3
Ka geyinawa te Manama
1 Sikeddiey ka nakasalerep te pegbayad-bayad tenged te langet* Te Hibruwanen: lampes. te Manama.
2 Indeldel a nikandin wey in-uyan diye te marusilem wey warad iya malayag.
3 Inlibliberan ad iya nikandin te eggumi te naapunan.
4 In-usak din te pali ka lawa† Te Hibruwanen: laplap wey sapu. ku,
wey impanlupet din ka me tul‑an ku.
5 Neelin ne kalasayan wey keyirapan ka impeula-ula‡ Te Hibruwanen: imbukusan. rin keddi.
6 Impeugpa a nikandin diye te marusilem,
iling te etew ne dengan de migpatey.
7 Impalingutan a nikandin te matikang wey makepal ne alad ne batu eyew kena a egpakapallahuy;
imbaku a nikandin te mabehat ne keddina.
8 Minsan migpangumew wey migpangananey a kandin,
piru ware din linglingaa ka tubtubaren ku.
9 In-atangan din te batu ne immeg-untud-untud ka dalan ne egbayaan ku;
inggimu rin ne malised ka langun ne dalan ku.
10 Egpekeiling sikandin te usu ne mig-atang keddi,
wey egpekeiling sikandin te liyun ne miggepas te egdawiyen din.
11 Inlupug a nikandin wey impasuwey te bayaanan ku;
indeesan a wey in-engkeran a nikandin ne egkabigtawan e.
12 Imbengat din ka piet,
wey impatangke din keddi te egpaneen din.
13 Impeenep-enep din te lawa ku ka me tunud din.
14 Neyimu ad ne kangisiyan te me etew,
wey egkaapunan de iya sikandan ka nangulahing ne egsusumpalit keddi.
15 Imbaybayaran a nikandin patamtamani§ Te Hibruwanen: Innipenu a nikandin te mapeit, wey impakeen te mapeit ne pinamula.
wey naneem-neem kud ka kasakit.
16 Impangasngas a nikandin te me batu wey nallupu ka me ngipen ku,
wey impangugngug a nikandin te abu.
17 Warad e keupianan ku wey nalingew ad ke mamenu ka kahalaan.
18 Sikan naa ka migkahi a, “Naawe e ka kanekal ku,
wey naawe e ka langun ne egkapallateng ku diye te Magbebaye ne Manama.”
19 Ke egkasuman-suman ku ka naneem-neem ku ne kalasayan wey keyirapan,* Te Hibruwanen: egkaleugleug ne peg-ugpe.
egpekeiling seini kapeit te aperu wey te mapeit ne pinamula.
20 Layun ku seini egkasuman-suman wey amana a eglungku.
21 Piru egpakalibed ka pegpallateng ku ke egkasuman-suman ku ne:
22 Ka geyinawa ne kene egkabalbalawan te Magbebaye ne Manama, kene iya egkataman,
wey kene egkaawe ka hid‑u rin.
23 Due layun seini te tagse aldew;
amana iya sikandin ne matinumanen.
24 Migkahi a diye te geyinawa ku, ‘Ka Manama re ka langun para keddi, sikan naa ka diye e re te kandin egpallateng.’
25 Amana ne meupiya ka Magbebaye ne Manama te seeye se egsalig kandin,
wey te seeye se egparani diye te kandin.
26 Meupiya ne kene egkapelaan† Te Hibruwanen: kene eglalag-lalag. seeye se egtetahad te kaluwasan ne egpuun te Magbebaye ne Manama.
27 Egpakameupiya te etew ka egkateu ne eg-antus te keyirapan te bate-bate pad sikandin.
28 Seeye se impeyirapan, keilangan ne egpeeneng-eneng wey egpinpinnuu re ne egsabsabeka.
29 Keilangan ne egpariralem‡ Te Hibruwanen: eg-usengul diye te tane. sikandin,
su kema ke duen pad egkapallateng din.
30 Egpatagpi sikandin te seeye se egkeupian ne egtagpi kandin wey balahad e ke egpeyilawan sikandin.
31 Su hiid‑uwen ka Magbebaye ne Manama wey kene egbalahad te minsan hentew.
32 Ne minsan egpalaggawen din ka me etew, piru kene iya egkaawe ka hid‑u rin
su dakel amana ka geyinawa rin ne kene egkabalbalawan,
33 su kene din igkeupii ne egpaantusen wey ke egpasakitan naa ka me etew.
34 Kene egkeupian ka Magbebaye ne Manama ne eglaslasayen ka langun ne me pinirisu kayi te inged,
35 wey kene sikandin egkeupian ne kene ne eleg ka peggukum te senge-etew.
