Me Salmu
Igpewun‑a
Ka Salmu, sabeka seini ne immanlimud ne me ulahingen, me duma pad man‑e ne me ulahingen, me balak, wey me peg-ampu. Inggamit sika te keet-etawan te Israil te pegsimba ran. Nataman, intimul ran e seini diye te me Kasulatan dan.
Masulug ne klasi te seini ne epad te egmalintutuu te Manama: due me ulahingen te pegsaye wey pegsimba te Manama, due me peg-ampu te egpabulig, wey te kaluwasan, pegbuyu te pasaylu, ulahingen te egpasalamat te pegpanalangin te Manama, wey me peghangyu ne egdusaan ka me kuntere dan. Ka seini ne me peg-ampu neelin ne para te senge-etew wey para te intiru ne inged; ka duma, migpakita te peg-ealig te etew, ne ka duma, migpanengneng te me keilangan wey peggeyinawa te langun ne keet-etawan te Manama.
Inggamit ni Hisus ka me ulahingen, inlagkes isulat te me talagsulat te Iyam ne Panugtulen, wey intumpisan e seini ne baseen te pegsimba te Simbaan te Migmalintutuu puun te pegbunsud.
Ka nenasulat te seini ne baseen
Ka sabeka ne gatus wey lalimma ne pulu (150) ne me ulahingen, imbaad te lalimma ne baad wey ke baseen naa:
Salmu (1–41)
Salmu (42–72)
Salmu (73–89)
Salmu (90–106)
Salmu (107–150)
Te seini ne baseen, due sabeka ne gatus wey lalimma ne pulu (150) ne me ulahingen wey me peg-ampu ne inggamit te me Hibruwanen te pegsimba ran. Eggamiten dan sika te pegsimba ran diye te kasuluhan, wey diye te eglunsud-lunsud de ne pegsimba. Ka duma kayi, inggamit dan te timpu pad ni Hari Dabid, ne kema ke sikandin iya ka talagsulat kayi. Ne ka duma, wey buwad nasulat ne napenge e ka peghari ni Dabid. Ne ka sika ne me ulahingen wey peg-ampu, impurtanti pad kuntee ne eggamiten te pegsimba te me Hibruwanen ne me migmalintutuu. Ka Salmu, migpataha ke nekey ka eggeramen te etew, iling te: kaaldek ne egpangkus te kahale, kabelu ne egpangkus te pegsalig wey pegkalange ne egpangkus te peg-iman-iman.
An-anayan ne Baad
1
(Salmu 1–41)
Ka malehet ne pegkahale
1 Keupianan te seeye se ware mig-ikul te tambag te me etew ne mareet se hinimuwan,
wey ware mig-ikul te dalan ne imbayaan te me makasesale,
wey ware mig-apil-apil te me etew ne migbaley-baley te Manama.
2 Ne iyan din kahale ka pegtuman te Balaud te Magbebaye ne Manama,
wey egpalemlemen din seini te aldew wey marusilem.
3 ✡ Hir 17:8.Egpekeiling sikandin te kayu ne diye nakapamula te ilis te weyig,
ne egpamehas te eleg ne timpu
wey kene egkahangu ka me dewun kayi.
Ne eglampus sikandin te langun ne eggimuwen din.
4 Piru kene ne iling due ka me etew ne mareet se hinimuwan,
ke kene, egpekeiling sikandan te lahami ne eglayap de te kalamag.
5 Egdusaan iya te Manama ka me etew ne mareet se hinimuwan,
wey kene sikandan igpalemung te me matareng.
6 Imbantayan te Magbebaye ne Manama ka dalan te me matareng,
piru karereetan ka egpangkusan te dalan te me makasesale.