48
Hirusalim, ka siyudad te Manama
Ka ulahingen te me kabuhalan ni Kura.
1 Maresen ka Magbebaye
wey likes ne egpatamtamanan egdayana diye te siyudad din ne diye te matulus ne bubungan.
2 Matikang wey mateles ka bubungan,
wey igkatelesi seini te intiru ne kalibutan.
Ka bubungan ne Siyun* Sakup te Hirusalim ka Bubungan ne Siyun. egpekeiling te me puntul te Sapun,
wey siyudad seini te maresen ne Hari.
3 Mig-uugpe ka Manama diye te me malig‑en ne siyudad,
wey sikandin ka egkasalihan ne talagpangabang.
4 Su miglibulung ka me Hari wey migsaamul sikandan,
eyew eglusud te siyudad.
5 Piru te nakita ran e ka siyudad, neinu-inu amana sikandan.
Imbaluyan sikandan te liyas wey namallahuy e.
6 Nangelkel sikandan te liyas,
wey egpekeiling e te malitan ne egbaletikan.
7 Indereetan nu ka me unturanan te weyig te Tarsis,
te kalamag ne egpuun te igsile.
8 Nakita ney e kuntee kayi te siyudad ka naddineg ney dengan,
ne nangimu te Amana ne Maresen ne Magbebaye.
Eggimuwen din ne maresen ka kandin ne siyudad,
wey kene seini egkamenu te ware egtamanan.† Te Hibruwanen, duen pad sumpul ne “sila”, ne palinneu buwa te seeye se eg-ulahing ne keilangan ne egsanggel.
9 Migpalemlem key te geyinawa nu ne kene egkabalbalawan, he Manama,
diye te seled te keykew ne timplu.
10 Mabantug ka, he Manama wey indayan ka te langun te intiru ne kalibutan,
su migmandu ka ne maresen wey eleg ka peggukum nu.
11 Egkahale-gale perem ka me mahinged te Hirusalim,
wey ka me mahinged te me inged ne sakup te Huda,
uya su eleg ka peggukum nu.
12 Lingut kew te Hirusalim wey seela niyu ka me matikang ne baley ne egpantawan te talagbantey te siyudad.
13 Pitawa niyu ka matikang wey makepal ne alad,
wey nengnengi niyu ka me kute te siyudad,
eyew due igpakapangguhud niyu te me kabuhalan niyu keureme,
14 ne iling due ka Manama ne impamakey ta.
Manama sikandin ne ware egtamanan,
wey egpanuluen ki nikandin te ware egtamanan.