1 Anak, kene nu lingawi ka me lalag ku keykew wey tantanuri nu ka me suhu ku. 2 Pammineha nu ka pegpanulu ne egpakabehey te katagseb wey sumsumana nu ke nekey ka igpasabut kayi. 3 Pakannekal ka ne egpakaangken te katuenan te pegnengneng wey pegsabut. 4 Pamitawa nu seini iling te pegpamitew nu te seleppi wey ke me karatuan naa ne inggeles. 5 Ke eggimuwen nu seini, egkanengnengan nu ke nekey ka kaluwasan te pegkaaldek te Magbebaye ne Manama, wey egkasabut nu ka katuenan meyitenged kandin. 6 Ka Magbebaye ka migbehey te katagseb, wey diye te kandin egpuun ka katuenan te pegsabut. 7 Egbehayan din te katagseb seeye se me matareng wey egpangabangan din seeye se ware igkengarew‑ey. 8 Egtamengan din ka egbayaan te seeye se me matareng wey te seeye se me matinumanen kandin.

9 Emun ke egpammineg ka keddi, egkasabut nu ke nekey ka pegkamatareng, ka eleg ne peggukum, wey ka meupiya te duma. Egpakataha ka ke nekey ka eleg ne eggimuwen nu. 10 Egkeyimu ka ne matagseb wey egpakabehey keykew te kahale ka katuenan nu. 11 Egpakapangabang keykew ka katuenan nu te peg-alam wey egpakabulig keykew ka salabutan nu. 12 Ka katagseb ka egpakapaalihu keykew puun te seeye se maddeet se hinimuwan wey te seeye se maddeet ne egpanlelalag. 13 Migsuwey sikandan te maheteng ne peg-ugpe wey mig-ikul te eggimuwen te me etew ne diye te marusilem. 14 Egkengaaley sikandan ne eggimu te seyyup wey egkahale te maddeet ne hinimuwan dan, 15 mareet ka me batasan dan wey kene ne meupiya ka eggimuwen dan.

16 Ka katagseb degma ka egpakapaalihu keykew puun te baliyuten ne malitan ne egginalig keykew te mateles ne me lalag din. 17 In-engkeran te sika ne malitan ka lukes ne migpangasawa kandin te bate-bate pad sikandin. Inlingawan din e ka saad din te Manama te peg-asawa rin. 18 Ka dalan peendiye te baley rin, migleus diye te kamatayen. Ke egbaye ka te dalan peendiye te baley rin, iling de te migpeendiye ka te inged te me minatey. 19 Ware minsan hentew ne egbaye kandin ne egpakalibed pad, wey ke egpakatulitu naan pad te dalan peendiye te inged te me malenggew. 20 Purisu ilingi nu ka peg-ugpe te me matareng wey ikula nu ka dalan te meupiya ne me etew. 21 Su ka me meupiya se pegbebatasan wey ware igkarew‑ey, egpabulus ne eg-ugpe te seini ne inged. 22 Piru ka maddeet ne etew wey me limbungen, egkaawe te inged; egpamaruten sikandan iling te me hilamunen.