1  ✡ Iks 25:31-40; 37:17-24.Ne ingkahiyan te Magbebaye ne Manama si Muwisis, 2 “Kahii nu si Aarun: ‘Emun ke egpareketan nud e ka me sulu, keilangan ne egkalayahan kayi ka diye te egkatangkaan te tahuanan te sulu.’ ” 3 Ne intuman seeye ni Aarun. Immareketan din e ka me sulu ne egkalayahan ka diye te egkatangkaan te tahuanan kayi sumale te insuhu te Manama ki Muwisis. 4 Indekdek ne bulawan ka intiru ne tahuanan te sulu, puun te diralem peendiye te dibabew; impeiling seini te impapitew te Manama ki Muwisis.

5 Ne ingkahiyan e man‑e te Magbebaye ne Manama si Muwisis, 6 “Ilein nu ka me kabuhalan ni Libi puun te duma ne me kabuhalan ni Israil wey matulusa nu sikandan. 7 Ilinga nu sikandan kayi te egmatulus: papespesiki nu sikandan te weyig ne eggamiten te peglinis, wey pakahisi nu ka intiru ne me lawa ran, wey papi‑pii nu kandan ka me kumbale dan. Ne pegkeimpus due, eg-isipen e sikandan ne matulus. 8 Ne peuyana nu sikandan te sabeka ne buuk ne turu ne nati te baka duma te halad ne egkakeen ne inggimu puun te meupiya ne klasi te harina ne insewuhan te mentika. Ne peuyana nu man‑e sikandan te lein ne turu ne baka isip igpanubad ne ig-awe te sale. 9 Ne libulunga nu ka langun ne kabuhalan ni Israil wey pasasindeha nu ka me kabuhalan ni Libi diye te katangkaan te Balungbalung ne Temuwanan. 10 Pasasindeha nu ka me kabuhalan ni Libi kayi te tangkaan ku wey ipatel-eb nu te me kabuhalan ni Israil ka me belad dan diye te me ulu te me kabuhalan ni Libi. 11 Ne si Aarun ka eghalad te me kabuhalan ni Libi kayi te tangkaan ku isip egkayawen ne halad para keddi puun te me kabuhalan ni Israil, eyew egpakapamakey sikandan keddi. 12 Ne igtel-eb te me kabuhalan ni Libi ka me belad dan diye te me ulu te daruwa ne turu ne nati te baka. Ka sabeka ne baka, igpanubad ne egtutungen, wey ka sabeka, igpalangesa eyew ig-awe te sale te me kabuhalan ni Libi.

13 “Pasasindeha nu ka me kabuhalan ni Libi diye te tangkaan ni Aarun wey te me anak din wey ihalad nu sikandan isip egkayawen ne halad para keddi. 14 Te seini ne paahi, igpakalein nu ka me kabuhalan ni Libi puun te me kabuhalan ni Israil, wey keddiey e sikandan. 15 Ke egkeimpusan nud te eglinis ka me kabuhalan ni Libi wey igpakahalad nud sikandan keddi isip ingkayew ne halad, egkaayun e sikandan ne eggimu te me himu ran diye te Balungbalung ne Temuwanan. 16 Sikandan ka me kabuhalan ni Israil ne iglein ne para re iya keddi, isip igliwan te langun ne lukes ne kinakakayan ne anak te me kabuhalan ni Israil. 17 Keddiey ka langun ne kinakakayan ne lukes ne anak te me kabuhalan ni Israil wey ka me panganey ne anak te me ayam dan. Te timpu ne impangimatayan ku ka langun ne lukes ne kinakakayan ne anak te me Ihiptuhanen, inlein ku mule ka langun ne lukes ne kinakakayan ne anak te me kabuhalan ni Israil wey ka me panganey ne anak te me ayam dan. 18 In-alam ku ka me kabuhalan ni Libi isip igliwan te langun ne lukes ne kinakakayan ne anak te me kabuhalan ni Israil. 19 Te langun ne me kabuhalan ni Israil, ka me kabuhalan ni Libi ka in-alam ku eyew egbulig ki Aarun wey te me anak din te pegtrabahu diye te Balungbalung ne Temuwanan, para te me kabuhalan ni Israil. Sikandan ka egpalangesa eyew te peglinis te sale te me kabuhalan ni Israil eyew kene sikandan egpatey ke egdani-rani te Balungbalung ne Temuwanan.”

20 Purisu inhalad ni Muwisis wey ni Aarun wey te kabuhalan ni Israil ka me kabuhalan ni Libi sumale te insuhu te Magbebaye ne Manama. 21 Immatulus te me kabuhalan ni Libi ka me pegkeetew ran wey impami‑pian dan ka me kumbale dan. Ne inhalad e sikandan ni Aarun isip ingkayew ne halad para te Magbebaye. Ne migpalangesa man‑e si Aarun te peg-awe te sale eyew egmatulus sikandan. 22 Pegkeimpus kayi, migseled e ka me kabuhalan ni Libi te Balungbalung ne Temuwanan eyew egtrabahu diye isip me talagbulig ki Aarun wey te me anak din. Inggimu te keet-etawan diye te me kabuhalan ni Libi ka langun ne insuhu te Magbebaye ki Muwisis.

23 Ne ingkahiyan te Magbebaye si Muwisis, 24 “Seini ka me balaud ne keilangan ne eg-ikulen te me kabuhalan ni Libi: keilangan ne egbunsud te pegtrabahu diye te Balungbalung ne Temuwanan ka me lukes ne kabuhalan ni Libi ne puun te daruwa ne pulu wey lalimma (25) se idad wey buyag-buyag e. 25 Ne keilangan ne eg-engked sikandan te trabahu ran ke eggingume e te lalimma ne pulu (50) ka idad dan. 26 Egbulig-bulig naan de sikandan te me duma ran ne kabuhalan ni Libi diye te Balungbalung ne Temuwanan, piru kene sikandan egkaayun ne iyan eggimu ke nekey ka eggimuwen. Sika ka me balaud ne keilangan ne igpeyimu nu te me kabuhalan ni Libi.”