2
Ka etew ne mig-uyan te igseked
1 Te pegpitew ku man‑e, iyan kud e se etew ne miggen-gen te lubid ne igseked. 2 Ne mig-insaan ku sikandin, “Egpeendei kaa?”
Ne migtabak sikandin, “Eggendiya a te Hirusalim su egsekeren ku ke mamenu kaluag wey kalayat ka sika ne siyudad.”
3 Ne mig-awe e ka panalihan ne migpakiglalag keddi wey due degma panalihan ne migsinug-ung kandin, 4 wey ingkahiyan sikandin, “Apas ka pallahuy wey ilalag nu seini te seeye se kanakan ne miggen-gen te lubid ne igseked, ‘Egkaawe ka matikang wey makepal ne alad ne batu te siyudad te Hirusalim su amane e ne masulug ka me etew wey ka me ayam. 5 Migsaad ka Magbebaye ne Manama ne sikandin ka egkeyimu ne alad ne hapuy ne eglingut te Hirusalim, wey sikandin ka egkabantug te sika ne siyudad.’ ”
Ka pegpeuli te Manama te nenaddakep
6-7 Ne ingkahiyan te Magbebaye ne Manama ka keet-etawan din, “Keiyal kew awe due te Babilunya! Impegsuwey-suwey ku sikaniyu te minsan hendei.* Te Hibruwanen: diye te hep‑at ne kalamag te me langit. Piru kuntee, awe kew e due wey libed kew e diye te Hirusalim. 8 Minsan hentew ne eg-ehet wey egdereet kaniyu, nekeiling de te egdereetan kew se amana ku geyinawei.”† Te Hibruwanen: etew te mata.
Seini pad man‑e ka ingkahi keddi te Amana ne Maresen ne Magbebaye meyitenged te me nasud ne mig-ahew te karatuan te keet-etawan din: 9 “Pammineg kew, eglegparan‡ Te Hibruwanen: igwelewes ku ka belad ku diye te ampew ran. ku iya sikandan wey egpangahawan degma sikandan te me uripen dan.”
Emun ke egkeyitabu e seini, egkatahaan niyu ne ka Amana ne Maresen ne Magbebaye ka migsuhu keddi.
10 Ne migkahi ka Magbebaye ne Manama, “Me keet-etawan te Hirusalim,§ Te Hibruwanen: anak ne malitan te Siyun. ulahing kew te kahalaan su eggenduen ad te kaniyu wey duen ad e eg-ugpe!”
11 Te sika ne timpu, masulug ka me nasud ne egparani keddi te Magbebaye ne Manama wey egkeyimu sikandan ne keet-etawan ku, wey eg-ugpa a duma kandan. Ke egkeyitabu e sika, egkanengnengan niyu ne iyan migsuhu keddi ka Amana ne Maresen ne Magbebaye eyew eggendini te kaniyu. 12 Eg-angkenen te Magbebaye ka Huda ne kandin ne baad puun te matulus ne tane, wey eg-alamen din ded man‑e ka Hirusalim.
13 Peeneng-eneng kew se langun ne etew due te tangkaan te Magbebaye, su egbukal-bukal e sikandin diye te matulus ne ugpaan din.