1 Daruwa ne pulu wey sabeka (21) ka idad ni Sidikiyas te neyimu sikandin ne Hari, wey mighari sikandin diye te Hirusalim te sapulu wey sabeka (11) ne leg‑un. Si Hamutal ne anak ni Hirimiyas ne matig-Libna ka iney rin. 2 Ne mareet ded degma ka hinimuwan ni Hari Sidikiyas diye te Magbebaye ne Manama, iling te langun ne hinimuwan ni Hari Huwakim. 3 Purisu nalangetan amana ka Magbebaye ne Manama te keet-etawan te Hirusalim wey te Huda, wey indeldel rin e sikandan.

Nataman migribildi e si Sidikiyas ki Nibukadnisar ne Hari te Babilunya. 4  ✡ Isi 24:2.Purisu te igkasapulu ne aldew te igkasapulu ne bulan te igkasiyam ne leg‑un te peghari ni Sidikiyas, inlusuran e ni Nibukadnisar ne Hari te Babilunya ka Hirusalim. Migkekampu sikandan diye te lihawangan te siyudad, wey inlingutan dan tamunduwi te tane ka matikang wey makepal ne batu ne alad te Hirusalim eyew egpakaseled sikandan. 5 Inlingutan dan ka siyudad taman te igkasapulu wey sabeka (11) ne leg‑un te peghari ni Sidikiyas. 6 Ne nataman, warad e egpekeuyan te egkakeen diye te siyudad, purisu nakaselerep e te bitil ka me etew. Te igkasiyam ne aldew te igkeep‑at ne bulan te seeye ded ne leg‑un, naamin e ka egkakeen diye te siyudad. 7  ✡ Isi 33:21.Ne nataman nahebe e te me sundalu ne me matig-Babilunya ka alad te siyudad ne matikang wey makepal ne batu. Purisu migpallahuy e si Sidikiyas duma te langun ne sundalu rin te timpu te marusilem minsan inlingutan e te me matig-Babilunya ka siyudad. Diye sikandan migbaye te pinamulaan te Hari dapit te gumawan ne eletanan te daruwa ne alad te siyudad ne matikang wey makepal ne batu, wey miggendiyad e sikandan te napu te Araba. 8 Piru inlupug sikandan te me sundalu te Babilunya, wey neumaan sikandan diye te napu te Hiriku. Ne in-engkeran e si Hari Sidikiyas te me sundalu rin ne nekegsuwey-suwey. 9 Ne indakep dan e si Hari Sidikiyas wey in-uyan dan e diye ki Hari Nibukadnisar ne diye te siyudad te Ribla ne sakup te nasud te Hamat. Ne diye, inggukuman e sikandin ni Hari Nibukadnisar. 10 Ne impeyimatayan e ni Nibukadnisar ka me lukes ne anak ni Sidikiyas diye te tangkaan din, lagkes ka langun ne upisyal te Huda. 11  ✡ Isi 12:13.Ne impakulewut e ni Nibukadnisar ka mata ni Sidikiyas. Ne impabaku e sikandin te keddina wey in-uyan e diye te Babilunya. Ne imprisu rin si Sidikiyas diye taman te migpatey e sikandin.

12 Te igkasapulu (10) ne aldew te igkalimma ne bulan te igkasapulu wey siyam (19) ne leg‑un te peghari ni Nibukadnisar te Babilunya, nakaseled e te Hirusalim si Nibusaradan ne pangulu te me talagbantey te Hari te Babilunya. 13  ✡ 1Har 9:8.Ne insilaban din e ka timplu te Magbebaye ne Manama, ka palasyu te Hari, lagkes ka langun ne baley diye te Hirusalim, wey ka me baley te inila ne me etew te Hirusalim. 14 Ne impangguhus e te me sundalu rin ka me matikang wey makepal ne batu ne alad te siyudad. 15 Ne impandakep e ni Nibusaradan ka me etew ne nenasame diye te siyudad, lagkes ka me etew ne egkengaayu-ayu, wey ka me etew ne miggural e te me sundalu te Hari te Babilunya, lagkes seeye se me mangngateu ne trabahanti. 16 Piru immanggaat din de diye te Huda ka duma ne subla ne egkaayu-ayu, eyew sikandan ka egtanggu te me parasan wey te me kamet.