36 Kene degma sikandin egkeupian ne kene ne meupiya ka peggukum te sabeka ne etew.
37 Hentew‑a ka eglalag wey egkatuman iya se eglalahen, gawas ke intuhut seini te Manama ne egkeyitabu?
38 Kene naa ne diye egpuun te Amana ne Mabantug ne Manama§ Te Hibruwanen: Be-be te Amana ne Matikang. ka meupiya wey karereetan ne egginguma?
39 Egpakasagsahukul naa ka etew* Te Hibruwanen: etew ne due umul. ke egparusaan sikandin te Magbebaye ne Manama tenged te sale din?
40 Eg-ug-ugsiyen ta ka me hinimuwan ta,
wey eglibed ki diye te Magbebaye ne Manama!
41 Eglehet-lehet ki egparani te Manama
wey ampu ki te mapahetpet† Te Hibruwanen: kayew.
diye te kandin diye te langit,
42 “Migsupak key wey migsukul key keykew,
wey ware key pasayluwa nikeykew.
43 “Nangebel-ebel ka langet nu kanami wey inlupug key nikeykew,
wey warad iya hid‑u nu te pegpangimatey kanami.
44 Migbubunbun ka te gapun
eyew kene egpakaleus ka peg-ampu ney keykew.
45 Inggimu key nikeykew ne malindit
iling te lapek ne maligsem diye te tangkaan te duma ne me nasud.
46 “Imbaley-baley key te langun ne me kuntere ney.
47 Nakaheram key e te liyas, wey migsahap key e,
wey nalasey key e, wey nareetan se peg-ugpe.
48 Migtulayas ka luwe ku iling te beuhan
tenged te karereetan ne neyingumaan te keet-etawan ku.
49 “Kene egkataman ka pegtulayas te luwe ku
50 taman te egpantew e ka Magbebaye ne Manama puun te langit
wey egkakita rin ka keet-etawan din.
51 Nalaggew ka pusung ku te pegkakita ku te neula-ula te langun ne me malitan diye te siyudad ku.
52 “Egpekeiling a te bayaku ne inggingutel te me kuntere ku minsan ware egpuunan.
53 In-ulug a nikandan ne manekal diye bitu wey insengseng dan e te batu ka be‑be te bitu.
54 Naalep a te weyig wey natimpaan e ka ulu ku,
wey kahiyen ku ne seeyad e ka patamanan ku.
55 “Migpangumew a keykew,‡ Te Hibruwanen: ngaran nu. He Magbebaye ne Manama, te diya a te kinariraleman te bitu,
56 wey narineg nu ka pegpangananey ku,
‘Kene nu sagpengi ka talinga nu te egpabulig keykew!’
57 In-umew ku sikeykew wey imparaniyan a nikeykew,
wey migkahiyan a nikeykew, ‘Kene ka kaaldek!’
58 “Imbulihan a nikeykew, Magbebaye ne Manama,
wey inluwas nu ka umul ku.
59 Nakita nu, Magbebaye ne Manama, ka mareet ne inggimu ran keddi,
purisu lapihi nu ka guhuren ku pinaahi te eleg ne peggukum.
60 Nakita nu ne egkeupian sikandan ne egsuli keddi,
wey nakanengneng ka te langun ne mareet ne implanu ran keddi.
61 “He Magbebaye ne Manama, narineg nu ka pegbaley-baley ran keddi;
nakanengneng ka te langun ne mareet ne implanu ran.
62 Iyan de himu te me kuntere ku te egkaapunan ka egtaleseb wey eglelalis keddi.
63 Tengtengi nu sikandan! Te langun ne timpu, sikeddi de iya ka egsusumpaliten dan te peg-ulahing dan.
64 “Sulii nu sikandan, he Magbebaye ne Manama, sumale te me hinimuwan dan.
65 Paantusa nu sikandan, wey ipaneem-neem nu ka dilus nu kandan!
66 Panlupuha nu sikandan tenged te langet nu wey gulaa nu sikandan langun minsan hendei sikandan,§ Te Hibruwanen: diralem te langit te Magbebaye ne Manama. he Magbebaye ne Manama.”
*3:1 Te Hibruwanen: lampes.
†3:4 Te Hibruwanen: laplap wey sapu.
‡3:5 Te Hibruwanen: imbukusan.
§3:15 Te Hibruwanen: Innipenu a nikandin te mapeit, wey impakeen te mapeit ne pinamula.
*3:19 Te Hibruwanen: egkaleugleug ne peg-ugpe.
†3:26 Te Hibruwanen: kene eglalag-lalag.
‡3:29 Te Hibruwanen: eg-usengul diye te tane.
§3:38 Te Hibruwanen: Be-be te Amana ne Matikang.
*3:39 Te Hibruwanen: etew ne due umul.
†3:41 Te Hibruwanen: kayew.
‡3:55 Te Hibruwanen: ngaran nu.
§3:66 Te Hibruwanen: diralem te langit te Magbebaye ne Manama.