2
Ka pegparusa te Manama te Hirusalim
1 Tenged te egmangebel-ebel ne langet te Manama,
imbunbunan din te delem ka Hirusalim.
Indereetan din ka katelesan te Hirusalim,* Te Hibruwanen: puun te langit peendiye te tane.
wey imbalahad din e minsan ka timplu rin† Te Hibruwanen: diekanan din.
tenged te langet din.
2 Warad iya hid‑u rin te migdereet te langun ne ugpaan te kabuhalan ni Hakub.
Nabelu-belu sikandin ka miglundus te alad te Huda ne matikang wey makepal ne batu;
newugnak e diye te tane ka palasyu
eyew egkeyilawan ka migharian
wey ka me pangulu.
3 Te mangune-kune ne langet din,
inggule din ka me bahani te Israil
wey ware sikandin migbulig te timpu ne miglusud ka me kuntere.
Amana sikandin ne nabelu-belu iling te hapuy ne migkanlabkanlab
ne egpakasilab te langun ne diye te marani.
4 Egpekeiling sikandin te kuntere ne migbengat te pane din,
wey inggimatayan din ka langun ne ingkatelesi ney
wey igpakapeggasal ney ne me kanakan.
Ne kayi te Hirusalim,‡ Te Hibruwanen: balungbalung te anak ne malitan te Siyun.
impasalerep din ka langet din iling te hapuy ne migtutung te langun.
5 Egpekeiling te kuntere ka Manama
ne indereetan§ Te Hibruwanen: in-abeleng. din ka Israil.
Ingguhus din ka me palasyu wey inlundus din ka me alad ne matikang wey makepal ne batu.
Impasalerep din ka keet-etawan te Huda
te ware tamanan ne peglungku wey pegpandalawit.* Te Hibruwanen: Impamasulug din ka peglungku wey pegkalange para te anak ne malitan te Huda.
6 Inlundus din ka ugpaan din† Te Hibruwanen: leeb. iling te pinamulaan.
Indereetan din ka inged din ne libulunganan;
egpalingawan din ka aldew te pegsahakeen,
wey me Aldew te Peggimeley.
Imbalahad din e ka me Hari
wey ka me talagpanubad tenged te egmangebel-ebel ne langet.
7 Ne imbalahad e te Magbebaye ne Manama ka altar din,
wey mig-inniyuhan din e ka matulus ne timplu rin,
wey impahuhus din te me kuntere ka me matikang wey makepal ne alad ne batu.
Migmanguleyi sikandan diye te seled te timplu iling te aldew te pegsahakeen
su migpanalu sikandan.
8 Mapahetpet ka Magbebaye ne Manama ne egguhus te alad te Hirusalim.
Intuusan din e ka egguhusen din wey ware din ul-ulungi te egguhus.
Ware din peen-enengi te eglundus,
sikan naa ka natamtamanan en iya nahuhus ka intamundu ne tane wey ka me alad.
9 Nenapeled e diye te tane ka me lekeb te gumawan te siyudad,
su nenaggepu e ka imbalabag ne kayu ne impagul te lekeb.
Indakep ka Hari wey ka me pangulu diye te lein ne me nasud.
Ware dan e ikula ka me pegpanulu te Manama,
wey warad igmakita te Magbebaye ne Manama diye te me prupita rin.
10 Ne naminpinnuu ka me igbuyag te Hirusalim diye te tane ne ware lalahan;
imbukbukan dan te abu ka me ulu ran wey migpanaluub sikandan te saku.‡ Iyan igpasabut kayi ka meitem wey egdehes ne manggad ne inggimu puun te bulbul te kambing ne igsaluub te timpu te peglungku wey ke eg-inniyug naa te sale.
Nanguunduk diye te tane ka me mengebay te Hirusalim.
11 Miglebag ka mata ku te pegsinsinehew,
kena ad egkateu-teu,§ Nasamuk ka pusung ku. wey amana ne masakit ka geyinawa ku,
su impangimatayan ka keet-etawan te Hirusalim,
wey nenallepu diye te me deralanen te siyudad
ka me bate ne egsusu pad wey ka me mannawe e.
12 Sasangan de due sikandan ne egmaninehew ka egpangumew te me iney ran ka egbuyu te egkakeen wey egkeinum
su egmanggutasan e sikandan wey egkammaraan.
Nekeiling e sikandan te me sundalu ne nenapalian wey egkengalepu e diye te deralanen
wey egkahan-ganaran e egkabigtew ka geyinawa ran taheed te insalulu sikandan te me iney ran.
