49
Ware karuan te pegsalig te karatuan
Ka ulahingen te me kabuhalan ni Kura para te pangulu te mangngulahing.
1 Pammineg kew kayi, sikaniyu langun se keet-etawan.
Nengneng kew langun se nangugpe te kalibutan,
2 mabantug ma wey se kene,
meyaman ma wey se egkaayu-ayu.
3 Neelin ne egpakabehey te katuenan ka iglalag ku,
wey egpakabehey te keupianan ka egsumsumanen ku.
4 Egpammineg a te maddalem ne me lalag,
wey egpanluwasen ku taheed te egpangelit a te alpa.
5 Kena a egkaaldek ke due samuk ne egkeyitabu,
ke eglingutan a te me mareet wey limbungen ne me etew,
6 ne migsalig-salig te karatuan dan,
wey migpegpeggasal ne amana ne matubung sikandan.
7 Ware iya etew ne egpakalekat te umul te senge-etew,
wey egpakabayad te Manama eyew kene sikandin egpatey.
8 Su ka umul te etew, subla ne mahal,
wey ware eleg ne igpakabayad,
9 eyew egkeuyag sikandin te ware egtamanan,
wey kene sikandin egpatey.
10 Su egkakita ta ne minsan ka me matagseb ne me etew, egpatey iya,
iling ded ka kene egmanulik wey egkengeungel.
Egpatey iya sikandan langun,
wey iggaat ka karatuan diye te duma.
11 Ka lebeng dan iyan dan e eg-ugpaan te ware egtamanan,
wey kenad sikandan egpakaawe diye te langun ne timpu,
minsan pad ke due tane dan ne impasangey ran kandan.
12 Minsan ke mabantug pad ka etew, egpatey iya sikandin,
iling te me mahintalunan ne kene egkaluhey te kalibutan.
13 Sika ka egtamanan te me etew ne egsalig-salig te kanekal ran,
wey seeye se egparuma-ruma te guhuren dan.* Te Hibruwanen, duen pad sumpul ne “sila”, ne palinneu buwa te seeye se eg-ulahing ne keilangan ne egsanggel.
14 Egpekeiling sikandan te me karniru ne eggimatayan,
wey ingkerew e ka peggendiye dan te inged te me minatey.
Ka pegpatey ran ka egpanulud kandan diye te lebeng.
Ka matareng ne me etew egmandu kandan te pegsile te aldew,
wey egkamewu ka me lawa ran diye te inged te me minatey,
wey kenad sikandan egpakaawe te lebeng.
15 Piru eglekaten a te Manama puun te inged te me minatey,
su eggen-genan a nikandin eyew kena a egpatey.
16 Kene ka kabantali ke egkaratu ka sabeka ne etew,
wey ke egkatimulan pad ka karatuan dan te taltalaanak.
17 Su kene din seini egkeuyan ke egpatey e sikandin,
wey kene din egkababa ke iglebeng e sikandin.
18 Su minsan migsuman-suman sikandin ne matubung sikandin te manekal din pad,
wey egkarayan sikandin te me etew tenged te migmatubung sikandin,
19 egpakalemung ded sikandin te me kaap-apuan din,
diye te inged ne kene din e egpakakita te malayag.
20 Minsan ke mabantug ka etew piru kene egpakasabut,
egkapatey red iya sikandin iling te me mahintalunan.
*49:13 Te Hibruwanen, duen pad sumpul ne “sila”, ne palinneu buwa te seeye se eg-ulahing ne keilangan ne egsanggel.