1 Ne migkahiyan te Magbebaye ne Manama si Muwisis, 2 “Kahii nu si Aarun wey ka me kabuhalan din te egpatantanuran kandan ka me halad te kabuhalan ni Israil keddi eyew kene egkabaley-baley ka matulus ne ngaran ku. Sikeddiey ka Magbebaye. 3 Ne ka minsan hentew te me kabuhalan din lagkes ka langun ne egpakasinundul pad ne kabuhalan din, ne in-isip ne malindit ne egdani te egkakeen ne inhalad e keddi te kabuhalan ni Israil, egdeldelen e sikandin puun te tangkaan ku. Sikeddiey ka Magbebaye.

4 “Kene egkaayun ne egkeen te egkakeen ne impanubad e ka kabuhalan ni Aarun ne duen e ibung wey ke duen naa eglihawang diye te lebut din. Egpakakeen de sikandin te egkakeen ne inhalad e ke egmalinis e sikandin. Ne eg-isipen man‑e sikandin ne malindit ke egpakahen-gen sikandin te migpatey wey ke etew naa ne miglihawangan te muntus, 5 wey ke nakasamsam naa sikandin te mananap ne egdul‑ug wey egpananap wey ke nakasamsam naa sikandin te etew ne in-isip ne malindit. 6 Ka minsan hentew ne talagpanubad ne egpakasamsam te minsan nekey te mananap ne egdul‑ug wey egpananap wey te etew ne in-isip ne malindit, egmalindit taman te egkasagkup wey kene egpakakeen te egkakeen ne inhalad e, angin e ke egpamanihus sikandin. 7 Ne saliet de te eglineb e ka aldew, egmalinis e sikandin wey egpakakeen e sikandin te egkakeen ne inhalad e diye te Manama su sika iya ka pegkeen din. 8 Kene sikandin egkeen te minsan nekey ne napatey re due wey ke inggimatayan naa te duma ne mananap eyew kene sikandin egkeisip ne malindit. Sikeddiey ka Magbebaye ne Manama.

9 “Keilangan ne egtumanen dan ka insuhu ku kandan eyew kene sikandan egpakasale wey kene egpatey tenged te pegsupak dan kayi. Sikeddiey ka Magbebaye ne migmatulus kandan.

10 “Kene egpakakeen te inhalad ne egkakeen ka kene ne karumaan te me talagpanubad. Ne kene man‑e egpakakeen due ka mahaliyug te talagpanubad wey ka insuulan din naa ne trabahanti. 11 Piru ka imbeli rin ne uripen wey ka neetew diye te baley rin, kaayun ded ne egpakakeen due. 12 Kene man‑e egpakakeen te immanubad e ka me malitan ne anak te talagpanubad ne mig-asawa te kene ne talagpanubad. 13 Piru ke nabalu e ka malitan wey ke nekeg-engked naan e sikandin te asawa rin, wey ware nakaanak, egpakakeen e sikandin te pegkeen te amey rin. Piru kene iya egkaayun ne egkeen kayi ka kene ne karumaan te talagpanubad.

14 “Ke due egpakakeen te inhalad e ne ware din tuyui, eg-ulian din ka talagpanubad te nakeen din wey egtimulan din pad ka bali te nakeen din te daruwa ne pulu (20) ne pursintu. 15 Keilangan ne kene egkabaley-baley te talagpanubad ka inhalad e te me kabuhalan ni Israil diye te Magbebaye ne Manama. 16 Kene nu iya sikandan pakeena rue te inhalad e eyew kene sikandan egpakasale wey egparusaan. Sikeddiey ka Magbebaye ne migmatulus kandan.”

17 Ne migkahi man‑e ka Magbebaye ki Muwisis, 18 “Kahii nu si Aarun wey ka me kabuhalan din ne me lukes wey ka langun ne kabuhalan ni Israil, wey ka me lapu te Israil. Emun ke iyan niyu igpanubad ka egtutungen ne igpanubad isip pegtuman te impahunlibet niyu wey ke igdasag niyu naa, 19 keilangan ne lukesan ne baka, lukesan ne karniru, wey ke kambing naa ne ware nabalbalangi eyew egdawaten ku ka igpanubad niyu. 20  ✡ Diy 17:1.Kene kew panubad te nabalbalangan su kene ku sika egdawaten. 21 Emun ke iyan niyu igpanubad ka igpanubad para te keupianan eyew igpanubad isip pegtuman te impahunlibet niyu wey ke igdasag naa, keilangan ne baka wey ke karniru naa ne ware nabalbalangi eyew egdawaten ku seini. 22 Kene egkaayun ne igpanubad keddi ka mananap ne butud, nalepuan, napalian, due kehang, wey due kaliskis. Kene egkaayun ne egtutungen sika diye te altar eyew igdasag keddi. 23 Egkaayun ne igpanubad niyu eyew igdasag ka baka wey ke nati te karniru naa ne nabalbalangan piru kene egkarawat ne igpanubad seini eyew te pegtuman te impahunlibet niyu ne eggimuwen. 24 Kene egkaayun ne igpanubad niyu keddi ka mananap ne nalupet se butu, napigse, nakepun wey ke napalian naa. Kene niyu iya seini himuwa diye te inged niyu.

25 “Kene egkaayun ne igmanubad niyu ka me ayam ne egkuen niyu puun te me lapu su in-isip sika ne nabalbalangan wey kene seini egdawaten.”

26 Ne migkahiyan e man‑e te Magbebaye ne Manama si Muwisis, 27 “Ka iyam eglesut ne baka, karniru wey ke kambing naa, keilangan ne kene pad egpitasen diye te iney te pitu ne aldew. Piru ke egsuble e te pitu ne aldew, egkaayun e ne igpanubad sika keddiey. 28 Kene niyu peglegsaa te egpanubad te sikan ded ne aldew ka talaanak ne baka, wey ke talaanak ne karniru. 29 Ke eggilang kew te igpanubad eyew te pegpasalamat keddi, ikula niyu ka eleg ne paahi te pegpanubad kayi eyew egdawaten ku seini. 30 Keilangan ne eg-aminen niyu re seini te egkeen te sikan de ne aldew wey kene kew sesame taman te egkapawe. Sikeddiey ka Magbebaye ne Manama.

31 “Tantanuri niyu wey tumana niyu ka me suhu ku. Sikeddiey ka Magbebaye. 32 Kene niyu balbalaya ka matulus ne ngaran ku wey keilangan ne eg-ileen a nikaniyu ne matulus. Sikeddiey ka Magbebaye ka migmatulus kaniyu, 33 wey migpaawe kaniyu puun te Ihiptu eyew egkeyimu a ne Manama niyu. Sikeddiey ka Magbebaye.”