17  ✡ 1Har 7:15-47.Ne ingguhus te me matig-Babilunya ka daruwa ne sungkaleg ne me burunsi diye te timplu, ka burunsi ne kerumata, wey ka pelenggana ne burunsi ne egngaranan te “Ka Dahat”. Ne impanguyan dan e seini langun diye te Babilunya. 18 Impanguyan dan ka me kuren ne inggimu puun te tane, me pala, ka igpanempug te pebilu te sulu, me yahung, me ubab, wey ka langun ne kasangkapan ne burunsi ne inggamit diye te timplu. 19 Impanguyan dan man‑e ka langun ne bulawan wey pelata ne me kasangkapan: ka dereisek ne me pelenggana, me tahuanan te baha, me yahung, me kuren, me tahuanan te sulu, me ubab, wey me yahung ne eggamiten te eg-itis te ighalad ne binu. 20 Ne kenad egkatimbang tenged te kabehat ka daruwa ne burunsi ne sungkaleg diye te timplu, ka dakel ne pelenggana ne egngaranan te, “Ka Dahat” wey ka burunsi ne sapulu wey daruwa ne turu ne baka ne in-unturan kayi, wey ka me kerumata. Ka sika langun, impeyimu dengan ni Hari Sulumun para te timplu te Magbebaye ne Manama. 21 Ka tagse sungkaleg, me walu ne mitrus se kalayat wey lalimma wey liware ne mitrus se kalibusen. Makeung ka taliware kayi wey me hep‑at ne pulgada se kakepal. 22 Ne ka ulu-ulu te tagse sungkaleg, subla te daruwa ne mitrus se katikang, wey indayan-dayanan te burunsi ne immegsumbalak ne imbeleberan te daruwa ne dangdang ne burunsi red ne impeiling te prutas ne egngaranan te granada. 23 Sabeka ne gatus langun ka prutas ne impeiling te granada diye te tagse sungkaleg, wey egkakita ka siyam ne pulu wey hen‑em (96) kayi ke egleng-ahen.

24 Ne impandakep man‑e ni Nibusaradan ensi Sirayas ne Labew ne Talagpanubad, si Supuniyas ne sinalihan ni Sirayas, wey ka tatelu ne upisyal te timplu. 25 Ne indakep din degma ka upisyal te me sundalu, wey ka pitu ne talagtambag te Hari ne diye pad te siyudad, wey ka sikritari te upisyal ne impiyalan te pegpanlista te me etew ne egsundaluwen, wey ka duma pad ne hen‑em ne pulu (60) ne me etew ne nakita diye te siyudad te Hirusalim. 26 Ne impanguyan sikandan langun ni Nibusaradan diye te Hari te Babilunya ne diye te Ribla. 27 Ne impahumian sikandan te Hari te Babilunya wey impeyimatayan e.

Purisu naddakep wey neuyan e ka keet-etawan te Huda peendiye te lein ne me nasud. 28 Ne seini ka listaan te me etew ne impandakep ni Nibukadnisar: te igkapitu ne leg‑un te peghari din, nakarakep sikandin te tatelu ne libu wey daruwa ne pulu wey tatelu (3,023) ne etew; 29 te igkasapulu wey walu (18) ne leg‑un te peghari din, nakarakep sikandin te walu ne gatus wey tatelu ne pulu wey daruwa (832) ne etew puun te Hirusalim; 30 te igkararuwa ne pulu wey tatelu (23) ne leg‑un te peghari din, nakarakep si Nibusaradan te pitu ne gatus wey hep‑at ne pulu wey lalimma (745) ne etew. Ne migginguma langun te hep‑at ne libu wey hen‑em ne gatus (4,600) ka me etew ne indakep din.

31 Te igkatatelu ne pulu wey pitu (37) ne leg‑un te pegkarakepi ki Huwakin ne Hari te Huda, neyimu e ne Hari te Babilunya si Ibil-Mirudak. Te an-anayan ne leg‑un te peghari din, impalihawang din e si Huwakin. Neyitabu seini te igkararuwa ne pulu wey lalimma (25) ne aldew te igkasapulu wey daruwa (12) ne bulan. 32 In-upianan ni Ibil-Mirudak si Huwakin, wey imbehayan din te dakel ne katungdanan du te duma ne me Hari ne indakep degma wey in-uyan diye te Babilunya duma kandin. 33 Ne warad e migsaluub si Huwakin te kumbale din te pinirisu, wey eglagpu e sikandin te Hari ne egkeen tagse aldew. 34 Ne tagse aldew te manekal pad sikandin, egbehayan sikandin te Hari te Babilunya te langun ne ingkeilangan din taman te migpatey e sikandin.