1 Ne ingkahiyan te Magbebaye ne Manama si Muwisis, 2 “Suhu ka te me etew ne egpeiipaten diye te Kanaan—ka tane ne igbehey ku te me kabuhalan ni Israil. Keilangan ne ka tagse etew ne egsuhuen nu, sikan de se me pangulu te tagse tribu ni Israil.” 3 Ne intuman ni Muwisis ka insuhu kandin te Magbebaye; insuhu din ka me pangulu te tagse tribu ni Israil, puun te disirtu, diye te Paran. 4 Ne seini ka me ngaran dan: si Samuwa ne anak ni Sakur, ka pangulu te me kabuhalan ni Rubin; 5 si Sapat ne anak ni Huri, ka pangulu te me kabuhalan ni Simyun; 6 si Kalib ne anak ni Hipuni, ka pangulu te me kabuhalan ni Huda; 7 si Igal ne anak ni Husi, ka pangulu te me kabuhalan ni Isakar; 8 si Husiyas ne anak ni Nun, ka pangulu te me kabuhalan ni Ipraim; 9 si Palti ne anak ni Rapu, ka pangulu te me kabuhalan ni Binhamin; 10 si Gadil ne anak ni Sudi, ka pangulu te me kabuhalan ni Sabulun; 11 si Gadi ne anak ni Susi, ka pangulu te me kabuhalan ni Manasis ne kabuhalan ni Husi; 12 si Amil ne anak ni Gimali, ka pangulu te me kabuhalan ni Dan; 13 si Situr ne anak ni Maykil, ka pangulu te me kabuhalan ni Asir; 14 si Nabi ne anak ni Bupsi, ka pangulu te me kabuhalan ni Naptali; 15 si Giyuwil ne anak ni Maki, ka pangulu te me kabuhalan ni Gad.

16 Sikandan ka insuhu ni Muwisis ne egpeiipaten diye te tane te Kanaan. Ne inliwanan ni Muwisis ki Huswi ka ngaran ni Husiyas ne anak ni Nun.

17 Te ware pad sikandan paligkata ni Muwisis eyew te peg-iipat diye te tane te Kanaan, impanagtahaan din pad sikandan te migkahi, “Pangendiye kew te inged te Nigib, wey panakereg kew diye te bubungan, 18 wey pitawa niyu ke mamenu ka tane diye, wey ke me makeseg naa ka me etew diye wey ke magguye, ke masulug naa sikandan wey ke pila-pila re. 19 Pitawa niyu ke nekey ne klasi te inged ka impangugpaan dan—meupiya naa wey ke mareet. Mamenua ka me lungsud dan wey ke kampu naa—impalingutan naa te malig‑en, makepal, wey matikang ne alad wey ke ware, 20 ke meupiya naa ka tane diye wey ke kene, ke duen naa me kayu wey ke ware. Ne panihuru kew ne egpekeuyan kew te me behas te kayu ne egkakeen te peg-uli niyu.” Te seeye ne timpu iyan pegkekeyinuhi te me behas te paras.

21 Purisu nangendiyad e sikandan wey inleuy ran e ka tane puun te disirtu, diye te Sin, taman te Rihub ne marani te Hamat. 22 Ne nangendiyad sikandan te inged te Nigib taman te nekeuma sikandan diye te siyudad te Hibrun, ka nangugpaan enni Ahiman, ni Sisay, wey ni Talmay ne me kabuhalan te eleggasi ne egngaranan ki Anak. (Impasasindeg ka Hibrun seled e te pitu ne leg‑un te ware pad ipasasindeg ka siyudad te Suwan diye te Ihiptu.) 23 Te pegginguma ran diye te bangalug ne egngaranan te Iskul, migpanempug sikandan te me pungpung te paras ne due me behas wey inyayungan te tigdaruwa ne etew. Nanguyan degma sikandan te me prutas ne granada wey me iggira. 24 Ingngaranan ka seeye ne bangalug te Iskul* Te Hibruwanen: ka Iskul iyan igpasabut ka “me pungpung te paras.” tenged te me pungpung te me paras ne impanempug te me kabuhalan ni Israil diye.

25 Peglihad te hep‑at ne pulu (40) ne aldew te peg-iipat dan diye te tane te Kanaan, 26 nanlibed e sikandan diye ki Muwisis wey ki Aarun wey te keet-etawan te Israil diye te Kadis, ka disirtu, diye te Paran. Ne impangguhuran dan e ka keet-etawan te nakita ran, wey impapitew ran pad man‑e ka impanguyan dan ne me prutas. 27 Ne migkahi sikandan, “Inleuy ney ka tane ne impeendiyaan niyu kanami wey meupiya amana seeye ne tane wey seini red iya ka me prutas diye. 28 Piru maddesen ka me mahinged diye, wey malluag ka me siyudad dan ne impalingutan te malig‑en, matikang, wey makepal ne alad. Nenakita ney degma diye ka me kabuhalan ni Anak. 29 Ne ka me Amalikanen, iyan nangugpe te inged te Nigib. Ne ka me Hitihanen, me Hibusihanen, wey me Amurihanen, diye nangugpe te me bubungan. Ne ka me Kanaanen, diye nangugpe te ilis te dahat wey te ilis te Weyig ne Hurdan.”

30 Piru impape-peeneng ni Kalib ka keet-etawan ne egmanagsahukul diye te tangkaan ni Muwisis wey ingkahiyan, “Keilangan ne eggendiye kid kuntee ka eglusud wey eg-ahawen ta ka tane su egkaahew ta iya seini.”

31 Piru ka me etew ne migduma ki Kalib te mig-iipat migkahi, “Kene ta egkatalu sikandan su madmaresen sikandan kanta!” 32 Ne in-empet dan te egguhud te me kabuhalan ni Israil ka seini se ubat ne guhuren meyitenged te tane ne in-iipatan dan wey migkahi sikandan, “Ka tane ne in-iipatan ney, kene egpakabehey te dakel ne egkahaani eyew egkakeen te me etew, wey mallangkew wey derakel amana ka me etew ne nakita ney diye. 33  ✡ Hin 6:4.Nenakita ney degma diye ka me eleggasi ne me kabuhalan ni Anak. Egmekeiling de te me talangas ka peggeram-geram ney te pegkeetew ney wey iling ded degma ka pegpitew ran kanami.”