50
Ka malehet ne pegsimba
Ka ulahingen ni Asap.
1 Migpangumew ka Amana ne Maresen ne Manama,
wey miglalag ka Magbebaye ne Manama,
puun te igsile taman te iglineb.
2 Migsilak sikandin puun te Hirusalim,* Te Hibruwanen: Siyun. Sabeka seini te me ngaran te Hirusalim.
ka siyudad ne amana ne mateles.
3 Eglepew ka Manama ta wey kene sikandin egpeeneng-eneng de.
Due egkanlabkanlab ne hapuy diye te egkatangkaan din,
wey nalingutan sikandin te manekal ne kalamag.
4 Impangumew rin ka langit wey ka tane,
eyew egtameng te peggukum din te keet-etawan din.
5 Egkahi sikandin,
“Libulunga niyu kayi ka me matinumanen keddi,
wey migpanubad te peggimu ran te kasabutan keddi.”
6 Impapitew te langit ne matareng ka Manama,
su sikandin ka talaggukum.† Te Hibruwanen, duen pad sumpul ne “sila”, ne palinneu buwa te seeye se eg-ulahing ne keilangan ne egsanggel.
7 Migkahi pad man‑e ka Manama,
“Pammineg kew keet-etawan ku su due iglalag ku.
Sikeddi ka Manama, ka Manama niyu.
Egpamalehetan ku ne due mareet ne neyimu niyu, kabuhalan ni Israil.
8 Ware ku sikaniyu sapari tenged te pegpanubad niyu,
wey tenged te egtutungen ne layun niyu igpanubad.
9 Minsan kena a egkeilangan te turu ne baka puun kaniyu,
wey kena a egkuwa te me kambing niyu.
10 Su keddiey langun ka me mahintalunan diye te puwalas,
wey ka me baka diye te libu-libu ne me bubungan.
11 Nanengnengan ku ka langun ne me bayaku diye te me bubungan,
wey ka langun ne me mananap diye te me kamet.
12 Ke eggutasan a, kene ku sikaniyu egguhuran,
su keddi ka kalibutan wey ka langun ne tahu te kalibutan.
13 Egkeen e naa te ngalap te turu ne baka,
wey eg-inum e naa te langesa te me kambing?
14 Behey kew te halad te pegpasalamat keddi te Manama niyu,
wey tumana niyu ka insaad niyu keddi te Amana ne Maresen ne Manama.
15 Umew kew keddi te timpu te keyirapan,
wey egpangabangan ku sikaniyu wey egdayanen a nikaniyu.”
16 Piru seini ka ingkahi te Manama diye te me etew ne mareet se hinimuwan,
“Ware katenged niyu ne egdawit te me balaud ku,
wey egpangguhud naa te kasabutan ku.
17 Su egkeepes kew ne egdisiplineen,
wey imbalahad niyu ka inlalag ku kaniyu.
18 Emun ke due egkakita niyu ne takawen, eg-alukuy kew kandin,
wey egduma-ruma kew te me talaglibug.
19 Eggelebek kew egpanlalag te mareet,
wey layun kew eglilimbung.
20 Egpanlalahan niyu te mareet ka me suled niyu,
wey imbebayungan niyu pad man‑e.
21 Migpeeneng-eneng e re te nangimu niyu seini,
wey kahiyen niyu ne iling e red kaniyu.
Piru kuntee egsaparan kud sikaniyu,
wey igpanengneng kud ka sale niyu.
22 Pammineg kew, sikaniyu se nenalingew keddi,
su emun ke kene kew eglinga-linga, egdereetan ku sikaniyu,
wey warad iya egpakapangabang kaniyu.
23 Ka egbehey te halad ne iyan ka pegpasalamat keddiey, egpakapahale keddiey,
wey egluwasen ku ka egtuman te keddi ne igkeupii.”