1 Ne migkahiyan te Magbebaye ne Manama si Muwisis, “Kahii nu ka me talagpanubad ne kabuhalan ni Aarun: Kene kew duma te eglebeng minsan te karumaan niyu su egkeisip kew ne malindit, 2 angin e ke amana niyu pad iya sikandin ne karumaan iling te iney niyu, amey, me anak, me suled, 3 wey ke atebey niyu naa ne ware pad nakaasawa wey sikaniyu pad ka eg-uyag. 4 Keilangan ne kene kew duma te eglebeng te karumaan te asawa niyu su egkeisip kew ne malindit.

5  ✡ Lib 19:27-28; Diy 14:1.“Kene niyu kahisi ka ulu niyu wey ke sumpe naa wey ke panultulisi naa ka me lawa niyu. 6 Keilangan ne igteil niyu ka pegkeetew niyu para keddi te Manama niyu, wey kene niyu balbalaya ka ngaran ku. Keilangan ne matulus kew su sikaniyu ka egpanubad te egkakeen ne egtutungen kayi te keddi te Magbebaye. 7 Kene kew asawa te malitan ne egpamelegye te lawa wey ke nabaley-baley e ne malitan, wey ke in-engkeran e te asawa, su inteil ku sikaniyu para keddi. 8 Keilangan ne eg-isipen kew ne matulus te me duma niyu ne kabuhalan ni Israil tenged su sikaniyu ka egpanubad te egkakeen diye te Manama. Keilangan ne eggimuwen niyu sika su sikeddi se Magbebaye, matulus a wey sikeddi ka migmatulus kaniyu. 9 Ke due anak niyu ne malitan ne egpamelegye te lawa wey egpakapeyilew kaniyu, keilangan ne egsilaban niyu sikandin.

10 “Ne ka Labew ne Talagpanubad iyan pangulu te langun ne me talagpanubad. In-itisan sikandin te lana te peg-alam kandin wey imbehayan te katenged ne egsaluub te kumbale te talagpanubad. Sikan naa ka kene din eggusengen ka bulbul din wey kene din eggisgisien ka insaluub din. 11-12 Ne tenged su neitisan e sikandin te lana te peghalad kandin kayi te keddiey te Manama rin, keilangan ne kene din eg-engkeran ka Balungbalung, wey kene eggendiye te baley ne due migpatey, minsan ke amey rin pad sikandin wey ke iney rin naa eyew kene eg-isipen ne malindit ka Balungbalung. Sikeddiey ka Magbebaye ne Manama. 13 Keilangan ne ware pad neyilabeti ka eg-asaween din. 14 Keilangan ne kene sikandin eg-asawa te malitan ne balu wey ke malitan naa ne in-engkeran te asawa rin wey ke malitan naa ne egpamelegye te lawa. Keilangan ne iyan din eg-asaween ka malitan ne ware pad neyilabeti wey karumaan din ded, 15 eyew kene egkalinditan ka kabuhalan din su sikeddiey ka Magbebaye ne Manama ka migmatulus kandin.”

16 Ne migkahiyan e man‑e te Magbebaye si Muwisis, 17 “Kahii nu si Aarun te kene egkaayun ne eg-uyan te egkakeen ne igpanubad diye te Manama ka me kabuhalan din ne nabalbalangan se lawa kuntee lagkes ka langun ne egpakasinundul pad ne kabuhalan din. 18 Kene egkaayun ka butud, pungku, nabalbalangan se ulaula wey ke lawa naa, 19 nahepu se paa wey ke belad naa, 20 napeku wey ke deisek ne etew, seeye se due dalu te mata wey ke seeye naa se due kehang, wey seeye se kene egpakaanak. 21 Kene egkaayun ne egpakapanubad te igdasag din te Magbebaye ne Manama ka nabalbalangan ne me kabuhalan ni Aarun ne talagpanubad. Ne tenged te nabalbalangan sikandin, kene sikandin egkaayun ne egpakahalad te egkakeen para te Manama. 22 Piru egpakakeen ded sikandin te igpanubad ne egkakeen diye te Manama, matulus ma wey se amana ne matulus ne egkakeen. 23 Piru tenged te nabalbalangan sikandin, keilangan ne kene sikandin egseled diye te Amana ne Matulus ne Sinabeng wey ke diye naa te altar eyew kene din egkabaley-baley ka Matulus ne Ugpaan ku, su sikeddiey ka Magbebaye ne migmatulus te Balungbalung.”

24 Purisu, ingguhud seini langun ni Muwisis ki Aarun wey te me anak din ne me lukes, wey te langun ne kabuhalan ni Israil.