1 Anak, kene nu kalingawi ka impanulu ku keykew; tantanuri nu layun ka me suhu ku, 2 su egpakabehey sika keykew te malayat ne umul wey egpakabehey te keupianan. 3 Kene nud iya engkeri ka keupiya wey ka pegkamatinumanen, iling te balieg ne layun due te lieg nu, wey itines nu te pusung nu. 4  ✡ Luk 2:52.Emun ke eggimuwen nu sika, egkabennalan keykew ka Manama wey ka me etew.

5 Salig ka te Magbebaye ne Manama te intiru ne pusung nu wey kene ka salig te katuenan nu. 6 Sumsumana nu sikandin te langun ne eggimuwen nu wey egpanuluen ka nikandin te eleg ne egbayaan nu. 7  ✡ Rum 12:16.Kene ka suman-suman ne matagseb ka, kaaldeki nu ka Magbebaye wey pariyu ka te mareet. 8 Emun ke eggimuwen nu sika, egpekeiling sika te manedted ne delemetan ne egpakabawi te pali nu wey egpekeuli te tul‑an nu. 9 Tahura nu ka Magbebaye pinaahi te peghalad nu te karatuan nu wey te hun‑a ne baad te langun ne behas te pinamula nu. 10 Ke eggimuwen nu sika, egkapenu e ka lelapeng nu te eg-uma ne me pinamula nu, wey egbusuwe ka binu diye te tahuanan. 11  ✡ Hub 5:17.✡ Hib 12:5-6.Anak, kene nu isawile ka pegdisiplina keykew te Magbebaye, wey kene nu ikeenendueni seini, 12  ✡ Imp 3:19.su egdisiplineen te Magbebaye seeye se inggeyinawaan din iling te amey ne egdisiplina te anak din ne igkatelesi rin.

13 Due keupianan te seeye se nakaangken te katagseb wey pegsabut, 14 su subla pad seini ne dakel se karuan du te pelata wey dakel pad ka kentiddad du te bulawan, 15 wey labew pad seini ne impurtanti du te mahal ne me batu, wey ware minsan nekey ne igkeupii nu ne egpekeiling kayi. 16 Ka katagseb, egpakabehey te malayat ne umul, karatuan, wey kabantug. 17 Egpakameupiya seini te umul nu, wey egpakabehey keykew te keupianan. 18 Ka katagseb, egpekeiling te kayu ne egpakabehey te umul te seeye se egpakaangken kayi, wey keupianan te seeye se egkapet kandin.

21 Anak, kene nu balahara ka katagseb nu ne egkaawe due te keykew; tantanuri nu ka katagseb wey ka katuenan te peg-alam. 22 Egpakabehey seini keykew te mateles wey malayat ne umul. 23 Kene ka egkamenu ke eggipanew ka wey kene ka iya egpakarugsu. 24 Egpakalipereng ka ne egkaalineknek wey ware igkaaldek. 25 Kene ka kaaldek te sahuhune ne me karereetan wey ke bagyu naa ne egginguma diye te maddeet ne etew. 26 Su ka Magbebaye ka egbantey keykew eyew egpakapariyu ka te karereetan.

27 Ke duen e igkabulig nu kuntee te sumbaley nu ne migkeilangan te bulig, 28 kene nud e pasimahi ne human nu pad egbulihi. 29 Kene ka suman-suman te minsan nekey ne egpakarereet te sumbaley nu ne migsalig keykew. 30 Kene ka pakig-apul te sumbaley nu te ware egpuunan wey ke ware naa mareet ne neyimu rin keykew. 31 Kene ka keimma te mabbulut ne etew, wey kene kad iya ikul te maddeet ne hinimuwan dan, 32 su igkeepes te Magbebaye ka etew ne eggimu te mareet, piru egbantayan din mule ka me matareng. 33 Egdilusen te Magbebaye ka pamilya te me makasesale, piru egpanalanginan din mule ka pamilya te me matareng. 34  ✡ San 4:6; 1Pid 5:5.Eglemetan din seeye se me lemeten, piru eg-ay-ayaran din seeye se egkaleig-leig wey mapariralemen. 35 Egmabantug ka me matagseb, piru egkeyilawan ka me ungel.