13 Nekey naan e ka igpakalalag ku keykew, he Hirusalim?* Te Hibruwanen: malitan ne anak te Hirusalim. Nekey naan e ka egpeilingan ku keykew?
Nekey buwa ka egpeilingan ku keykew eyew egkaliwang ke red,
te iling ma kaluag te dahat ka karereetan ne neyitabu keykew?
Ware mig-antus iling te in-antus nu.
Hentew naan de iya ka egpakabulig keykew?
14 Neelin ne ubat ka inlalag te me prupita nu ne impakita kun kandan;
ware dan ipanengneng keykew ka me sale nu
eyew egmeupiya red perem ka egtamanan nu.
Piru iyan dan immangguhud ka kene ne malehet wey egpakaruruhu.
15 Egbalbalayen ka te me etew ne eglihad keykew;
egmakalengey-lengey sikandan wey egngingisiyan ka nikandan te natamanan nu.
Egkahi sikandan,
“Etuwey, kinaa! Seini bes iya ka siyudad ne egkahuhud ne amana ne tetelesi,
wey egpuunan te kahale te langun ne inged?”
16 Egsumpaliten ka te langun ne me kuntere nu wey eglemetan ka nikandan;
egpangngibi wey egpegkihet te ngipen dan,
wey egkahi sikandan,
“Nahuhus tad en iya sikandin!
Seinid en iya ka dengan te re egtetahari. Ne kuntee, natuman en iya!”
17 Inggimu en iya te Magbebaye ne Manama ka implanu rin ne eggimuwen
wey intuman din en iya ka naluhey e ne imbebentaan† Te Hibruwanen: suhu. din.
Warad iya neyid‑u sikandin te pegdereet din keykew.
Imbehayan din te kahalaan ka me kuntere nu,
wey indayan ka kabulut te me kuntere nu.
18 He Hirusalim,‡ Te Hibruwanen: alad te malitan ne anak. pangananaya nu ne egpuun te pusung nu ka Manama!
Sinehew ka te aldew wey marusilem taman te egbaggiyu ka luwe nu iling te weyig!
Kene ka himeley;
kene ka peeneng-eneng ka egsinehew!
19 Enew ka te marusilem, wey kene ka engked ka egpangananey te Manama!
Ibusbus nu diye te tangkaan te Magbebaye ka langun ne naheram nu iling te weyig!
Ampu ka te Manama§ Te Hibruwanen: Kayawa nu ka belad nu diye te Manama.
para te keupianan te me anak nu,
egkengalepu e sikandan diye te deralanen* Te Hibruwanen: tupuan te tagse dalan. ka egmanggutasan.
20 He Magbebaye ne Manama, tengteng ka!
Pitawa key nikeykew se impaantus nu.
Kene ne eleg ne igpakeen nu te me iney ka me anak dan ne in-anak dan iya!
Kene ne eleg ne egpeyimatayan nu ka me prupita diye te timplu nu!
21 Nenekeyibat diye te me deralanen ka me bate-bate wey ka me buyag e;
nahule te kampilan ka me kanakan wey ka me mengebay.
Immangimatayan nu sikandan te nabelu-belu ka,
wey warad iya hid‑u nu te peggule nu kandan.
22 Impanginggat nu ka me kuntere ku ne nakalingut keddi eyew te peglusud keddi,
ne iling de te migpanginggat ka te timpu te sahakeen;
te timpu te langet nu, warad iya nasame ne nakapallahuy;
inggule pangimatayi te me kuntere ku ka me anak ku ne impatulin wey impalangge ku.
*2:1 Te Hibruwanen: puun te langit peendiye te tane.
†2:1 Te Hibruwanen: diekanan din.
‡2:4 Te Hibruwanen: balungbalung te anak ne malitan te Siyun.
§2:5 Te Hibruwanen: in-abeleng.
*2:5 Te Hibruwanen: Impamasulug din ka peglungku wey pegkalange para te anak ne malitan te Huda.
†2:6 Te Hibruwanen: leeb.
‡2:10 Iyan igpasabut kayi ka meitem wey egdehes ne manggad ne inggimu puun te bulbul te kambing ne igsaluub te timpu te peglungku wey ke eg-inniyug naa te sale.
§2:11 Nasamuk ka pusung ku.
*2:13 Te Hibruwanen: malitan ne anak te Hirusalim.
†2:17 Te Hibruwanen: suhu.
‡2:18 Te Hibruwanen: alad te malitan ne anak.
§2:19 Te Hibruwanen: Kayawa nu ka belad nu diye te Manama.
*2:19 Te Hibruwanen: tupuan te tagse dalan.