagpanubad,
wey miglungku ka me mengebay.
Amana iya ne masumpit ka natamanan te Hirusalim!
5 Iyan e migpangulu kandin ka me kuntere din,
wey iyan e migmatubung sikandan.
Impaantus sikandin te Magbebaye ne Manama,
tenged te dakel ne sale din.
Impandakep ka me anak din,
wey impanguyan e te me kuntere din diye te mariyu.
6 Naawe e ka langun ne katelesan te Hirusalim.
Egmanggutasan ka me pangulu iling e te usa ne warad e egkapanabtaban,
wey magguye e sikandan ka egpallahuy taheed te egpanlupuhen sikandan.
7 Kuntee te nabaybayaran e wey te nahuhus e ka Hirusalim,
natanuran din ka langun ne katelesan din dengan.
Te natalu e sikandin te me kuntere din,
warad iya migpangabang kandin;
ingngi-ngisiyan sikandin te me kuntere din te pegkatalu rin.
8 Tenged te subla ne dakel ne sale te Hirusalim,
sikan naa ka inlemetan sikandin.
Ka migdayan kandin dengan
miglemet e kandin kuntee,
su nakakita ma sikandan te nakapalawas e sikandin.
Migdeg-uy sikandin,
wey migbubunbun te ulaula rin.
9 Kenad igkeeles ka kalindit‡ Te Hibruwanen: Ka kalindit din diyad te kumbale din. din,
piru ware din linglingaa ke nekey ka egkeumaan din.
Ne makaalat-halat ka neyitabu kandin,
wey warad iya migparani ne egliwang kandin.
Purisu migpangananey sikandin,
“He Magbebaye ne Manama,
pitawa a te kalasayan ku
su natalu a te me kuntere ku!”
10 Impangahew te me kuntere ka langun ne karatuan din.
Nakita rin ne migseled te timplu ka me lapu ne kene egpaseleren te Magbebaye ne Manama.
11 Ne migdeg-uy ka langun ne keet-etawan din ne migpamitew te egkakeen.
Impasaliyuwan din te egkakeen ka me karatuan din
eyew eglibed ded ka kanekal rin.
Ne migpangananey sikandin, “Pitew ka Magbebaye ne Manama, tengteng ka su neyilawan a.”
12 Ne migkahiyan din degma ka me etew ne eglihad de,
“Egbalaharen e naan de nikaniyu? Pitew kew keddi!
Duen naa nekeiling te keyirapan ne in-antus ku?
Inlegpad seini keddi te Magbebaye ne Manama
te timpu ne migpangebel-ebel ka langet din.
13 “In-uluhan a te Magbebaye te hapuy ne iling te mig-ugseb seini te me tul‑an ku.
Insahilut§ Te Hibruwanen: migbebelat sikandin te biyale para te paa ku. a nikandin
wey nakalangkeb a; impalibed a nikandin.
Imbalahad ad e nikandin,
ka egkalepu te egkaapunan.
14 “Intagkes din ka me sale ku diye te yuggu.
Insaamul rin seini langun
wey insangen din seini te lieg ku,
wey in-awe din ka keseg ku.
Ne imbehey a te Manama te me kuntere ku
ne kene ku egkatalu.
15 “Imbalahad e te Manama ka me sundalu diye te tangkaan ku;
migsuhu sikandin te sesalihi eyew te peglusud keddi,
wey eyew te peggule te me kankanakan ne me sundalu ku.
Impandi-diekan din ka keet-etawan* Te Hibruwanen: Mengebay ne ware pad neyilabeti. te Huda
iling te behas te paras ne ingkeles diye te kelesanan.
16 “Sikan naa ka nakasinehew a tenged kayi,
wey migpanulayas ka me luwe ku.
Ne warad iya nakita ku ne egpakaliwang wey egpakabagget keddi.
Nareetan ka keet-etawan ku
su iyan ma migpanalu ka me kuntere ku.
17 “Migpabulig a† Te Hibruwanen: Intapaye te Siyun ka belad din. piru warad iya migbulig‡ Te Hibruwanen: liwang. keddi.
Impalusuran a te Magbebaye ne Manama te me sumbaley ku eyew egkakuntere ku,
sikan naa ka nekeiling ad te igpunas ne malindit diye te kandan.
18 “Eleg iya ka Magbebaye ne Manama,
su insupak ku ka kandin ne lalag.
Piru pammineha a nikaniyu, sikaniyu langun se keet-etawan,
wey pitawa a nikaniyu ka egkabaybayaran.
Impandakep ka me mengebay wey ka me kanakan kayi te keddi.
19 “Migpangumew a te me duma§ Te Hibruwanen: miggeyinawaan. ku eyew egbulihan a
piru nasi a akali nikandan.
Nammatey ka me talagpanubad wey ka me igdatu ku diye te siyudad,
te sasangan sikandan ne egpamitew te egkakeen eyew egkeuyag ded sikandan.
20 “Pitawa a Magbebaye ne Manama, se egkabaybayaran e.
Kena ad egkateu-teu,* Te Hibruwanen: newukag ka bituka ku. wey amana ne masakit ka geyinawa ku
puun su subla a ne masinupaken.
Egmekeepus de te deralanen ka egmatibtibbasey,
wey minsan diye te me baley due egpatey.† Te Hibruwanen: iling te kamatayen ka diye te seled te baley.
21 “Narineg te langun ka pegdeg-uy ku,
wey nasi de iya sikandan nahale te inggimu nu seini keddi.
Ne nanengnengan te langun ne me kuntere ku ne egkabaybayaran ad,
wey ingkeele dan ka pegpaantus nu keddi.
Mahaana nud e ka aldew ne insaad nu,‡ Te Hibruwanen: ipeuyan nud ka aldew ne ingkahi nu. wey paantusa nud degma sikandan iling keddi.
22 “Egginguma perem diye te tangkaan nu ka maddeet ne hinimuwan dan.
Paruseyi nu sikandan iling te pegparusa nu keddi tenged te langun ne me sale ku.
Su nabaybayaran a amana te masumpit,§ Te Hibruwanen: masulug ka pegdeg-uy ku.
wey egkabugtus e ka geyinawa ku te masakit.”
*^ Ka me Hudiyu ka kabuhalan ni Hakub ne ingngaranan ded degma ki Israil. Ingngaranan sikandan te me Hudiyu tenged su diye sikandan ne mahinged te Hudiya dengan.
†1:4 Te Hibruwanen: Siyun. Sabeka seini te me ngaran te Hirusalim.
‡1:9 Te Hibruwanen: Ka kalindit din diyad te kumbale din.
§1:13 Te Hibruwanen: migbebelat sikandin te biyale para te paa ku.
*1:15 Te Hibruwanen: Mengebay ne ware pad neyilabeti.
†1:17 Te Hibruwanen: Intapaye te Siyun ka belad din.
‡1:17 Te Hibruwanen: liwang.
§1:19 Te Hibruwanen: miggeyinawaan.
*1:20 Te Hibruwanen: newukag ka bituka ku.
†1:20 Te Hibruwanen: iling te kamatayen ka diye te seled te baley.
‡1:21 Te Hibruwanen: ipeuyan nud ka aldew ne ingkahi nu.
§1:22 Te Hibruwanen: masulug ka pegdeg-uy ku.