1 Ne miglibulung ka langun ne etew diye te plasa ne egkatangkaan te Gumawan te Weyig. Ne ingkahiyan dan si Isra, ka mangngateu te Balaud te Manama ne igpeuyan ka baseen te Balaud ni Muwisis ne insuhu te Magbebaye ne Manama te Israil. 2 Sikan naa, te an-anayan ne aldew te igkapitu ne bulan, in-uyan ni Isra ne talagpanubad ka Balaud diye te tangkaan te miglibulung ne me lukes, me malitan, wey me bate ne egtulik e. 3 Ne imbasa rin te meemen ka baseen te Balaud diye te tangkaan te me etew ne miglibulung diye te Gumawan te Weyig, puun te maselem-selem taman te meudtu. Ne amana migpammineg ka langun ne etew te nakasulat dutu.

4 Ne migsasindeg si Isra, ka talagpanulu te Balaud te Manama diye te ampew te inlantawan ne kayu eyew eggamiten te seeye ne peglibulung. Ne ka migsasindeg diye te igkakawanan din si Matitiyas, si Sima, si Ananiyas, si Uriyas, si Hilkiyas, wey si Maasiyas. Ne ka diye te igkahibang din si Pidayas, si Misail, si Malkiyas, si Hasum, si Hasbaddana, si Sakariyas, wey si Misulam.

5 Egkakita si Isra te langun ne etew su matikang ma ka migsasindehan din. Te imbelat din e ka baseen, migsasindeg e ka langun ne etew. 6 Ne indeyrey ni Isra ka Magbebaye ne Manama, ka mabantug ne Manama. Ne ingkayew te me etew ka me belad dan wey migtabak sikandan, “Malehet iya! Malehet iya!” Nataman, mig-usengul e sikandan diye te tane wey migsimba te Magbebaye ne Manama.

7 Ne migsasindeg e ka me etew wey impasabut e kandan ka Balaud. Ka migpasabut kandan iyan ensi Huswi, si Bani, si Siribiyas, si Hamin, si Akub, si Sabitay, si Hudiyas, si Maasiyas, si Kilita, si Asariyas, si Husabad, si Hanan, si Pilayas, wey ka me Libita. 8 Imbasa ran paay-ayari ka Libru te Balaud te Manama wey impasabut dan ka kaluwasan te Balaud su eyew egpakasabut ka me etew.

9 Naninehew ka me etew te pegkarineg dan dutu. Ne si Nihimiyas ne gubirnadur, si Isra ne talagpanubad wey mangngateu te Balaud te Manama, wey ka me Libita ka migpasabut kandan te migkahi, “Matulus ne aldew seini diye te Magbebaye ne Manama niyu, purisu kene kew lungku wey ke pandalawit naa.” 10 Ne migkahi si Nihimiyas kandan, “Hendiye kew e wey keen kew te me mananam ne egkakeen, wey inum kew te me meemis ne binu. Pamehayi niyu te egkakeen ka ware egkakeen su matulus para te Magbebaye ne Manama ka seini aldew. Kene kew lungku su ka kahale ne imbehey te Manama iyan egpakabehey kaniyu te kanekal.”

11 Ne impapeeneng-eneng degma te me Libita ka langun ne etew te migkahi, “Peeneng-eneng kew su matulus seini ne aldew. Kene kew lungku.” 12 Ne nangipanew e ka langun ne etew eyew egkeen wey eg-inum, wey egpamehey te egkakeen. Miggale-gale sikandan su nakasabut ma sikandan te impanengneng kandan.

13 Te igkarangeb ne aldew, miglibulung diye ki Isra ne talagpanulu te Balaud te Manama ka langun ne pangulu te me pamilya, duma te me talagpanubad wey me Libita eyew te peg-ugsi-ugsi te nasulat diye te Balaud. 14  ✡ Lib 23:33-36,39-43; Diy 16:13-15.Ne nanengnengan dan ne nasulat diye te Balaud te Magbebaye ne Manama ne imbehey ki Muwisis ne egpaleleeben ka keet-etawan te Israil te timpu te sahakeen te igkapitu ne bulan, wey diye sikandan egpeuugpaa. 15 Ne keilangan man‑e ne igpanengneng wey egbanasalan ka langun ne lungsud wey diye te Hirusalim te seini: “Hendiye kew te me bubungan wey panguwa kew naa te me sugpang te ulibu, leew ne ulibu, mirtul, palmira, wey duma pad ne kayu ne malapung se dewun eyew eggimuwen ne leeb sumale te nasulat diye te Balaud.”

16 Sikan naa ka nangipanew e ka me etew wey nanguyan te me sugpang, wey nangimu e te me leeb diye te me atep* Mapatag ka atep te me Hudiyu. dan, diye te lama ran, diye te lama te timplu, wey diye te plasa ne marani te Gumawan te Weyig, wey diye te plasa ne marani te Gumawan ni Ipraim. 17 Ne nanleleeb e ka langun ne nekeuli ne naddakep te nangugpaan dan te timpu te sahakeen. Nahale amana sikandan tenged su seini pad man‑e neyimu te keet-etawan te Israil ka sahakeen puun dengan te timpu pad ni Huswi ne anak ni Nun. 18 Tagse aldew ne egbaseen ni Isra ka baseen te Balaud te Manama puun te an-anayan ne aldew te sahakeen taman te katammanan ne aldew. Migsahakeen sikandan te pitu ne aldew wey te igkawalu ne aldew, miglibulung sikandan diye te tangkaan te Manama.